Bu müəssisələrdə son 3 ildə 8,45 milyard manatlıq məhsul istehsal edilib
İqtisadiyyat naziri Mikayıl Cabbarov “X” sosial şəbəkəsində İqtisadi Zonaların İnkişafı Agentliyinin yaradılmasından 3 il ötdüyünü, keçən müddət ərzində Agentliyin idarəçiliyindəki sənaye zonalarında investisiya həcminin 750 milyon manat olan 56 sahibkarlıq subyektinə rezidentlik statusu verildiyini, 17 müəssisənin fəaliyyətə başladığını və 1336 daimi iş yerinin yaradıldığını bildirib.
Naziri daha sonra vurğulayıb ki, 3 il ərzində sənaye zonalarında 8,45 milyard manatlıq məhsul istehsal edilib ki, bunun da 35,7 faizi faizi, yəni 3,02 milyard manatı ixracın payına düşür.
Keçən ilki fəaliyyətə gəldikdə isə deyə bilərik ki, hesabat dövründə İqtisadi Zonaların İnkişafı Agentliyinin idarəçiliyində olan sənaye zonalarında 12 müəssisə fəaliyyətə başlayıb. Həmin müəssisələr tərəfindən sənaye zonalarına 135 milyon manat investisiya yatırılıb, 744 daimi iş yeri yaradılıb.
Sözügedən müəssisələr polimer qatqıların, keramik plitələrin, qablaşdırma məhsulların, istilik izolyasiya lövhələrin, nəqliyyat vasitələri üçün əyləc bəndlərin və s. məhsulların istehsalı ilə məşğul olurlar.
Bütün bu yüksək göstəricilər təsadüfi xarakter daşımır. Belə ki, ölkəmizdə fəaliyyət göstərən sənaye parkları və məhəllələrində sahibkarların biznes fəaliyyətini stimullaşdıran, onların vergi və gömrük güzəştləri əldə etmələri üçün əlverişli şərait yaradan 2016-cı ildən tətbiq olunan investisiya təşviqi mexanizmi çərçivəsində indiyədək 600-yaxın layihə təşviq olunub. Yeri gəlmişkən, Prezident İlham Əliyevin 20 dekabr 2022-ci il tarixli müvafiq fərmanı ilə əvvəlki illərin təcrübəsi nəzərə alınmaqla investisiya təşviqi mexanizmi təkmilləşdirilib.
Xatırladaq ki, investisiya təşviqi sənədi 2023-cü il yanvarın 1-dən 3 il müddətində sənaye məhəllələri, aqroparklar, turizm və rekreasiya zonaları, həmçinin müvafiq ərazilərdə həyata keçirilən layihələrə, eləcə də dövlət başçısı tərəfindən müəyyənləşdirilən istiqamətlər üzrə strateji təşəbbüslərə verilib. Təşviq layihələrin icrası nəticəsində iqtisadiyyata 5,6 milyard manatdan artıq investisiya yatırılıb, dəyəri 1,8 milyard manatdan artıq olan texnika, texnoloji avadanlıq və qurğular güzəştli şərtlərlə respublikaya idxal edilib, həmin texnika, texnoloji avadanlıq və qurğuların əhatə dairəsinin dəqiqləşdirilməsi məqsədilə mal mövqelərinin siyahısı təsdiqlənib. Bütün bunlarla bərabər, yeni məhsullar istehsal edən müasir istehsal obyektləri qurulub, ekoloji baxımdan mühüm önəm daşıyan tullantıların təkrar emalı sahəsi istifadəyə verilib.
Onu da qeyd edək ki, sənaye zonalarında yeni müəssisələrin sayının davamlı artması respublikada qeyri-neft sektorunun inkişafına təkan verir, ölkənin ixrac coğrafiyasını genişləndirir, iqtisadiyyatın diversifikasiyasını sürətləndirir və əhalinin məşğulluğunun yüksəlməsini şərtləndirir.
Azərbaycanın sənaye zonalarında yeni məhsullar istehsal edən müasir istehsal zavodlarından söz düşmüşkən, avtomobil buraxılan müəssisələrinin fəaliyyət göstəriciləri ilə bağlı bir neçə göstəricini də diqqətə çatdırmaq istərdik. Az bir müddət əvvəl bu barədə məlumat verən iqtisadiyyat naziri Mikayıl Cabbarov sənaye zonalarında ilk avtomobil istehsalına 2018-ci ildə başlanıldığını, həmin il 712 ədəd avtomobil istehsal edilmişdisə, 2023-cü ildə bu rəqəmin 4233-ə çatdırıldığını, bunun isə 2022-ci illə müqayisədə təqribən 109 faiz artım demək olduğunu bildirib.
Yeri gəlmişkən, sənaye zonalarında istehsal artımı ölkənin idxaldan asılılığını aradan qaldırır, başqa sözlə, valyutanın ölkədən çıxmasının qarşısını alır, ixracı təşviq edir. Bu da, öz növbəsində, sənaye parklarından kənarda fəaliyyət göstərən müəssisələrə qarşı haqsız rəqabətin olmadığından xəbər verir.
Sənaye parklarında yaradılmış əlverişli biznes mühiti və geniş logistik imkanlar, eləcə də bir sıra stimullaşdırıcı tədbirlər xarici şirkətlərin də ölkəmizə marağını artırır. Bunun nəticəsidir ki, sənaye zonalarında xarici kapitallı rezidentlərin sayı da getdikcə artır. Hazırda Sumqayıt Kimya Sənaye Parkında İsveçrə şirkəti olan “Sika” MMC, Çin kapitallı “Azərbaycan Vanhong Ceramics Co.” MMC, Birləşmiş Ərəb Əmirliklərinin “SENSEMI DMCC” şirkəti, Pirallahı Sənaye Parkında Rusiya-Azərbaycan birgə müəssisəsi olan “R-Pharm” MMC, Ağdam Sənaye Parkının rezidenti kimi qeydiyyata alınan Birləşmiş Ərəb Əmirlikləri kapitallı “Expert Services FZE” Məhdud Məsuliyyətli azad zona müəssisəsi, Neftçala Sənaye Məhəlləsində İran-Azərbaycan birgə avtomobil müəssisəsi, Hacıqabul Sənaye Məhəlləsində qeydiyyata alınan “Penoplex Prikavkazye” MMC fəaliyyət göstərir.
Adları çəkilən şirkətlər xarici investisiyaların ölkəyə cəlbində və qeyri-neft sektorunun inkşafında mühüm rol oynayırlar. Onlar yeni texnologiyaların ölkəyə transfer olunmasında, bununla da rəqabətqabiliyyətli əmtəələr istehsal edilməsində daha çox fərqlənirlər. Eyni zamanda, yerli şirkətlər sənaye park və məhəllələrinin yaradılması ilə bağlı beynəlxalq təcrübədən bəhrələnməklə həmin texnologiyalar əsasında yeni milli istehsal müəssisələrinin açılmasına böyük maraq göstərirlər.
Belə müəssisələrdə buraxılan məhsullar, eyni zamanda, keyfiyyətinə görə xüsusi diqqət çəkir. Bu səbəbdən də onların ixrac coğrafiyası getdikcə genişlənir. İndiyə qədər ölkəmizin sənaye park və məhəllələrində istehsal edilən məhsulun, təqribən 32,4 faizinin ixrac olunması da vurğulanan fikrin təsdiqidir.
Qarabağ və Şərqi Zəngəzur iqtisadi rayonlarında da sənaye park və məhəllələrinin yaradılması xüsusi diqqətdə saxlanılır. Həmin park və məhəllələrin rezidentləri qeydiyyata alındıqları tarixdən etibarən 10 il müddətinə əmlak, torpaq, mənfəət vergilərindən, istehsal məqsədilə idxal etdikləri texnikanın, texnoloji avadanlıqların və qurğuların idxalı zamanı ƏDV-dən və gömrük rüsumlarından azad olunurlar.
Vergi Məcəlləsinə edilmiş dəyişikliyə əsasən, işğaldan azad olunan ərazilərdə fəaliyyət göstərəcək sahibkarlara əlavə güzəştlər tətbiq edilir. Bura sosial sığorta haqlarının subsidiyalaşdırılması, düşməndən təmizlənən yaşayış sahələrində məskunlaşaraq işləyən mütəxəssislərə hər il 5 gün əlavə məzuniyyət verilməsi, aylıq vəzifə maaşına əlavələrin hesablanması, 600 manat birdəfəlik müavinət verilməsi, iş icazələrinin alınmasının sadələşdirilməsi kimi imtiyazlar daxildir. İşğaldan azad olunan ərazidə fəaliyyət göstərən sahibkarın istehsal prosesində istifadə edəcəyi bir sıra xammal və materialların idxalı da 10 il müddətinə ƏDV-dən azad olunur.
Vaqif BAYRAMOV
XQ