Prezident İlham Əliyev avqustun 18-də “Avtomobil nəqliyyatı haqqında” qanunda dəyişiklik edilməsi barədə qanunu təsdiqləyib. “Avtomobil nəqliyyatı haqqında” Qanun ölkə ərazisində avtomobil nəqliyyatı ilə sərnişin və yük daşımalarının hüquqi, təşkilati və iqtisadi əsaslarını müəyyən edir. Bununla yanaşı, sözügedən sənəd bu sahədə dövlət orqanları (qurumları), daşıyıcılar və avtomobil nəqliyyatı ilə sərnişin və yük daşımaları üzrə xidmətlərin istehlakçıları arasında yaranan münasibətləri tənzimləyir.
Dəyişikliyə əsasən, ölkədaxili sifarişli daşımalara, taksi minik avtomobili ilə sərnişin daşımaları istisna olmaqla qeyri-müntəzəm sərnişin daşımaları və ölkədaxili yük daşımaları aid edilir. Xatırladaq ki, qüvvədə olan qanuna görə, indiyə qədər avtomobil nəqliyyatı ilə müntəzəm beynəlxalq, şəhərlərarası (rayonlararası) və şəhərdaxili (rayondaxili) sərnişin daşımalarının təmin olunması məqsədilə Azərbaycan Respublikasının müvafiq icra hakimiyyəti orqanı (qurum) tərəfindən marşrut şəbəkəsi müəyyənləşdirilib və dövlət sifarişi formalaşdırılıb. Dəyişikliyə əsasən, bundan sonra avtomobil nəqliyyatı ilə müntəzəm beynəlxalq, şəhərlərarası (rayonlararası) və şəhərdaxili (rayondaxili) sərnişin daşımalarının təmin olunması məqsədilə müvafiq icra hakimiyyəti orqanının müəyyən etdiyi orqan tərəfindən marşrut şəbəkəsi müəyyənləşdiriləcək və dövlət sifarişi formalaşdırılacaq.
Qanunun tətbiqi ilə bağlı fərmana əsasən, bu maddədə nəzərdə tutulmuş səlahiyyətləri Rəqəmsal İnkişaf və Nəqliyyat Nazirliyi, Bakı, Sumqayıt və Gəncə şəhərlərinin inzibati ərazisində müntəzəm şəhərdaxili sərnişindaşımaya münasibətdə isə, müvafiq olaraq, Bakı Nəqliyyat Agentliyi, Sumqayıt və Gəncə şəhər icra hakimiyyəti başçıları yanında Avtomobil Nəqliyyatı ilə Sərnişindaşıma idarələri həyata keçirirdi. Qanuna edilən dəyişiklik bundan öncə Bakı Nəqliyyat Agentliyinin statusunun dəyişməsi, artıq “Nazirlər Kabineti yanında” bir orqan kimi fəaliyyət göstərməməsi ilə əlaqədardır. Oktyabrın 1-dən qüvvəyə minəcək yeni qanuna əsasən, ölkə ərazisində sərnişin və yük daşımaları sahəsində bir sıra yeniliklər tətbiq olunacaq.
Eyni zamanda, oktyabrın 1-dən etibarən taksi xidmətində də bir sıra yeniliklərin şahidi olacağıq. Bu baxımdan taksi kimi istifadə edilən nəqliyyat vasitələrində taksometrlərin quraşdırılması diqqəti daha çox cəlb edir. Xatırladaq ki, taksometr taksi minik avtomobilinin qət etdiyi məsafənin və boşdayanmanın müddətinin uçotunun aparılmasını, gediş haqqının məbləğinin hesablanmasını və bu barədə sərnişinin məlumatlandırılmasını təmin edən, taksi minik avtomobili üçün nəzərdə tutulmuş fiskal yaddaşlı xüsusi ölçü cihazı və ya proqram təminatı deməkdir.
Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyindən bildirilib ki, “Avtomobil nəqliyyatı haqqında” qanunda edilən dəyişikliklər taksi şirkətlərinə və sürücülərə yeni imkanlar açır. Belə ki, dəyişikliklərə əsasən, minik avtomobillərində taksometrin quraşdırılması tələbi daha da sadələşdirilib. Əvvəllər qanunvericilikdə taksi minik avtomobillərində xüsusi ölçü cihazı kimi yalnız taksometrlərin quraşdırılması tələb kimi əks olunub. Oktyabrın 1-dən qüvvəyə minəcək dəyişiklik isə taksi sürücüləri üçün əlavə imkan yaradır. Belə ki, taksi minik avtomobillərində taksometr və ya bu cihazın funksiyasını yerinə yetirən proqram təminatı anlayışı qanunvericiliyə daxil edilib. Yəni, məsafəyə uyğun gedişhaqqını göstərən proqram təminatından istifadə edən taksi minik avtomobillərində taksometrin quraşdırılmasına ehtiyac yoxdur.
Eldəniz CƏFƏROV,
avtomobil nəqliyyatı üzrə ekspert
“Avtomobil nəqliyyatı haqqında” Azərbaycan Respublikasının Qanununa edilən dəyişikliklərə nəzər yetirdikdə məlum olur ki, burada qarşıya bir neçə əsas vəzifə qoyulub. Bunlardan ən əsası ölkədə müntəzəm və qeyri-müntəzəm sərnişindaşımanın, o cümlədən taksi nəqliyyatı ilə sərnişindaşımanın keyfiyyətinin yaxşılaşdırılması və təhlükəsizliyin təmin olunmasından ibarətdir. Həmçinin qanuna edilən dəyişikliklərdə taksi fəaliyyəti sahəsində çalışan sürücülərin hüquqlarının qorunması da diqqəti cəlb edir. Belə ki, dəyişikliklərə əsasən, avtomobillərdə taxoqrafların quraşdırılması da nəzərdə tutulub. Taxoqrafların quraşdırılması isə, əsasən, yük və sərnişindaşımada istifadə olunacaq avtomobillərdə həyata keçiriləcək. Bu da sürücülərin sutka ərzində qanunvericiliyə uyğun çalışması, onların nahar fasiləsinin təşkilinin həyata keçirilməsinə imkan yaradacaq. Bütün bunlar isə müvafiq qurumlar tərəfindən nəzarətdə saxlanılacaq.
Onu da qeyd edək ki, bugünə qədər Azərbaycanda taksi operatoru şirkəti anlayışı yox idi. Sadəcə, operator şirkətləri var idi. Onlar da taksi fəaliyyətini təşkil edirdilər. Yəni, taksi sürücüləri üçün müəyyən faiz müqabilində müştəri tapırdılar. İndən belə isə bu şirkətlər taksi operatoru şirkəti adlandırılacaq. Bu da onları taksi şirkəti kimi lazımi prosedurları həyata keçirməyə məcbur edəcək.
Bundan əlavə, taksilərdə xüsusi taksometrlərin quraşdırılması nəzərdə tutulur. Məlum olduğu kimi, bu gün taksi operatoru şirkətlərinin özlərinin mobil tətbiqləri var. Müəyyən proqram vasitəsilə tariflərin, kilometrajın hesablanması həyata keçirilir. İndən belə taksi fəaliyyəti ilə fərdi qaydada məşğul olan taksi sürücüləri üçün də taksometrlərin quraşdırılması məcburi olacaq. Hər hansı bir vətəndaş taksi fəaliyyəti ilə məşğul olmaq istəyirsə, vergisini ödəyib avtomobilinə sayğac, yəni taksometr quraşdırmaqla bu xidməti həyata keçirə biləcək.
Eyni zamanda, “Avtomobil nəqliyyatı haqqında” Qanuna edilən dəyişikliklərlə sərnişindaşıma ilə məşğul olan şirkətlər və fərdi şəxslər qarşısında tələblər sərtləşdirilir. Yeni qanun taksi şirkətlərinin və sürücülərin məsuliyyətini artıracaq. Burada da əsas məqsəd bu sahədə vətəndaşların təhlükəsizliyini təmin etmək və keyfiyyətli xidmətə nail olmaqdır. Bu prosedurlar həm lazımi sənədlərin alınmasına, tapılmasına, xüsusən də taksi xidmətinin Azərbaycan Respublikasında qanunauyğun təşkil edilməsinə imkan yaradacaq.
Mirbağır YAQUBZADƏ, “Xalq qəzeti”