Son illər ölkəmizdə Minilliyin İnkişaf Məqsədlərinə nail olunması üzrə kompleks tədbirləri əhatə edən dövlət proqramlarının uğurla həyata keçirilməsi nəticəsində bir çox istiqamətlərdə mühüm nailiyyətlər əldə olunub. Təkcə onu qeyd etmək kifayətdir ki, Azərbaycan yoxsulluğun yarıya qədər azaldılması öhdəliyini götürən 128 ölkə arasında buna əməl edən 18 dövlətdən biri olub. Bununla yanaşı, İnsan İnkişafı İndeksində göstəricilərini 30 faiz artıran Azərbaycan 2010-cu ildə “orta insan inkişafı” statusuna malik ölkələr qrupundan çıxaraq “yüksək insan inkişafı” kateqoriyasına daxil olub.
Bu və ya digər məsələlər barədə iyunun 14-də Bakıda keçirilmiş “2030-cu ilə doğru: Azərbaycanda sosial-iqtisadi inklüzivlik” mövzusunda ikinci Dayanıqlı İnkişaf Məqsədləri Dialoqunda ətraflı bəhs edilib. Bildirilib ki, BMT-nin Minilliyin Bəyannaməsinin davamı olaraq Azərbaycan “Dünyamızın transformasiyası: 2030-cu ilədək dayanıqlı inkişaf sahəsində Gündəlik”dən irəli gələn Dayanıqlı İnkişaf Məqsədlərinə (DİM) qoşulub. Ötən müddətdə ölkəmizdə DİM-in icrası uğurla davam etdirilib, bu istiqamətdə dünyada 10 ölkədən biri, regionda isə ilk ölkə olan Azərbaycan tərəfindən BMT-nin Yüksək Səviyyəli Siyasi Forumuna 3 hesabat təqdim edilib. Gələn il isə daha bir hesabatın təqdim olunması nəzərdə tutulur.
Beynəlxalq təşkilatların Azərbaycanda akkreditə olunan nümayəndələrinin, müvafiq qurumların rəhbərləri və əməkdaşlarının iştirak etdikləri tədbirdə Baş nazirin müavini, Dayanıqlı İnkişaf üzrə Milli Əlaqələndirmə Şurasının sədri Əli Əhmədov çıxış edərək Azərbaycanın BMT-nin Qlobal İnkişaf Strategiyasına qoşulduğunu və bu strateji proqrama töhfə verdiyini nəzərə çatdırıb. Qeyd olunub ki, Azərbaycan 2030-cu ilə kimi özünün Milli İnkişaf Konsepsiyasını həyata keçirir. Bu konsepsiyaya 40-dan çox proqram daxildir ki, bunlar da ölkədə sosial-iqtisadi inkişafın dayanıqlı olmasını təmin edir.
Birləşmiş Millətlər Təşkilatının Azərbaycandakı rezident-əlaqələndiricisi Vladanka Andreyeva çıxış edərək nəzərə çatdırıb ki, BMT-nin məqsədi inkişaf etməkdə olan ölkələrə yardım etməkdən ibarətdir. Bu gün dünyada mövcud problemlərin həll edilməsi üçün həm zaman, həm də resursların lazım olduğunu vurğulayan BMT nümayəndəsi bütün bunlara baxmayaraq, Azərbaycanın inklüziv inkişaf istiqamətində uğurlu addımlar atdığını bildirib.
İqtisadiyyat nazirinin müavini Sahib Məmmədov çıxış edərək deyib ki, Azərbaycanın yeni strateji inkişaf mərhələsinin əsas hədəfləri milli iqtisadiyyatın rəqabət qabiliyyətinin və maliyyə dayanıqlılığının gücləndirilməsi, dinamik, inklüziv və sosial ədalətə əsaslanan cəmiyyətin formalalaşdırılması, ölkənin rəqabətli insan kapitalı və müasir innovasiyalar məkanına çevrilməsi, azad edilmiş ərazilərin sürətli reinteqrasiyası kimi 5 əsas məqsəddən ibarətdir. Bildirilib ki, strategiyanın icrası nəticəsində ölkə iqtisadiyyatının hər il orta hesabla 3-4 faiz, qeyri-neft və qaz ÜDM-nin illik orta hesabla 5 faiz, 2026-cı ildə qeyri-neft-qaz ixracının həcminin 2021-ci illə müqayisədə 85 faiz artırılması, eləcə də özəl sektorun iqtisadiyyatda payının 88 faizə çatdırılması planlaşdırılır. Nazir müavini, həmçinin deyib ki, regionlarda kiçik və orta sahibkarlığın, eləcə də özünüməşğulluğun inkişafına zəruri şərait yaradılmaqla əhali qrupları üçün səmərəli məşğulluğa və layiqli əməyə nail olunacaq, qeyri-formal məşğulluğa qarşı zəruri qabaqlayıcı və nəzarət tədbirləri gücləndiriləcək.
“2030-cu ilə doğru: Azərbaycanda sosial-iqtisadi inklüzivlik” mövzusunda ikinci Dayanıqlı İnkişaf Məqsədləri Dialoqunda ölkəmizin işğaldan azad edilmiş ərazilərinin bərpası istiqamətində həyata keçirilən tədbirlərdən də söhbət açılıb. İqtisadiyyat nazirinin müavini S. Məmmədov qeyd edib ki, hazırda Qarabağ və Şərqi Zəngəzurun yenidən qurulması, bərpası və dayanıqlı inkişafının təmin olunması üçün zəruri infrastruktur yaradılır, əhalinin doğma yurda qayıdışı istiqamətində lazımi tədbirlər görülür.
Nazir müavini bildirib ki, son onilliklər ərzində inkişaf etmiş ölkələrdə inklüzivlik, bərabər imkanlara əsaslanan inkişaf və regional bərabərsizliklərin aradan qaldırılması, rəqəmsal inkişaf, dairəvi iqtisadiyyat və yerli istehsal, “ağıllı” və dayanıqlı yaşayış məntəqələri, vətəndaş iştirakçılığı və s. amillər idarəetmənin yeni istiqamətləri kimi önə çıxıb. Onun dediyinə görə, bu məqsədlə işğaldan azad olunmuş ərazilərin bərpası və dayanıqlı inkişafı istiqamətində həyata keçiriləcək tədbirlər müəyyənləşdirilərkən sözügedən amillər ətraflı araşdırılıb, onların mümkün təsirləri təhlil edilib, BMT-nin və digər beynəlxalq qurumların irəli sürdükləri qlobal inkişaf prioritetləri nəzərə alınıb.
Azad edilmiş ərazilərin düşmən tərəfindən minalanmasının torpaqların reabilitasiyasına mane olduğunu diqqətə çatdıran Sahib Məmmədov deyib ki, bu il martın 2-də Bakıda keçirilmiş Qoşulmama Hərəkatının COVID 19-a Qarşı Mübarizə üzrə Təmas Qrupunun Zirvə Görüşündə Prezident İlham Əliyev tərəfindən minatəmizləmə fəaliyyətinin 18-ci Dayanıqlı İnkişaf Məqsədi kimi BMT-nin 2030 Gündəliyinə əlavə edilməsi təşəbbüsü irəli sürülüb.
Tədbirdə dayanıqlı inkişafa nail olunmasında bütün maraqlı tərəflərlə səmərəli əməkdaşlığın və dialoqun qurulmasının xüsusi əhəmiyyət daşıdığı vurğulanıb. Qeyd olunub ki, “DİM Dialoqlar” təşəbbüsü çərçivəsində istər dövlət, istər qeyri-hökumət təşkilatları, özəl sektor və beynəlxalq təşkilatlarla aparılacaq müzakirələrin ölkəmizdə “Dünyamızın transformasiyası: 2030-cu ilədək dayanıqlı inkişaf sahəsində Gündəliy”in icrasına və iqtisadi və sosial inklüzivliyin təmin edilməsi istiqamətində aparılan siyasətə öz müsbət töhfəsini verəcək.
M. YAQUBZADƏ, “Xalq qəzeti”
