Göygöl Rayon İcra Hakimiyyəti idarəetmə sistemini ISO 9001 və ISO 37001 beynəlxalq standartları üzrə quran və sertifikatlara layiq görülən ilk yerli icra qurumu olub.
Azərbaycan Prezidentinin 2022-ci il 4 aprel tarixli sərəncamı ilə təsdiq edilmiş “Korrupsiyaya qarşı mübarizənin gücləndirilməsinə dair 2022–2026-cı illər üçün Milli Fəaliyyət Planı”nın 2.11. bəndində ISO 37001 “Antikorrupsiya idarəetmə sistemləri” beynəlxalq standartının tətbiqinin nəzərdən keçirilməsi və bununla bağlı təkliflər verilməsi, bu sahədə qabaqcıl beynəlxalq təcrübənin, müvafiq standartın tətbiqi imkanlarının öyrənilməsi, təkliflərin toplanılması, habelə qiymətləndirilməsi istiqamətində araşdırma aparılması, nəticədə, “Antikorrupsiya idarəetmə sistemləri”nin qurulmasının təşviqi ilə bağlı aidiyyəti dövlət orqanlarına tapşırıq verilib.
Qeyd edilən tədbirin icrası ilə bağlı, eləcə də idarəetmənin səmərəli təşkili, işçilərin peşəkarlığının yüksəldilməsi, keyfiyyətin artırılması, sənədləşmənin düzgün aparılması, daimi təkmilləşmə sisteminin formalaşması, riskin azaldılması, həmçinin stabilliyin yaranması, səlahiyyətlərin düzgün bölgüsü və qarşılıqlı əlaqə sisteminin qurulması, resursların səmərəli istifadəsi, vətəndaş məmnunluğunun artırılması kimi faydaları özündə ehtiva edən, hazırda dünyada ən çox tətbiq edilən ISO 9001 “Keyfiyyəti idarəetmə sistemləri–tələblər” beynəlxalq standartlaşdırmanın tələblərinin araşdırılması, öyrənilməsi və tətbiq edilməsi istiqamətində Göygöl Rayon İcra Hakimiyyətində işlər uğurla həyata keçirilib.
Bu münasibətlə Göygöl Rayon İcra Hakimiyyətində görüş keçirilib. İcra hakimiyyətinin başçısı Elvin Paşayev ölkə rəhbərinin tapşırıq və tövsiyələri əsasında respublikamızda aparılan sosial-iqtisadi islahatlardan, əldə olunan nailiyyətlərdən danışaraq qurumun fəaliyyətinin ISO 9001 və ISO 37001 beynəlxalq standartlarının tələblərinə uyğunlaşdırılması məqsədilə mərhələli şəkildə həyata keçirilən işlərdən danışıb. Rayon rəhbəri qeyd olunan standartların tətbiqinin icra hakimiyyətinin fəaliyyətində idarəetmənin effektivliyinin artırılmasına və vətəndaş məmnunluğunun təmin edilməsinə əhəmiyyətli töhfə verəcəyini bildirib.
Tədbirin sonunda ABŞ-nın “STAREGISTER” təşkilatının Azərbaycandakı yerli təmsilçisi, İNCERT şirkətinin rəhbəri Şamo Muradov tərəfindən Göygöl Rayon İcra Hakimiyyətinə ISO 9001:2015 – “Keyfiyyəti idarəetmə sistemləri” və ISO 37001:2016 – “Antikorrupsiya idarəetmə sistemi” beynəlxalq standartları üzrə sertifikatlar təqdim olunub.
Hamlet QASIMOV,
“Xalq qəzeti”nin bölgə müxbiri