Azərbaycan Mərkəzi Bankının (AMB) proqnozlarına görə, 2023-cü ilin sonunda ölkədə ÜDM artımı 1,8-2 faiz civarında olacaq.

Bu barədə AMB-in sədri Taleh Ka­zımov Milli Məclisin İqtisadi siyasət, sənaye və sahibkarlıq komitəsinin icla­sında deyib.

İl ərzində qeyri-neft ÜDM-in artım tempinin 5,7 faizə çatacağını bildirən T. Kazımov bildirib ki, aprel ayında ölkə­də ÜDM 0,1 faiz, qeyri-neft ÜDM-i isə 3,7 faiz artıb. O, aprel ayında inflyasi­yanın səviyyəsinin 12,8 faiz olduğunu narahatedici məqam kimi xarakterizə edərək vurğulayıb ki, burada əsas ər­zaq qiymətlərinin artımıdır. “Aprelin proqnozlarına görə, ilin sonunda illik inflyasiya 8,3 faiz olacaq. Yanvar ayının inflyasiya proqnozu isə 7,9 faiz olub”,–deyə T. Kazımov əlavə edib.

Bank sədrinin sözlərinə görə, cari ilin aprel ayında ölkənin valyuta ehtiyat­ları 12 faiz ataraq 66 milyard ABŞ dol­larına, AMB-nin ehtiyatları isə 2,2 faiz artaraq 9,2 milyard ABŞ dollarına çatıb.

T. Kazımov onu da bildirib ki, maliy­yə sektorunun kredit portfeli 20 milyard ABŞ dollarına çatıb, depozit bazası 5 faizdən çox artıb.

Ötən müddətdə sığorta sektorunun ödənişlərində artım müşahidə edildiyini bildirən bank sədri diqqətə çatdırıb ki, ilin əvvəlindən sığorta haqları 30 faiz, ödənişlər 33 faiz artıb. Bununla yana­şı, ölkənin qiymətli kağızlar bazarında da müsbət inkişaf müşahidə olunub. Bu barədə məlumat verən T. Kazımov deyib ki, hazırda korporativ istiqraz və səhmlər üzrə 8 faiz, dövlət qiymətli ka­ğızlarında isə 15,6 faiz artım var.