Maraqlı bir atalar sözü var. Deyir “suçıxmaz arxa cuvar qoydular, adımı da qoydular yarıtmaz”. Deyəsən Şəmkirdə tezliklə bu atalar sözü arxaik sözə çevriləcək. Hiss olunur ki, Azərbaycanın bu ən böyük kənd təsərrüfatı rayonunda suvarmada nə cuvara ehtiyac qalacaq, nə də əziyyət çəkib əllə iş görən digər adamlara. Çünki rayonda bu sahənin inkişafı üçün kompleks iş aparılır, fermerlərə hərtərəfli dəstək göstərilir, onların təklifləri dinlənilir, problemlərinin aradan qaldırılması üçün səmərəli tədbirlər həyata keçirilir.
Bu işdə rayona təkan verən, kənd təsərrüfatının inkişafında xüsusi rolu olan təşkilatlardan biri də "Azərşəkər" MMC-dir.
İndi qeyd edəcəyimiz faktlar ilk baxışda quru rəqəmlər təsiri bağışlasa da onların arxasında çox məqsədyönlü işin dayandığını, yuxarıda qeyd etdiyimiz “cuvar”, “arx” söhbətinin təsadüfi olmadığını ortaya çıxarır. Diqqət yetirin, indiyədək bu müəssisənin təsərrüfatlarında 6 kilometrdən çox elektrik xətti çəkilib, 16 min kilovoltluq yarımstansiya tikilib, 3 ədəd 1000 kilovoltluq transformatorlar quraşdırılıb. Eyni zamanda 15,3 kilometr uzunluğunda su xətti çəkilib, müvafiq olaraq 65, 250, 500 min kubmetrlik su tutarları tikilib.
"Azərşəkər" MMC-nin tərkibində olan təsərrüfatda 758,6 hektar sahədə yeni pivot quraşdırılıb. Amma bütövlükdə o cür pivot sahəsi 1430 hektara çatır. Bundan başqa 40 hektar ərazidə damlama, 17,2 hektar sahədə isə sprinkler sistemindən istifadə olunur. Həmçinin pivota ilk dəfə olaraq yeni texnologiya- draqonlayn sistemi qoşulub ki, pivotu damla suvarma sistemi kimi idarə edir və nəticədə suya qənaət iki dəfə azalır. Sistem suyu birbaşa bitkinin dibinə yönləndirir…Bax, burada cuvar istər-istəməz yada düşür. Bu yaxınlarda rayonların birində cuvarların necə əziyyətlə sahəni suvarmalarının şahidi oldum. Üstəlik sahibkar səsini cuvara qaldırırdı ki, “toxumu su yuyub apardı”, “cərgənin biri suvarılmadı…” və sair.
İndi pivotaltı sahələrdən yığılmış məhsula baxın. Keçən il 130 hektar ərazidən 773 tona yaxın buğda, 165,7 hektar ərazidən 851,4 ton arpa, 74,9 hektar ərazidən isə 151,8 ton soya məhsulu yığılıb. Məlumat üçün bildirək ki, soya 25 hektar ərazidə damlama sistemi ilə də əkilmiş, həmin ərazilərdən isə 54 min 200 ton məhsul əldə olunub.
Eyni zamanda 197,95 hektar ərazidən 1179,8 ton qarğıdalı, 161,55 hektar ərazidən isə 1326,050 ton çuğundur toplanıb, 65,2 hektar əraziyə isə yonca əkilib.
Amma bu üsulu tətbiq etdikdən sonra çəkilib kənarda dayanmayıblar. Üstəlik, əkilmiş ərazilərdəki bitkilərdə təhlükəli xəstəliklərin aşkarlanması məqsədilə müəssisənin mütəxəssisləri tərəfindən monitorinq keçirilib.
Beləcə, ötənilki əkin mövsümündə tətbiq edilən ən son texnologiya, yeni yanaşma sayəsində yüksək məhsuldarlıq əldə edilib, arpa və buğda sahələrində orta məhsuldarlıq 6 ton olub.
Bu müəssisənin texnikasına söz ola bilməz. Hərçənd özləri deyir ki, hələ azdır, bir qədər də modernləşdirəcəyik. Amma təsərrüfatlarda istifadə olunan “Mzuri” texnikası ilk dəfə olaraq “Azərşəkər” MMC-nin Ceyrançöl ərazisində yerləşən aqroparkında təkrar qarğıdalı və soya əkini zamanı istifadə edilib.
Bu texnikanın üstün cəhəti dörd prosesi (dərin yumşaltma, dərinlik boyu gübrə emalı, müxtəlif çeşidli toxumların dəqiq səpini və bərkidici çarxlarla toxumların üstünün basdırılması) eyni anda görməsidir. Sözügedən texnikanın istifadəsində məqsəd su ehtiyatına qənaət edilməsi, torpağın münbit qatının qorunub saxlanması və havaya buraxılan zəhərli qazların təsirinin aradan qaldırılmasıdır.
Eyni zamanda ötən il ölkəmizdə ilk dəfə olaraq “Azərşəkər” MMC-nin Ceyrançöl təsərrüfatında şəkər çuğundurunun yığılmasında “Ropa Maus” texnikasından da istifadə edilməsinə başlanılıb. Bu texnikanın tətbiqi yığım sürətinin 2 dəfə artırılmasına və vaxta qənaət edilməsinə gətirib çıxarıb. “Ropa Maus” texnikası saatda təxminən 400 tona yaxın məhsul yığmaq gücünə malikdir.
Şəmkirdə adıçəkilən cəmiyyətlə sıx əməkdaşlıq onu göstərir ki, hansı rayonda yeniliklərə, müasirliyə “yaşıl işıq” yandırılır, dünyada mövcud qabaqcıl texnologiya uğurla tətbiq edilir, o zaman istənilən nəticəni almaq mümkündür.
Rayonda müasir suvarma sistemlərindən, digər mütərəqqi üsullardan istifadə etməklə kənd təsərrüfatında ciddi dönüş yaradılacağına əmindirlər. Bu il cəmiyyət 2000 hektar ərazinin əkilməsini planlaşdır. 2023-cü ildə pivotaltı sahələrin 322,6 hektarında buğda, 341,8 hektarında arpa, 88,6 hektarında soya, 228,3 hektarında qarğıdalı, 421,6 hektarında isə şəkər çuğunduru əkilməsi nəzərdə tutulub.
Şəmkirin respublikada ən qabaqcıl rayonlar sırasına çıxması üçün bütün imkanlar var. Yəqin ki, rayonda hədəfin bu olması məqsədə çatmağı tezləşdirəcək.
Hamlet QASIMOV,
“Xalq qəzeti”nin bölgə müxbiri
Şəmkir