Paris Olimpiadasında mübarizə aparacaq boksçuların siyahısı hazırdır. Tailandın paytaxtı Banqkokda keçirilmiş II Dünya Olimpiya Təsnifat Turnirində daha 2 boksçumuz uğurla çıxış edərək Olimpiadada təmsil olunmaq hüququ qazandı. Bununla da, dördilliyin ən mötəbər idman yarışında iştirak edəcək boksçularımızın sayı 5-ə çatdı.
Xatırladaq ki, dünyanın yalnız 3 ölkəsi lisenziya sayında Azərbaycandan irəlilədir. Özbəkistan və Qazaxıstan yarışda maksimal – 7, Avstraliya 6 çəkidə iştirak edəcək. Lisenziya sayı baxımında ilk 5-likdə yer alan ölkəmiz, Kuba kimi boks lideri ilə eyni göstəriciyə nail olub. Olimpiadalarda lider mövqeyi ilə seçilən ABŞ-ın isə cəmi 4 lisenziyası var.
Düzdür, yarışda boksçularımızın yekun göstəriciləri daha önəmlidir.
Olimpiadaya vəsiqəni son yarışda qazanan Alfonso Dominqes (92 kq) “Tokio-2020”nin bürünc medalçısı olmuşdu. O, Yaponiya bürüncünü Fransada qızılla əvəzləmək istəyir:
–Tokio Oyunlarındakı 3-cü yeri, Parisdə 1-ci mükafata çevirmək istəyirəm. Fransanın paytaxtından yaxşı nəticələrlə dönəcəyimizə inanıram. Həm özümə, həm komandama inanıram.
Vəsiqəni son yarışda qazanan digər boksçumuz Malik Həsənov (63,5 kq) da Olimpiadada yüksək mükafata iddialıdır. Lisenziya mübarizəsinin olduqca yüksək rəqabət şəraitində keçdiyini deyən rinq ustası Paris Oyunlarında ən yüksək pilləyə qalxmaq arzusunda olduğunu dedi:
–“Olimpiya Təsnifat Turnirində mənim çəkimdə 80-ə yaxın ölkənin boksçusu mübarizə aparırdı. Onlardan yalnız 5-i Olimpiadaya vəsiqə qazandı. 4 döyüşdə qələbə qazanıb, lisenziyanı təmin etdim. Qarşıdakı hədəf Olimpiya çempionluğudur. “Paris-2024”də idman tariximizə yeni qələbə səhifəsi yazmaq istəyirəm.
Millimizin üzvlərindən Nicat Hüseynov (51 kq) I Dünya Olimpiya Təsnifat Turnirində Parisə vəsiqə qazanıb. İkiqat Avropa çempionu da açıqlamasında Fransanın paytaxtındakı mötəbər yarışda yalnız çempionluq barədə düşünəcəyini dedi. Polşada keçirilmiş III Avropa Oyunlarında Olimpiadada iştirak hüququ qazanmış Dünya çempionatının ikiqat bürünc mükafatçısı Məhəmməd Abdullayev (+92 kq) və Avropa Oyunlarının mükafatçısı Murad Allahverdiyev (81 kq) də Parisdən mükafatsız qayıtmayacaqlarını iddia edirlər.
Beləliklə, millimizin hər bir üzvü ən mötəbər multiidman yarışından Vətənə yüksək mükafatla qayıtmaq arzusundadır.
Yığmamızın baş məşqçisi Pedro Roke nəticənin yaxşı olması üçün əllərindən gələni edəcəklərini dedi. Qeyd edək ki, 2016-cı ildə Lorenzo Sotomayor məhz onun rəhbərliyi ilə Olimpiadada Azərbaycan yığmasına gümüş medal qazandırmışdı. Bu, rekord nəticə idi. Bəs Parisdə necə? Ən yüksək göstərici qazana bilərikmi?
Pedro Roke jurnalistlərə açıqlamasında əsas hədəfin qızıl medal olduğunu dedi:
–2016-cı ildə mənim rəhbərliyim ilə Azərbaycan yığması Olimpadada gümüş medal qazandı. Əsas hədəf həmin medal əyarını yüksəltməkdir. Bunun üçün potensialımızdan tam istifadə etməliyik. Komandamızın uğur qazanması üçün hər cür şərait yaradılıb. Biz də üzərimizə düşən vəzifənin öhdəsindən gəlmək üçün bütün gücümüzü toplayacağıq.
Onu da qeyd edək ki, Parisdə, dünyanın 48 ölkəsindən, ümumilikdə, 121 kişi boksçu mübarizə aparacaq. Onlardan yalnız 48 boksçu Avropanı təmsil edir. “Köhnə qitə”nin cəmi 20 ölkəsi Olimpiya lisenziyası qazana bilib. Avropa rinqinin lideri olduğunu sübut edən millimiz qitədə 1-ci yerə şərikdir. Ölkələrdən, yalnız İspaniyanın Azərbaycan qədər – 5 vəsiqəsi var.
Ümid edirik ki, boksçularımız Paris Olimpiadasında da yüksək nəticə qazanıb, Vətənə lider komanda kimi qayıdacaq.
Leyla QURBANOVA
XQ
.jpg)
