Azərbaycanın idman ictimaiyyəti sevimli bayramını – 5 Mart Bədən Tərbiyəsi və İdman Gününü böyük təntənə ilə qeyd edir. Bu əlamətdar tarix münasibətilə fevralın 28-də start götürən “İdman həftəsi” böyük coşqu ilə davam edir.
Respublikamızın demək olar ki, bütün regionlarında müxtəlif idman növləri üzrə təşkil edilən kütləvi idman tədbirləri arasında “Qürurla irəli!” şüarlı Xankəndi–Bakı ultramarafonunun təşkili tarixi anlar kimi, xüsusilə, diqqət mərkəzində oldu. Azərbaycanın dilbər guşələrindən biri olan Xankəndidə martın 29-da startı verilən, idmançılarımızla yanaşı, digər ölkə təmsilçilərinin də qatıldıqları yarış hər bir azərbaycanlı üçün əsl qürur mənbəyinə çevrildi.
Marafon iştirakçıları Xankəndi–Yevlax, Yevlax–Ucar, Ucar–Hacıqabul, Hacıqabul–Qobustan mərhələlərindən sonra martın 4-də Qobustan–Bakı marşrutu üzrə 55 kilometr məsafəni qət edərək Bakıya çatıblar. Onları idman ictimaiyyətinin nümayəndələri, eləcə də idmansevərlər böyük coşqu ilə qarşılayıblar.
Sonuncu – beşinci mərhələdə Artyom Əliyev finiş xəttini hamıdan birinci keçərək həm Qobustan – Bakı marşrutunun, həm də 380 kilometrlik ümumi ultramarafonun qalibi olub. Yadigar Hüseynov yarışı ikinci, Seymur Şahbazov isə üçüncü tamamlayıb.
A.Əliyev jurnalistlərə açıqlamasında uğurunu şəhidlərə həsr etdiyini bildirib:
– Yarış çox gözəl təşkil olunmuşdu. Atletlərimiz bir ailə kimi həm səmərəli məşq keçdilər, həm də yarışdılar. Bu qələbəni şəhidlərimizə həsr edirik.
Belə bir tarixi marafonun qalibi olmaqdan iftixar hissi keçirdiyini bildirən A.Əliyev yarışın hər günündə, hər dəqiqəsində şəhidləri yad etdiklərini deyib.
Xankəndi–Bakı ultramarafonunda 2-ci yeri tutan atlet Yadigar Hüseynov son iki mərhələdə fərqlənib. 5 mərhələdən ibarət yarışın Hacıqabul–Qobustan (70 km) və Qobustan–Bakı (55 km) mərhələsinin daha çətin keçdiyini vurğulayıb:
– Marafon yüksək səviyyədə təşkil olunmuşdu. Belə bir yarışda iştirak etmək bizim üçün böyük şərəf idi. Son 2 mərhələ daha çətin oldu. Çünki əsasən yüksəkliyə doğru qaçmağa başladıq.
Bu, təkcə bizim qələbəmiz deyil. Bizim üçün həyəcan keçirən, izləyən, eyni zamanda, təşkilatçıların və bütün xalqın uğurudur.
Marafonda ümumi hesabda 3-cü olan Seymur Şahbazov yarışın əvvəlindən sonuna qədər mübarizə aparmağı düşündüyünü deyib:
– 8 ildir həvəskar olaraq atletika ilə məşğul oluram. 380 kilometr məsafəni qət etmək üçün xüsusi hazırlıq keçməmişəm. Əlbəttə, bu məsafəni qət etmək rahat deyil. Peşəkar bir şəkildə yarışa hazırlaşmasam da, mükafatçılar sırasında yer ala bildim. Bu, mənim üçün böyük bir nəticədir.
Gənclər və idman naziri Fərid Qayıbov jurnalistlərə açıqlamasında Xankəndi–Bakı ultramarafonunda iştirakçıların 380 kilometr məsafəni qət etdiklərini qeyd edib. Nazir idman ictimaiyyətini 5 Mart Bədən Tərbiyəsi və İdman Günü münasibətilə təbrik edib:
– Hər il olduğu kimi, idman həftəsi çərçivəsində çoxlu tədbirlər keçiririk. Bununla insanları idmana daha çox cəlb etmək istəyirik. Ölkəmiz artıq suverendir. Qarabağda, Xankəndidə tədbirlər keçirə bilərik. Ötən il futbol üzrə Azərbaycan Kubokunun bir oyunu Xankəndidə təşkil olunmuşdu. Ultramarafonda 60-dan çox idmançı iştirak edirdi. Yarışa Meksikadan və qardaş ölkə Türkiyədən iştirakçılar dəvət etdik. Təbii ki, hamı axıra kimi qaça bilmədi. Çətin marafondur.
Azərbaycan Atletika Federasiyasının vitse-prezidenti, Milli Məclisin deputatı Könül Nurullayeva ilk dəfə “Qürurla irəli” şüarı ilə təşkil edilən Xankəndi–Bakı ultramarafonunun əhəmiyyətini yüksək qiymətləndirib. O, yarışın qədim diyarımız Xankəndidən start götürməsinin yeni bir tarix olduğunu bildirib:
– Bu gün tarixi bir gündür. Marafonun işğaldan azad olunan Xankəndidən start götürməsi möhtəşəmdir. 30 ildən sonra işğaldan torpaqlarımızı azad etmişik. Bütöv, suverenliyi bərpa olunan Azərbaycanın övladlarıyıq. Bir vətəndaş olaraq qürur hissi keçirirəm. Ali Baş Komandan İlham Əliyevin, eləcə də şəhid və qazilərimizin sayəsində biz torpaqlarımızı işğaldan azad etdik. Onların hesabına bu tarixi günə şahidlik edirik. Azərbaycan xalqı hər zaman birlik nümayiş etdirib. Xalqımız azadlıq uğrunda canlarını qurban verən şəhidlərimizin qəhrəmanlıq mübarizəsini hər zaman böyük hörmət və ehtiramla yad edir. Ən önəmlisi xalqımızın birliyi, milli iradəsi olmasaydı, biz bu gün Xankəndidən Bakıya marafonun, tarixi günün şahidi ola bilməzdik.
Ötən illər ərzində dəfələrlə marafonlarda uğurla iştirak edən Ayla Seyid də yarış iştirakçılarını qarşılayanlar arasında idi. Yarış barədə təəssüratlarını bildirən xanım atlet Xankəndi – Bakı ultramarafonunun digərlərinə bənzəmədiyini bildirdi:
– Fərqli hisslər yaşayırıq. Bu tarixi anlara şahidlik etdiyimiz üçün qürurluyuq. Bu, adi yarış deyildi. Ötən günlər ərzində keçirdiyimiz sevinc hisslərini sözlə ifadə etmək çətindir.
Yarışın 57 yaşlı xanım iştirakçısı Gülparə Əliyeva ilk dəfədir ki, marafonda iştirak edir:
– Ən böyük arzumu reallaşdırdım. Belə bir yarışda iştirak etmək unudulmaz hisslər bəxş edir. Vətənimizin hər qarışı gözəldir. Marafonun Azərbaycanın cənnət guşələrindən biri olan Xankəndidən start götürməsi dillə ifadə edilməyəcək dərəcədə xoş hissdir.
Sonra Xankəndi – Bakı ultramarafonunun mükafatlandırma mərasimi keçirilib.
Qaliblərə mükafatları gənclər və idman naziri Fərid Qayıbov, Azərbaycan Atletika Federasiyasının prezidenti Cavid Qurbanov və Milli Olimpiya Komitəsinin baş katibi Azər Əliyev təqdim ediblər.
Dünən “İdman həftəsi” çərçivəsində həmçinin, dövlət qurumlarının əməkdaşları arasında nərd yarışı keçirilib. Şəhid və qazi övladları üçün buz üzərində ustad dərsləri də maraqlı mübarizə şəraitində baş tutub.
Qeyd edək ki, “İdman həftəsi” çərçivəsində tədbirlər bu gün Quba şəhərində idman paradı ilə başa çatacaq.
Leyla QURBANOVA
XQ
