Gimnastlarımız 1 qızıl, 1 gümüş medal qazanıblar
Azərbaycanda daha bir nüfuzlu yarış – batut gimnastikası və tamblinq üzrə Dünya kuboku uğurla keçirildi. Milli Gimnastika Arenasında təşkil edilən və Paris Yay Olimpiya Oyunlarına təsnifat xarakteri daşıyan yarışda 32 ölkənin təmsilçiləri öz aralarında ən güclüləri müəyyən etmək üçün gərgin mübarizə apardılar. Yüksək rəqabət şəraitində keçən yarışda azarkeşlər 1 qızıl, 1 gümüş medal qazanan Azərbaycan idmançılarının uğurlarına bir daha şahidlik ediblər.
Tamblinq üzrə yarışda Mixail Malkinin bütün rəqiblərini geridə qoyaraq qızıl medal qazanması idmançımızın güclü potensialını bir daha ortaya qoyub. İlk finalda daha çətin kombinasiya etməyi planlaşdıran təmsilçimizin çıxışı zəif olsa da, bu, ona ilk dördlüyə düşmək və qələbə uğrunda mübarizə aparmaq üçün kifayət edib. Mixail Malkin müsahibəsində bildirib ki, dünya çempionatında ona qələbə gətirən elementləri yarışda icra edəcəyini planlaşdırsa da, onların mürəkkəbliyi onu bir qədər düşündürüb:
–Bu elementlər mürəkkəb olduğu üçün dəqiq icra edilməlidir. Həm də, iki ay yarım idi ki, onu etmirdim. Məşqçim Adil Hüseynzadə mənə proqramı səhvsiz yerinə yetirməyi məsləhət görmüşdü. Əvvəlcə onunla razılaşdım, lakin bir neçə dəqiqədən sonra onun yanına qayıtdım və dedim: “Gəlin, cəhd edək!” O, bir neçə saniyə düşündü və dedi: “Mişa, et! Mən tamblinq cığırının yanında dayanacağam və inanıram ki, sən bunu bacaracaqsan”.
Şübhəsiz, belə nüfuzlu yarışlarda idmançıların çıxışları psixoloji cəhətdən də çətin olur. Bütün bunlara baxmayaraq Avropa və ikiqat dünya çempionu olan, Avropada 2023-cü ilin ən yaxşı gimnastı adını qazanan təmsilçimiz hamıdan güclü olduğunu bir daha sübuta yetirib. M.Malkinin indi əsas hədəfi bir aydan sonra Portuqaliyanın Gimarayeş şəhərində təşkil olunacaq Avropa çempionatında da ölkəmizi layiqincə təmsil etməkdir. Gimnast qitə çempionatında da qızıl medal uğrunda mübarizə aparacaq.
Komandamızın digər üzvü Adil Hacızadə isə Dünya kubokunda gümüş medala sahib olmaqla böyüklər arasında ilk medalını qazanıb. Tamblinqçimiz yarışla bağlı təəssüratlarını bölüşərkən fəxri kürsüyə yüksəlmək üçün bütün gücünü sərf etdiyini deyib:
– Düşünürdüm ki, elə bir proqram icra edim ki, həm onu dəqiq yerinə yetirim, həm də yaxşı xal qazanım. Yarışın gedişində rəqiblərin çıxışını izləyərkən fikrim dəyişdi. Həlledici çıxışdan əvvəl elementləri çətinləşdirməyi qərara aldım. Sevinirəm ki, çıxışım uğurlu oldu.
A.Hacızadə Dünya kubokunda azarkeşlərin dəstəyinin ona xüsusi güc və inam bəxş etdiyini deyib:
–Doğma divarlar arasında ikiqat həyəcan və böyük məsuliyyət hiss edirsən. Üstəlik, səni ürəkdən dəstəkləyən azarkeşləri sevindirmək gözəl duyğudur. Dünyanın güclü gimnastları arasında uğurla çıxış edib, ölkəmizi layiqincə təmsil etdiyimə görə qürur hissi duyuram.
Yarışda qalib və mükafatçılarla yanaşı, həm kişilər, həm də qadınlar arasında fərdi proqramda batut gimnastikası və tamblinq üzrə ən yüksək icra xalı, eləcə də ilk dəfə olaraq batut gimnastikası üzrə sinxron proqramda ən yüksək sinxron xalı toplayan gimnastlar “AGF Trophy” kuboku ilə təltif ediliblər.
Leyla QURBANOVA
XQ
