Azərbaycan idmanında xoş ənənə formalaşıb. Hər il idmanın inkişafında xidmətləri olan ictimaiyyət nümayəndələrinin bir qrupu təltif edilir. 2023-cü ilin idman yekunları ilə bağlı təşkil olunmuş mərasim xüsusilə tarixi hadisə ilə əlamətdar olub.
Dekabrın 21-də Xankəndi stadionunda Prezident İlham Əliyevin 2023-cü ilin idman yekunları ilə bağlı mərasimdə idmançılarla görüşü idman ictimaiyyətini, xalqımızı qürurlandırdı. Dövlətimizin başçısının “Mən sizi buraya dəvət etməklə sizə öz münasibətimi, hörmətimi bildirmək istəmişəm. Bu görüşü biz Bakıda da keçirə bilərdik. Ancaq hesab etdim ki, bu görüşün burada keçirilməsi və sizə bu yüksək mükafatların burada verilməsi tam ədalətli olacaqdır”, – fikirləri idmançılarımızın nailiyyətlərinə verilən çox böyük dəyərdir.
İdmançılarla ənənəvi görüşün Xankəndidə, özü də uzun illərdən sonra işğaldan azad edilən ərazilərdə ilk dəfə keçirilən tarixi futbol yarışı zamanı təşkil edilməsi mühüm əhəmiyyət daşımaqla yanaşı, həm də dərin mənası var. Bu böyük hadisə nəinki xalqımız, dövlətimiz, həmçinin dünya tarixində əbədi qalacaq, yaddaşlara həkk olunacaq.
Azərbaycan Respublikası Prezidentinin fərdi təqaüdünə layiq görülən Eldəniz Əzizli “Xalq qəzeti”nə ali mükafatın məhz Xankəndidə təqdim edilməsinin onda unudulmaz təəssüratlar yaratdığını dedi:
– Azərbaycan Prezidenti İlham Əliyev həmişə idmançıların yanında olub və bu diqqət, qayğı bizim üçün böyük stimuldur. Dövlətimizin başçısının idmançılarla məhz Xankəndidə, işğaldan azad olunmuş dədə-baba torpaqlarımızda ilk futbol yarışında görüşü çox gözəl motivasiya oldu. Güləş karyeramda mənə ən ali mükafat qədim yurdumuz Xankəndidə təqdim edildi.
Vətənimizin gözəl diyarı – Xankəndini bu gün azad görmək qürurvericidir. Bu böyük şərəfi, qüruru bizə yaşadan Müzəffər Ali Baş Komandan İlham Əliyevə, şanlı Ordumuza, şəhidlərimizə borcluyuq. Bundan sonra daha səylə çalışıb, ölkəmizi layiqincə təmsil etməliyik. Azərbaycanın adını ucaltmaq hər birimizin ən ümdə vəzifəsidir.
Bu il dünya çempionatının qalibi olmaqla müstəqillik tarixində yunan-Roma güləşi üzrə ilk dəfə üçqat dünya çempionu titulunu qazanan Eldəniz Əzizli sonra 2023-cü ilin onun üçün çox uğurlu keçdiyini bildirdi:
– Bu ilin birinci yarısında istədiyim nəticələri əldə edə bilmədim. Düzdür, Avropa çempionatında gümüş medal qazandım. Amma yarışa çempion olmaq üçün getmişdim. İlin ikinci yarısında dünya çempionatında qalib olmağı qarşıya məqsəd qoymuşdum. Yunan-Roma güləşi üzrə müstəqil Azərbaycanın ilk üçqat dünya çempionu adına layiq görülməyim yeni bir rekorddur.
“Tərəqqi” medalı ilə təltif edilən Azərbaycan Atletika Federasiyasının icraçı direktoru Kamal Əhmədov:
– 2023-cü il Azərbaycan idmanı üçün çox uğurlu keçdi. Bu il ərzində böyük yarışlar keçirdik. “Heydər Əliyev İli”, ulu öndər Heydər Əliyevin 100 illik yubileyi, eləcə də, Azərbaycan atletikasının 1 əsrlik tarixi ilə əlaqədar tədbirlər təşkil edildi. Atletikanın inkişafı istiqamətində Azərbaycan Atletika Federasiyası tərəfindən məqsədyönlü işlər görülür və bu, öz bəhrəsini verir.
Kamal Əhmədov ilin idman yekunları ilə bağlı mərasimin Xankəndidə, tarixi futbol oyunu zamanı təşkilinin idman ictimaiyyəti üçün böyük şərəf olduğunu bildirdi:
– Dekabrın 21-də dünyanın harasında yaşamasından asılı olmayaraq bütün azərbaycanlıların ürəyinin döyündüyü Xankəndi stadionunda – “Qarabağ”–MOİK tarixi matçı zamanı Azərbaycan Prezidenti İlham Əliyevin idmançılarla görüşməsi, mükafatların təqdim edilməsi bizim üçün böyük şərəf idi. Bu gün qalib ölkənin qalib vətəndaşı olmaqdan hər birimiz böyük qürur hissi keçiririk. İşğaldan azad olunmuş ərazilərimizdə quruculuq işlərinin vüsəti heyrət doğurur. Ali Baş Komandan İlham Əliyevin qətiyyəti, siyasi iradəsi, müzəffər Ordumuzun şücaəti, qəhrəmanlığı, qorxmaz, qəhrəman əsgərlərimizin canı-qanı bahasına qazandığımız böyük Zəfərlə hər birimiz fəxr edirik. İdmançılarımız beynəlxalq arenalarda Azərbaycanı yüksək səviyyədə təmsil etmək, daha uca zirvələr fəth etmək üçün bundan sonra daha əzmlə mübarizə aparacaqlar.
Leyla QURBANOVA
XQ