Kəlbəcər tezliklə ölkə turizminin qaynar ünvanı olacaq
Kəlbəcər rayonunun ərazisi müxtəlif təbiət abidələri, rəngarəng bitki və heyvan aləmi, yeraltı və yerüstü sərvətləri ilə zəngindir. Relyefinə görə ərazisi dağlar, vadi və düzənliklərdən ibarətdir. Rayonda dünya əhəmiyyətli memarlıq və arxeoloji abidələr var. Bundan başqa, komfort iqlim, mineral sular insanların müalicə və istirahətinin səmərəli keçməsinə imkan yaradır. Bunlar ən maraqlı turizm xidmətlərinin qurulmasına, rekreasiya zonalarının yaradılmasına imkan verir.
Kəlbəcər rayonunda 5 yerdə turizm və rekreasiya zonalarının yaradılması nəzərdə tutulur. Dövlət Turizm Agentliyinin regional turizm və mədəni irs şöbəsinin müdiri Elgün Cavadov mediaya açıqlamasında bildirib ki, həmin zonalar Vəng, İstisu, Zülfüqarlı, Sultan-Heydər və Dəmirçidam adlı ərazilərdə təşkil ediləcək. Həmin ərazilərin zəngin turizm potensialını təqdim etməklə bir sıra layihələr həyata keçirləcək. Müasir tələblərə cavab verən turizm infrastrukturu qurulacaq. Turizm sektorunun inkişafı bu bölgənin iqtisadi baxımdan tez bir zamanda dirçəlməsinə müsbət təsir göstərəcək, Kəlbəcərin iqtisadi dirçəlməsinə töhfə verəcək.
Yuxarıda qeyd edildiyi kimi, rekresiya zonalarından birinin İstisu ərazisində yaradılması nəzərdə tutulur. Bu ərazi mineral su mənbələri ilə zəngindir. Yuxarı və Aşağı İstisu bulaqları müalicəvi əhəmiyyətə malikdir. Tərkibinin zənginliyinə görə, Çexiyanın məşhur Karlovı Varı mineral suyundan üstündür.
1990-cı illərədək burada “İstisu” kurort-müalicə sanatoriyası fəaliyyət göstərib. Hər il burada 50 min nəfər mədə-bağırsaq, sinir sistemi, ginekoloji, uroloji və s. xəstəliklərə görə müalicə olunub. Mineral bulaqların suyundan alınan duzlar xroniki qəbizlik, qastrit kimi xəstəliklərin müalicəsində də işlədilib. Hətta orada mineral sudoldurma zavodu da fəaliyyət göstərib.
Mütəxəssislərin qiymətləndirmələrinə görə, “Yuxarı İstisu” yatağında gündəlik mineral su hasilatı 867 kubmetr, “Aşağı İstisu” yatağında isə 748 kubmetrdir. Ermənistan silahlı qüvvələrinin işğalı dövründə həmin yataqların infrastrukturu tamamilə dağıdılıb, istifadəyəyə yararsız vəziyyətə salınıb.
Artıq o dövr arxada qalıb. Kəlbəcər rayonu 3 ildir ki, düşmən işğalından azad edilib. Hazırda rayon ərazisində təmir-bərpa işləri həyata keçirilir, yollar, tunellər çəkilir, su elektrik stansiyaları istifadəyə verilir. Bunlarla bərabər, məşhur “İstisu” sanatoriyasının yenidən qurulması da nəzərdə tutulur. Gələcəkdə həmin müəssisənin istifadəyə verilməsi ilə sağlamlıq turizmi yeni mərhələyə qədəm qoyacaq. Bu, orada yaşayan əhalinin işlə təmin olunmasına, eyni zamanda, rayon iqtisadiyyatına böyük töhfə verəcək.
“Yuxarı İstisu”, “Aşağı İstisu” yataqlarından istifadə olunmaqla mineral su istehsalının təşkili də həyata keçiriləcək. Burada suyun yenidən qablaşdırılaraq respublikanın bütün bölgələrinə və xarici ölkələrə ixrac etməklə Azərbaycan hər il milyonlarla valyuta əldə edə biləcək. Layihələrin dövlət-özəl sektor tərəfdaşlığı çərçivəsində gerçəkləşdirilməsi nəzərdə tutulub. “İstisu” sanatoriyasının yenidən qurulması ilə Azərbaycanda sağlamlıq turizm bazarının hərəkətə gətiriləcəyi gözlənilir. Bu isə insanlarda regiona marağı daha da artıracaq.
Qeyd edək ki, adları çəkilən yataqların potensial ehtiyatı, yerləşdikləri ərazinin təbiətinin cəlbediciliyi kurort-müalicə kompleksinin yaradılması ilə yanaşı, turizm sektorunun digər sahələrinin də inkişafına təkan verəcək. İlk növbədə İstisu ərazisində qış turizmi üçün əlverişli iqlim şəraiti var. Üstəlik, burada müalicəvi əhəmiyyətli bitkilər çoxdur. Sakinlər həmin bitkiləri yığıb turistlərə rahatlıqla sata biləcəklər. Bu isə həm də onların sosial rifahının daha da yaxşılaşmasına şərait yaradacaq.
İstisuda turizm marşrutlarının təşkili də mümkündür. O cümlədən ekoturizm, dağa dırmanma, piyada turizm marşrutları kimi böyük potensialı var. Bunlar sahibkarlıq subyektlərinin, istehsal, xidmət, tədarük sahələrinin fəaliyyətini güçləndirəcək, yerli sakinlərin qayıdışını sürətləndirəcək. Artıq bu prosesə başlanıb. Kəlbəcər rayonuna 150 məcburi köçkün ailəsinin köçürülməsinə hazırlıq görülür.
Şübhəsiz ki, yaxın gələcəkdə bütün bu məsələlər həll edildikdən sonra İstisu Azərbaycan turizmində öz yeri ilə seçiləcək, nəinki regionda, həm də dünyada tanınacaq, bölgənin cəlbedici turizm istiqamətlərindən birinə çevriləcək.
Pünhan ƏFƏNDİYEV
XQ