Atıcılıq üzrə dünya çempionatı davam edir. Dünən kişilər arasında 50 metr məsafəyə tüfəngdən uzanaraq atəş açma yarışında qalib və mükafatçılar müəyyənləşib. Bütün rəqibləri geridə qoyan çexiyalı Pyotr Nimburski 626.5 xal toplayaraq qızıl medala sahib olub. Gümüş medala 625.2 xalla Çindən olan atlet Du Linşu yiyələnib. Bürünc medala isə 625 xalla İsveçrəni təmsil edən Yan Loxbihler sahib olub.
Komanda yarışında isə Norveç birinci, Almaniya ikinci, Çin üçüncü olub.
Yarış kişilər arasında 25 metr məsafəyə tapançadan cəld atəş növündə davam edib.
40 atışdan 39-nu dəqiq yerinə yetirən çinli Li Yuehonq dünya rekordunu yeniləyərək qızıl medala sahib olub. Gümüş medala fransalı atlet yiyələnib. Klement Bessaq 30 dəqiq atışla diqqət çəkib. Bürünc medalı isə Almaniyanı təmsil edən Florian Peter qazanıb (24 dəqiq atış).
Komanda yarışında isə Çin birinci, Almaniya ikinci, Koreya üçüncü olub.
Dünya çempionatının finalı yüksəlmiş Çin, Estoniya, Yaponiya, Ukrayna komandasının üzvləri öz ölkələrinə Paris Yay Olimpiya Oyunlarına iştirak üçün lisenziya qazandırıblar.
Bu nüfuzlu yarışda mükafat qazanmağa nail olan qalib və mükafatçılar yarış təəssüratlarını jurnalistlərlə bölüşüblər.
Pyotr Nimburski bildirib ki, karyerasında ilk dəfə dünya çempionu titulunu qazanıb: “Gərgin, həm də maraqlı mübarizə şəraitində keçən yarış mənim üçün çox uğurlu oldu. Qızıl medal qazandım. Öz uğuruma sevinsəm də, komandama görə təəssüfləndim. Biz üçüncü yerdəki Çin komandasından 0,1 xal geri qaldıq. Buna görə məyus oldum”.
İdmançı Bakı Atıcılıq Mərkəzində yaradılan şəraiti xüsusilə vurğulayıb: “İdmançıların öz potensiallarını üzə çıxarmasında yaradılan şərait mühüm rol oynayır. Artıq 3-cü dəfədir ki, Bakıda yarışlarda iştirak edirəm. Bakı Atıcılıq Mərkəzi möhtəşəmdir. Atış poliqonlarını bəyənirəm. Bu cür müasir və yüksək şəraitli mərkəzlər çox xoşuma gəlir”.
Yarışda qızıl medal qazanan Çinin 19 yaşlı təmsilçisi Qiongyu Janq da paytaxtımızdakı qələbənin karyerasında bir ilk olduğunu vurğulayıb. O qeyd edib ki, dünya çempionatında ilk dəfə qızıl medal qazanmaqla yanaşı, Olimpiadaya da ilk dəfə lisenziya əldə edib. İstedadlı atıcı Azərbaycana gəldiyinə görə şad olduğunu bildirib: “Azərbaycanı çox sevdim. İnsanları mehriban və qonaqpərvərdirlər. Bunu mütləq qeyd etməliyəm. Atıcılıq Mərkəzi çox gözəldir. Burada yaradılan şərait, xüsusilə də yaşıllıq zonalarının çox olması atletlərin əhvalına müsbət təsir edir”.
Sentyabrın 1-dək davam edəcək çempionatda planetin ən güclü nişançıları mükafatlar uğrunda mübarizədə ciddi səylər nümayiş etdirirlər. Möhtəşəm Bakı Atıcılıq Mərkəzi isə ən dəqiq nişançıların öz potensiallarını nümayiş etdirməsi üçün ideal məkanlardan biridir. Bunu yarış iştirakçıları özləri də dönə-dönə etiraf edirlər.
Leyla QURBANOVA, “Xalq qəzeti”