Bakıda keçirilən şahmat üzrə Dünya kubokunda mübarizə aparan Nicat Abasov 3-cü yer uğrunda ilk oyunda ABŞ təmsilçisi Fabiano Karuana üzərində inamlı qələbə qazanıb. Ağ fiqurlarla oynayan şahmatçı 26-cı gedişdə rəqibini təslim olmağa məcbur edib.
Matçdan sonra turnirin rəsmi saytına açıqlama veriən Azərbaycan şahmatçısı ABŞ təmsilçisi Fabiano Karuana üzərində ilk oyunda qazanılan qələbənin önəmli olduğunu bildirib: “İlk oyun mənim üçün rahat oldu. Karuananın səhvindən sonra qələbə qazanmağıma heç nə mane ola bilməzdi. Fabiano gözləmədiyim səhvə yol verdi. Düzgün gedişləri edərək oyunu qələbə ilə başa vurdum. Belə səhv Karuana kimi güclü şahmatçıya xarakterik deyil. Dünya kuboku yarışı artıq uzun müddətdir davam edir, əksər şahmatçılar yorulub. Fabiano ötən gün tay-brekdə də mübarizə aparıb. Yorğunluq özünü göstərə bilər. Məndə də bir qədər yorğunluq var. Dünən oynamadığım üçün bərpa oluna bildim”.
N. Abasov üçüncü yer uğrunda oyunda sona qədər mübarizə aparacağını söyləyib: “Cavab oyununda arxayınlaşmaq olmaz. Mənə dəstək olan hər bir kəsə təşəkkür edirəm. Bütün Azərbaycanın dəstəyini hiss edirəm. Üçüncü yer uğrunda mübarizə çox vacibdir. İlk üçlükdə olmaqla İddiaçılar Turnirində iştirakımı rəsmiləşdirmək istəyirəm”.
Beynəlxalq Şahmat Federasiyasının (FIDE) prezidenti Arkadi Dvorkoviç jurnalistlərə açıqlamasında Nicat Abasovun bu cür parlaq çıxışının böyük sürpriz olduğunu vurğulayıb: “O, yarımfinalda beşqat dünya çempionu Maqnus Karlsenlə də yaxşı mübarizə apardı. Fikrimcə, bu, Azərbaycan şahmatı üçün uğurlu nəticədir. Azərbaycan şahmatçılarından Teymur Rəcəbov artıq bir dəfə Dünya Kubokunu qazanıb. Nicat da gözəl mübarizə apardı. İndi də üçüncü yer uğrunda yarışacaq”.
Qeyd edək ki, bu gün şahmatçılar cavab oyununda üz-üzə gələcəklər. Oyun saat 15-00-da başlayacaq. Dünya kubokunda bürünc medal qazanmaq üçün Nicat Abasova heç-heçə də kifayət edəcək.
Dünya kubokunda ilk üç yeri tutacaq şahmatçılar İddiaçılar Turnirində iştirak etmək imkanı qazanacaqlar.
L.QURBANOVA, “Xalq qəzeti”