Bugünlərdə 16 yaşadək qızlardan ibarət komandamızın Andorrada keçirilən basketbol üzrə Avropa çempionatının C divizionunda parlaq qələbəsi Azərbaycanın idman ictimaiyyətini və xalqımızı sevindirdi. Komandamızın bütün oyunlarda inamla çıxış etməsi basketbolçularımızın yarışa mükəmməl hazırlığından xəbər verir.
U-16 qızlardan ibarət yığmanın baş məşqçisi Evren Alkaya “Xalq qəzeti”nə açıqlamasında məhz görülən kompleks işlər nəticəsində komandamızın yüksək nəticə əldə etdiyini bildirdi: “Hər hansı idman növünü inkişaf etdirmək istəyiriksə, mütləq aşağı yaş qruplarında istedadlı idmançıların yetişməsinə nail olmalıyıq. Bu baxımdan üzərimizə böyük məsuliyyət düşür. Bu yeniyetmə idmançılarımızın hər birinin potensialı var və biz onu inkişaf etdirmək üçün böyük səy göstəririk. Komandamızda 16 yaşadək güclü basketbolçularımız var. Basketbol Federasiyası Avropa çempionatına hazırlıq üçün bütün şəraiti yaratdı. Əldə edilən qələbədə əməyi keçən hər kəsə minnətdarıq”.
Baş məşqçi yığmamızın hər bir üzvünün imanla, inadla mübarizə apardığını, sonda qalib gəldiyini dedi: “Komanda idman növündə hər bir fərdin güclü olması ilə yanaşı, birgə mübarizə ruhunun yüksək olması da əsas şərtdir. Qızlarımız bütün qarşılaşmalarda gözəl oyunlar sərgilədilər. Sonda isə layiqli qələbəyə nail oldular. Andorra yığmasını həm qrupda, həm də həlledici mərhələdə məğlub etdilər. Yığmamız artıq B divizionunda yarışa biləcək”.
Köməkçi məşqçi Aygün Eynullayeva ötən 10 ay ərzində komandanın qitə yarışına böyük səylə hazırlaşdığını bildirdi. O qeyd etdi ki, yüksək səviyyədə qurulan təlim-məşqlər, yoldaşlıq görüşləri millinin hazırlığında önəmli rol oynadı: “Yığmamızın B qrupunda ilk oyunu Andorra ilə oldu. Qızlarımız çox həyəcanlı olsalar da, potensiallarından maksimum istifadə edərək rəqibi 14 xal üstələdilər. Sonrakı oyunda Moldovanı da böyük hesabla udduq. Təcrübəli Albaniya komandası ilə oyun bir az çətin olsa da, biz də zəif deyildik. Buna görə qələbə əldə edib qrup lideri olduq. A qrupunda çox təcrübəli komanda olan Gürcüstanla qarşılaşma həddindən artıq gərgin keçdi. Oyun bərabər idi və son saniyələrdə komandamızın üzvünün topu səbətə daxil etməsi bizə iki xal üstünlük qazandırdı. Finalda Andorra yığması ilə qarşılaşma nisbətən rahat keçdi. Artıq rəqibi tanıyırdıq.
Bizim qızlarımızdan fərqli olaraq rəqib komandalar daha təcrübəli idilər. İlk dəfə idi ki, belə bir yarışda çıxış edirdik. Komandamızın sona qədər bütün oyunları qələbə ilə başa vurması onun potensialından xəbər verir. İlk dəfədən çempion olduq. Ölkəmizi layiqincə təmsil etdiyimiz üçün çox sevinirik. Bizə dəstək verən hər kəsə minnətdarıq”.
Komandanın üzvü, Sumqayıt basketbol məktəbinin yetirməsi Səlminaz Ramazanlı qalib olmaq hissinin çox gözəl olduğunu bildirdi: “Bir var tək qalib olasan, bir də var ki, komandanla. Bu çox gözəl hissdir. Yığmamızın hər bir üzvü bu qələbəni qazanmaq üçün böyük inamla mübarizə apardı. Komandada yüksək ruh var. Bu qələbənin əldə edilməsi üçün məşqçilər də çox əziyyət çəkiblər. Əsas o idi ki, onlar bizə inandılar. Biz isə onların etimadını doğrultduq”.
Komandanın digər üzvü Ayanın 14 yaşı var. Xətai rayon 269 nömrəli məktəbin şagirdi gələcəyə böyük ümidlə baxır: “Komandamızla qürur duyuram. Bu uğurun davamını birgə gətirəcəyimizə inanıram. Rəqib komandalarla gərgin keçən oyunlarımız da oldu, bir qədər rahat matçlar da. Gürcüstan yığması ilə qarşılaşmada sanki ölüm-dirim mübarizəsinə girmişdik. Sona qədər inamla mübarizə apardıq. Birgə mübarizəmizlə son saniyələrdə rəqib komandanı məğlub edə bildik. Xoşbəxtik ki, Azərbaycanı layiqincə təmsil etdik”.
U-16 komandamızın uğurlarının davamlı olacağına inanırıq. Azərbaycan Basketbol Federasiyasının son illər uşaq və yeniyetmələr arasında bu idman növünün inkişafı istiqamətində atdığı ardıcıl addımlar artıq bəhrəsini verməyə başlayır. Ümid edirik ki, basketbolçularımızın qələbə soraqları daha yüksək zirvələrdən gələcək.
Leyla QURBANOVA, “Xalq qəzeti”