Polşada keçirilən III Avropa Oyunlarında dünən idmanın 11 növü üzrə yarışlar təşkil olunub.
Yarışın ikinci günündə yeddi növ üzrə 21 dəst mükafatın sahibi müəyyənləşib. Azərbaycan yığması bu növlərdən dördündə təmsil olunub.
Təmsilçilərimizdən karateçimiz Tural Ağalarzadə (67 kq) Azərbaycan komandasına ilk medalı qazandırıb.
Finala qədər uğurla irəliləyən idmançımız həlledici görüşdə yunanıstanlı Dionisios Xenosu da məğlub edərək Oyunların qızıl medalına sahib olub.
İyulun 2-dək davam edəcək III Avropa Oyunlarında 48 ölkədən 7 minə yaxın idmançı mübarizə aparır. Azərbaycan Krakov-2023-də 13 növ üzrə 86 idmançı ilə təmsil olunur.
Leyla SABİRQIZI, “Xalq qəzeti”