Azərbaycan Tibb Universitetində (ATU) Böyük Britaniyanın Quacquarelli Symonds (QS) şirkəti ilə əməkdaşlığa dair saziş imzalanıb. Dünyada ali təhsil xidmətləri sahəsində tanınmış bu qurumla anlaşma sənədini ATU-nun rektoru, professor Gəray Gəraybəyli və QS şirkətinin Rusiya, Şərqi Avropa və Orta Asiya üzrə regional direktoru Sergey Xristolyubov imzalayıblar.

Mərasim zamanı ATU-nun rektoru, professor Gəray Gəraybəyli təməli qoyulan  əməkdaşlığın hər iki tərəf üçün faydalı olacağından əminliyini bildirib. O, QS ekspertləri tərəfindən ATU ilə bağlı verilən tovsiyə və məsləhətlərin universitetin beynəlxalq səviyyədə fəaliyyətinə müsbət təsir göstərəcəyini qeyd edib. Görüş zamanı rektor, həmçinin ATU-nun elmi tədqiqatlar və təhsilin keyfiyyətinin yüksəldilməsi istiqamətində görülən işlər və əldə olunan nailiyyətlərdən bəhs edib. Tələbələrin fəallığını artırması üçün yaradılan imkanlar və şəraitdən söz açıb.

QS şirkətinin regional direktoru Sergey Xristolyubov  da öz növbəsində qurumlar arasındakı əməkdaşlığın uğurlu olacağına şübhə etmədiyini bildirib. O, QS şirkətinin fəaliyyəti, reytinqlərin tərtibatı prosesi,  monitorinqlər, sorğu və qiymətləndirmə proseslərinin aparılması  haqqında görüş iştirakçılarına ətraflı məlumat verib. QS reytinqində yer alan Azərbaycan universitetlərinin beynəlxalq səviyyədə potensiallarından söz açaraq təhsil prosesi, tələbə layihələri, müasir kampus quruluşu və digər məsələlər üzrə tövsiyələrini səsləndirib.

İmzalanma mərasimindən sonra tərəflər  əməkdaşlığın perspektivləri və gələcək planların müzakirəsini davam etdiriblər.

Görüşdə ATU-nun Beynəlxalq Əlaqələr üzrə prorektor, dosent Orxan İsayev, İnnovasiya və keyfiyyətin idarə olunması şöbəsinin müdiri Aygün Babayeva, İctimaiyyətlə əlaqələr şöbəsinin müdiri Günel Aslanova iştirak ediblər.

Z.HÜSEYNOVA

XQ