Dünya Vətənimizi yaşıl libasda görəcək
BMT-nin İqlim Dəyişmələri üzrə Çərçivə Konvensiyasının Tərəflər Konfransı 100-dən çox dövlətin nümayəndəsinin iştirakına və bir çox göstəricilərinə görə kifayət qədər yüksək səviyyəli tədbir hesab olunur. İqlim dəyişmələrinə həsr edilmiş sonuncu COP28 konfransı bizim üçün həm də ona görə əlamətdar oldu ki, orada növbəti tədbirin 2024-cü ildə məhz Azərbaycanda keçirilməsi ilə bağlı çox ciddi qərar qəbul olundu.
Bu fikirləri “Avrasiya miqrasiya təşəbbüsləri platforması” İctimai Birliyinin sədri, QHT-lərə Dövlət Dəstəyi Agentliyinin Müşahidə Şurasının üzvü Azər Allahverənov COP29-un ölkəmizdə keçirilməsinin siyasi əhəmiyyəti barədə danışarkən səsləndirib. Onun dediyinə görə, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası Azərbaycan üçün siyasi baxımdan önəm daşıyır. Bununla yanaşı, tədbiri həm enerji sektorunun, həm də miqrasiya sahələrinin inkişafı baxımından vacib tədbir kimi dəyərləndirən birlik sədri deyib ki, iqlim dəyişmələri ilə bağlı konfransların, sessiyaların keçirildiyi dövlətlərdə sonrakı mərhələlərdə məhz həmin sahələrdə çox ciddi irəliləyişləri müşahidə etmək mümkündür.
A.Allahverənovun sözlərinə görə, BMT-nin böyük güclərini özündə ehtiva edən dövlətlərin təmsil olunduğu konfrans qərar verən tərəflərin həmin tədbirin keçiriləcəyi şəhərə və ya dövlətə göstərdiyi etimadın bariz nümunəsidir. COP29-un ölkəmizdə keçirilməsinə qərar verilməsi də böyük etimadın göstəricisi olmaqla ölkəmizin qlobal problemlərin həllində məsuliyyətli və etibarlı tərəfdaş mövqeyini təsdiqləyir.
Konfransın beynəlxalq münasibətlər sistemində ölkəmizin rolunun daha da inkişafına və onun yerinin güclənməsinə gətirib çıxaracağına əminliyini bildirən ictimai birliyin sədri qeyd edib ki, Azərbaycanda, yəni Cənubi Qafqaz bölgəsində “yaşıl” ərazinin yaradılması önəmlidir. “Vaxtilə ölkəmizin beşdəbir hissəsi işğal altında qalanda Ermənistan orada boz zona yaratmışdı. Bu zonada işğalçılıq siyasəti nəticəsində ölkəmizin florası və faunası məhv edilmişdi. Eyni zamanda, Azərbaycanın mədəni irsi, mədəni abidələri, şəhər, qəsəbə, kəndləri dağıdılıb, kənd təsərrüfatı ziyan görmüşdü. Arıq torpaqlarımız 44 günlük Vətən müharibəsi nəticəsində işğaldan azad olunub. Azərbaycanın həmin ərazilərdə alternativ, yaşıl enerjilər, karbohidrogen və karbon qazlarından azad olan seqmentlər üzrə inkişaf etdirilməsi yanaşmasının ortaya qoyulması faktiki olaraq yaşıl enerjiyə yeni münasibətin sərgilənməsindən və həmin sahədə siyasətin formalaşmasından xəbər verir. Məhz bu səbəbdən də vaxtilə boz zona olan əraziləri “yaşıl” zonaya çevirmək niyyətində olan Azərbaycan üçün COP 29-a ev sahibliyi etməsi olduqca vacibdir”, – deyə o əlavə edib.
Azər Allahverənovun fikrincə, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının Azərbaycanda elan olunmuş “Yaşıl dünya naminə həmrəylik ili”ndə keçirilməsi nəticəsində ölkəmiz özünün ən müsbət tərəflərini dünyaya çatdıra biləcək. Birlik sədri, həmçinin deyib ki, ölkəmiz həmin istiqamətlər üzrə yaxın bir neçə 10 illiyə hesablanmış yeni siyasətin formalaşdırılması üçün də çox əlverişli imkanlar qazanacaq.
XQ