Türkiyənin xarici işlər naziri Hakan Fidan ölkəsinin Avropa İttifaqı (Aİ) ilə müsbət gündəmdə irəliləyiş əldə etməyə sadiq olduğunu bildirib. O, Brüsseldə Aİ xarici işlər nazirlərinin qeyri-rəsmi toplantısına qatıldıqdan sonra qiymətləndirmələrini “Anadolu” agentliyinin müxbiri ilə bölüşüb.
Türkiyənin bir müddətdir ki, bu görüşlərə dəvət olunmadığını xatırladan Fidan deyib: “Brüsseldəki görüş Aİ ilə əlaqələrimizin canlanması baxımından əhəmiyyətlidir”.
Türkiyənin bu görüşə dəvət olunmasını “müsbət inkişaf” adlandıran nazir bildirib ki, iki saata yaxın davam edən görüşdə Türkiyə ilə Aİ arasında əlaqələrin inkişaf etdirilməsi yolları, eləcə də Türkiyə ilə Aİ arasında qlobal və ümumbəşəri əlaqələr sahəsində əməkdaşlıq, eləcə də regional məsələlər ətraflı müzakirə olunub.
“Bu gün demək olar ki, Aİ ölkələrindən olan bütün həmkarlarım Türkiyə ilə bütün sahələrdə, xüsusən də xarici, təhlükəsizlik və müdafiə siyasətində strukturlaşdırılmış və müntəzəm dialoq və məsləhətləşmələrin davam etdirilməsinin vacibliyini vurğuladılar. Onlar qeyd etdilər ki, Türkiyə Rusiya ilə Ukrayna arasında münasibətlərdə, Qəzza zolağında, Suriyada, İraqda, Yaxın Şərqdə, Afrikada və Cənubi Qafqazda müharibələrin bitməsində mühüm rol oynayır. Onlar Türkiyə ilə Aİ arasında daha sıx və dərin məsləhətləşmələrin və ortaq siyasətlərin formalaşmasının vacibliyini vurğuladılar”, - deyə Hakan Fidan əlavə edib.
Nazir qeyd edib ki, qarşıdakı dövrdə münasibətlərin sürətlənməsi üçün texniki məsələlərlə bağlı konkret addımlar atılmalıdır. Onun fikrincə, “ilk növbədə, 2019-cu ildə dayandırılmış qurulmuş dialoq mexanizmlərinin işini bərpa etmək lazımdır. Biz Gömrük İttifaqının yenilənməsini səbirsizliklə gözləyirik”.
O deyib ki, prioritet məsələlərdən biri viza rejiminin liberallaşdırılmasıdır. Fidan bildirib ki, artıq 66 meyar yerinə yetirilib, aidiyyəti qurumlar qalan 6 meyarın yerinə yetirilməsi üzərində işləyir: “Vizanın liberallaşdırılmasına nail olunmasa da, biz vətəndaşlarımızın Şengen vizasının alınması prosesində qarşılaşdıqları çətinlikləri və maneələri aradan qaldırmaq üçün işimizi davam etdiririk. Çoxdəfəlik və uzunmüddətli vizaların universal paylanması məsələsi ilə bağlı Aİ və üzv dövlətlərlə təmaslarımızı davam etdiririk”.
Türkiyənin xarici işlər naziri əlavə edib: “İnanırıq ki, Türkiyə ilə Aİ arasında münasibətlərin canlanması bütün tərəflərin maraqlarına uyğundur. Bununla belə, Kipr məsələsi ilə Türkiyə-Aİ münasibətlərində əlaqə yaratmağın sağlam üsul olmadığını və heç bir nəticə verməyəcəyini vurğuladıq”.
Fidan Aİ üzvlüyünün Türkiyə üçün strateji hədəf olduğunu vurğulayıb. Nazir xatırladıb ki, prezident Rəcəb Tayyib Ərdoğan bu mövqeyi açıq şəkildə ifadə edib: “Biz müsbət gündəmlə irəliləmək istəyirik. Aİ eyni müsbət yanaşma nümayiş etdirsə, bu, bütün tərəflərin maraqlarına uyğun olacaq”.
P.ƏMİRCANOV
XQ
