HƏMAS ilə İsrail arasında müharibəyə nə vaxt son qoyula bilər? Bu suala birmənalı cavab vermək çətindir. Hər halda bölgədə sülhə olan ümidlər artır. Dünən Qətər dövlətinin rəsmisi Qəzzada atəşkəsin daha iki gün uzadılacağını bəyan edib. Bu barədə BBC məlumat yayıb. 

Qeyd edək ki, dördgünlük atəşkəs bazar ertəsi başa çatmalı idi və İsrailin daha çox fələstinli məhbusu, HƏMAS-ın isə daha çox girovu azad edəcəyi gözlənilirdi. Hələlik hər iki tərəf öhdəliklərini tam yerinə yetirməyib. 

Məlum olduğu kimi, altı həftəlik müha­ribədən sonra qüvvəyə minən ilkin razılaş­mada HƏMAS tərəfindən 50 girovun azad edilməsi, İsrailin isə 150 fələstinli məhbusu sərbəst buraxması nəzərdə tutulurdu. Eləcə də bu müddət ərzində bütün hərbi əməliyyat­lar dayandırılmalı idi. 

Qəzzada döyüşlər, həqiqətən, dayandı­rılıb. Amma yuxarıda qeyd etdiyimiz kimi, girov və əsirlərlə bağlı vədlər tam yerinə ye­tirilməyib. Bunun səbəbləri açıqlanmayıb. 

Fakt budur ki, BMT nümayəndəsi bazar günü axşam saatlarında, ümumilikdə, 39 is­raillinin, 117 fələstinlinin və 19 xarici vətən­daşın azad edildiyini bildirib. HƏMAS-ın girovluqdan azad etdiyi şəxslər arasında amerikalı qız da var. 

Yeri gəlmişkən, ABŞ Prezidenti Co Bay­den oktyabrın 7-də HƏMAS-ın İsrailə hü­cumu zamanı valideynləri öldürülən 4 yaşlı amerikalı qızın azad edilməsini alqışlayıb. Qlobal mediada bu barədə çox sayda şərhlər var. 

Dünən ABŞ və İsrail liderləri telefonla regiondakı vəziyyəti müzakirə ediblər. Ağ evin bununla bağlı bəyanatında deyilir ki, Prezident Co Bayden və Baş nazir Binyamin Netanyahu girovların azad edilməsindən da­nışıblar. Onlar Qəzza zolağına əlavə humani­tar yardımın artırılması məsələsini də müza­kirə ediblər.

Xatırladaq ki, HƏMAS ilə İsrail arasın­da son cümə günündən başlanan müvəqqəti dördgünlük atəşkəs HƏMAS-ın oktyabrın 7-də İsrailə qəfil hücumu nəticəsində 1200 nəfərin ölümü və 240-a yaxın insanın girov götürülməsindən sonra başlanan müharibədə ilk fasilədir. 

Fələstinlilərin itkiləri isə qat-qat çoxdur. Belə ki, silahlı qarşıdurmada 14 mindən çox Qəzza sakininin həyatını itirdiyi bildirilir. Yaralananların sayının isə 30 mini keçdiyi ehtimal olunur. 

Qəzzada silahlar hələlik sussa da, regi­onda müharibə faktiki olaraq davam edir. Dünən İsrailin döyüş təyyarələri Dəməşq Beynəlxalq Hava Limanına ağır zərbələr en­diriblər. 

Bu barədə xəbərdə həmçinin deyilir ki, İsrail qırıcıları Dəməşq Beynəlxalq Hava Li­manı və Suriyadakı bir sıra hərbi obyektləri hədəfə alıblar. Suriya rəsmiləri itkilər barədə məlumat verməyib, lakin qarşı tərəfin bütün təyyarələrinin “məhv edildiyini” açıqlayıb. 

Bu arada, Qətərin paytaxtı Dohada İsra­ilin Kəşfiyyat və Xüsusi Tapşırıqlar İdarə­sinin (MOSSAD) rəhbəri David Barneanın ABŞ-dan olan həmkarı Bill Börnslə gö­rüşdüyü barədə məlumat yayılıb. Tərəflər Yaxın Şərqdəki müharibəni, həmçinin qar­şılıqlı maraq doğuran digər məsələləri mü­zakirə ediblər. 

Görüşdə Misirin rəsmi nümayəndəsinin də iştirak etdiyi bildirilir. Lakin bu tədbirdə Misiri kimin təmsil etdiyi açıqlanmayıb. 

Türkiyə dövləti isə fələstinlilərə huma­nitar yardımlarını davam etdirir. Bu arada, türkiyəli mütəxəssislərdən ibarət nümayəndə heyətinin Qəzzada səhra xəstəxanasının qu­rulması üçün hazırlıq işləri aparmaq məqsə­dilə bölgəyə gəldiyi məlum olub. Türkiyəli diplomat bildirib ki, rəsmi Ankara xəstəxana­nı tez bir zamanda istifadəyə verməyi plan­laşdırır. Məlumatı TASS agentliyi yayıb. 

Qeyd edək ki, HƏMAS-la müharibə İsra­ilə baha başa gəlir. Bu ölkənin Mərkəzi Ban­kının hesabatında qeyd edilir ki, İsrail HƏ­MAS-la müharibəyə artıq 198 milyard şekel (53 milyard ABŞ dolları) xərcləyib. 

Daha əvvəl isə qeyd edilmişdi ki, İsrail ordusunun HƏMAS-a qarşı gündəlik hərbi əməliyyatlarına təxminən 260 milyon ABŞ dolları həcmində vəsait xərclənir. Yəni İsrail üçün bu müharibəni davam etdirmək heç də sərfəli deyil. 

Rəsmi Təl-Əviv isə HƏMAS-ı sonadək cəzalandırmaq niyyətində olduğunu bildirir. Bununla yanaşı, sülh danışıqları ilə bağlı hər iki tərəfə təzyiqlər artırılır. 

M.HACIXANLI
XQ