Son illər Ağ evin keçmiş və hazırkı sahibləri ətrafında cərəyan edən hadisələr özünü demokratiya carçısı kimi dünyaya təqdim edən ABŞ haqqında formalaşan təsəvvürlərə kəskin zərbə vurmaqdadır. Xüsusilə son bir neçə ayda eks-prezident Donald Trampın məxfi dövlət sənədlərini evində gizlətməsi, vergidən yayınması, prezident Co Bayden və oğlu Hanter Baydenin korrupsiyada şübhəli bilinmələri ölkə daxilində çox böyük gərginliyə səbəb olub.
Bu günlərdə şərhçi Nik Hilbertson “Breitbart” portalında dərc edilən məqaləsində yazır ki, respublikaçılar ABŞ Ədliyyə Nazirliyini ikiüzlülükdə günahlandıraraq istintaqın Hanter Baydenlə bağladığı razılaşmanı kəskin tənqid edirlər. Portalın oxucuları respublikaçıların ittihamlarına qoşularaq bildirirlər ki, “Demokratlar konstitusiyadan tualet kağızı kimi istifadə edirlər”.
Mühafizəkarlar Hanter Baydenin federal prokurorlarla mehriban sövdələşməsini alt-üst ediblər. Sövdələşməyə əsasən, prezidentin oğlu "federal gəlir vergisini qəsdən ödəməməklə" bağlı iki ittihamda günahını etiraf edib və odlu silahları qanunsuz saxladığına görə qanun pozuntusu üzrə profilaktika proqramına qoşulmağa razılaşıb.
“Breitbart News”un böyük redaktoru Joel Pollakın açıqlamasına görə, bu saziş Hanter Baydenin həbsxanadan yayındırılması deməkdir. Eks-prezident Donald Tramp isə “Truth Social” sosial şəbəkəsində Hanterin cəzasını “yol cəriməsi” ilə müqayisə edərək yazıb: "Vau! Baydenin korrupsiyaya bulaşmış Ədliyyə Nazirliyi Hanter Baydeni yüz illərlə həbs cəzası olan cinayət işinə görə, sadəcə, yol hərəkəti qaydalarını pozmağa bənzər cərimə ilə cəzalandıraraq, xilas edib".
Hanterlə razılaşma Trampın prezidentlik müddətinin sonunda Mar-a-Laqoya apardığı iddia edilən məxfi sənədlərin saxlanması ilə bağlı 37 fakt üzrə məhkəmə qarşısına çıxarılmasından düz bir həftə sonra əldə edilib. Pollak bildirib ki, Trampın bütün maddələr üzrə təqsiri sübut olunarsa və hakim hər bir maddə üzrə maksimum cəza təyin edərsə, eks-prezident, ümumilikdə, 400 il həbs cəzası ala bilər.
ABŞ-ın 45-ci prezidentinin oğlu kiçik Donald Tramp baş verənlərlə bağlı bölüşdüyü rəyində yazır ki, bu razılaşma "çox pis proteksionizm qoxusu verir və açıq-aşkar iki səviyyəli çürük ədliyyə sistemini ifşa edir".
"Əgər siz respublikaçısınızsa, Baydenin Ədliyyə Nazirliyi cinayət məcəlləsinin maddələrini gözünüzə soxacaq və sizi yüz illik dəmir barmaqlıqlar arxasına salmağa çalışacaq. Yox, əgər Hanter kimi düzgün soyadınız varsa, sizi qoruyacaq, sizinlə incə davranacaqlar”, – deyə kiçik Tramp əlavə edib.
“Judicial Watch” hüquq müdafiəçiləri təşkilatının prezidenti Tom Fitton da “Twitter” hesabında yazıb ki, sevdalı sövdələşmə "üzə tüpürmək və qanunun aliliyinə hörmətsizliyin nümayişidir". O, bəyan edib ki, prokurorluq "xarici ölkədən rüşvət almaqla bağlı Coya (Bayden) qarşı irəli sürülən iddialardan da yayınır".
Doktor Sebatsian Qorka Fittonla razılaşır və yazır: "Bu, onun atasının Ədliyyə Nazirliyinin və vergi idarəsinin istintaqla bağlı təklif edilən aşiqanə və çox mərhəmətli bir razılaşmadır. Sadəcə, onu cərimə ödəməyə məcbur etdilər və indi də Hanter öz kokain və rus fahişələri olan yuvasına qayıdır. Ədalət yoxdur!”
Respublikaçıların prezidentliyə namizədlərindən biri Vivek Ramasvami bu razılaşmanı "törətdikləri real cinayətlərə görə məsuliyyət daşımaqdan həmişəkindən daha çox qorxduqlarını göstərən geri çəkilmə immitasiyası" adlandıraraq deyir: "Hanter Baydenin istintaqla sövdələşməsi zarafatdır. Əsl məqsəd səs yazılarıdir, çünki onlardan məlum olur ki, Hanter və Co Bayden Ukraynanın “Burisma” şirkətinin rəhbərindən rüşvət alıblar".
Respublikaçı senator Co Vens də çox sərt fikirlər səsləndirib. O bildirib ki, razılaşma "qanunun biabırçı ikili standartlarını" nümayiş etdirir. Hər hansı digər amerikalıya analoji qanun pozuntusuna görə daha sərt və amansız cəza veriləcəkdi. Prezidentin oğlunun isə əlini sıxıb razılaşırlar. Bu, Baydenin Ədliyyə Nazirliyinə təyin edilmiş şəxsləri niyə dəstəkləyə bilməyəcəyinizin mininci sübutudur. Bizim ölkəmizdə ikisəviyyəli ədliyyə sistemi fəaliyyət göstərir. Bu, rüsvayçılıqdır”.
Respublikaçı senator Tom Kotton da təqribən eyni fikri bildirib: "Gəlin açıq və birbaşa danışaq: soyadı Bayden olmayan hər hansı bir şəxs Hanterin cinayətlərinin kiçik bir hissəsini belə etsəydi, onun üçün nəticələr çox ciddi olardı".
Maraqlıdır ki, Hanter Baydenin sövdələşmə xəbəri Trampın məxfi sənədlərlə bağlı məhkəmə prosesinin "sürətlə izlənildiyi" bir gündə yayılıb. Trampın məhkəməsinin daha əvvəl keçiriləcəyi və ona cəmi səkkiz həftə qaldığı bir vaxtda, Hanter Bayden istintaqla sövdələşərək bütün bu noutbuk işindən asanlıqla canını qurtarır.
Respublikaçılar Partiyasında olan qanunvericilər Nümayəndələr Palatasının üzvü Marcori Taylor Qrin, senatorlar Couş Houli və Rik Skott Ədliyyə Nazirliyinin Baydenlərin işinə münasibətilə ABŞ prezidentliyinə əsas namizəd olan Trampa qarşı ittihamlara münasibətdə nə qədər kəskin fərq olduğuna işarə edirlər. Qrin yazır: "Hanter Bayden silah saxlamaqda və kiçik vergi cinayətlərində günahlarını etiraf etsə də, həbs cəzası almadı.Bu qondarma bir proses və baş aldatmaq üçün olan bir oyundur. Guya o, Ədliyyə Nazirliyi ilə əməkdaşlıq edir. Yazıq və qərəzli Ədliyyə Nazirliyi öz oyuncaq-prezidentini müdafiə edir, Co və Hanter Baydenləri qanunla ittiham etməkdən imtina edir”.
Məqaləyə Rik Skottun “Twitter”ə yazdığı aşağıdakı sözlərlə yekun vurulub: "Hanter Bayden sadəcə əllərini bir-birinə vurur, Böyük Oğlan isə əsas siyasi rəqibini ovlamaqda davam edir. Burada hamı üçün bərabər olan ədalət mühakiməsi haradadır? Bu, bizim qanunlara qətiyyən hörmət qoymayan ailə tərəfindən qanunvericilik sistemimizi ələ salmaqdır”.
Hazırladı: İLQAR, “Xalq qəzeti”