Dövlət Məşğulluq Agentliyi bu ay 37 peşə üzrə 57 hazırlıq kursu təşkil edib. Bu barədə Əmək və Əhalinin Sosial Müdafiəsi Nazirliyinin ictimaiyyətlə əlaqələr və kommunikasiya şöbəsindən məlumat verilib.
Bildirilib ki, əmək bazarının aktual istiqamətləri üzrə təşkil edilən həmin kurslara 644 şəxs cəlb olunub. Onlardan 472 nəfəri üçün agentliyin Bakı, Gəncə və Göyçay peşə hazırlığı mərkəzlərində, 172 nəfəri üçün özəl tədris müəssisələrində peşə kursları təşkil edilib.
İşəgötürənlərlə əməkdaşlıq çərçivəsində təşkil olunan kurslarda rəqəmsal media və marketinq mütəxəssisi, insan resursları mütəxəssisi, proqramla idarə olunan dəzgahların operatoru, təchizat üzrə agent, backend developer, elektron tibbi cihazların təmiri və xidməti elektromexaniki, elektrik qaz qaynaqçısı və digər peşələr üzrə nəzəri biliklər tədris edilməklə yanaşı, müəssisələrdə təcrübə keçmək imkanı da yaradılıb.
Qeyd edək ki, kursların sonunda məzunlara sertifikatlar təqdim ediləcək və onların işlə təmin olunmalarına dəstək göstəriləcək. Yeri gəlmişkən deyək ki, peşə hazırlığı müddətində müdavimlərə minimum əməkhaqqı məbləğində aylıq təqaüd də verilir.
Zərifə BƏŞİRQIZI, “Xalq qəzeti”
