Mingəçevir
Martın 31-də Mingəçevirdəki Heydər Əliyev Mərkəzində şəhər icra hakimiyyətinin təşkilatçılığı ilə “Soyqırımları ermənilərin tarixən xalqımıza qarşı apardığı məqsədyönlü siyasətdir” mövzusunda tədbir keçirilib. Tədbir iştirakçıları Şəhidlər xiyabanındakı Soyqırımı abidəsinin önünə əklillər, gül dəstələri qoyublar. Soyqırımı hadisələri zamanı vəfat etmiş və torpaqlarımızın azadlığı uğrunda şəhid olmuş Vətən övladlarının xatirəsi birdəqiqəlik sükutla yad edilib.
Şəhər icra hakimiyyətinin başçısı İlham İsmayılov çıxışında qeyd edib ki, son iki əsrdə Qafqazda azərbaycanlılara qarşı məqsədyönlü şəkildə həyata keçirilmiş etnik təmizləmə və soyqırımı siyasəti nəticəsində xalqımız ağır məşəqqətlərə məruz qalmışdır. Mərhələ-mərhələ gücləndirilən belə qeyri-insani siyasət nəticəsində azərbaycanlılar indi Ermənistan adlandırılan ərazidən, min illər boyu yaşadıqları tarixi etnik torpaqlarından didərgin salınaraq, kütləvi qətl və qırğınlara məruz qalmışlar. Törədilən vəhşiliklər nəticəsində minlərlə tarixi, mədəni abidə və yaşayış məskəni dağıdılıb viran edilmişdir.
XX əsrin əvvəllərində ermənilər təkcə bu gün Ermənistan adlanan ərazidə deyil, Bakı quberniyasının Bakı, Şamaxı, Quba, Göyçay qəzalarında, Qarabağda, Zəngəzurda, Naxçıvanda da vaxtaşırı xalqımıza qarşı qırğınlar, talanlar, yanğınlar, terror və digər zorakılıq aktları həyata keçirmişlər. Erməni faşistləri bu ərazilərdə on minlərlə dinc azərbaycanlı əhalini – qadını, uşağı, qocanı yalnız milli mənsubiyyətlərinə görə vəhşicəsinə qətlə yetirmiş, yaşayış yerlərini talan edərək, yandırıb viran qoymuş, xalqımızın milli mədəniyyət abidələrini, məscidləri dağıtmışlar.
Tədbirdə soyqırımı qurbanlarının xatirəsi dərin hüzn və ehtiramla yad edilmişdir.
Göyçay
31 Mart – Azərbaycanlıların Soyqırımı Günü ilə bağlı Göyçay rayonunda anım tədbiri keçirilib.
Tədbirdə Göyçay Rayon İcra Hakimiyyətinin başçısı Natiq Ağayev, hüquq-mühafizə orqanlarının rəhbərləri, Yeni Azərbaycan Partiyası rayon təşkilatının sədri, idarə, müəssisə, təşkilat rəhbərləri və rayon ictimaiyyətinin nümayəndələri iştirak ediblər.
Tədbir iştirakçıları əvvəlcə Göyçay şəhər Şəhidlər xiyabanı ərazisində soyqırım qurbanlarının xatirəsinə ucaldılmış Abidə Kompleksini, daha sonra Bığır kəndinin ərazisində yerləşən Soyqırım abidəsini və türk əsgərlərinin məzarlarını ziyarət edərək önünə gül dəstələri düzüblər.
Tədbirdə soyqırımı qurbanlarının və şəhidlərimizin xatirələri bir dəqiqəlik sükutla yad edilib, ruhlarına dualar oxunub.
İlqar HƏSƏNOV,
“Xalq qəzeti”nin bölgə müxbiri