Ermənistanın baş naziri Nikol Paşinyanın Qarabağın Azərbaycana məxsusluğunu bildirdiyi bəyanat böyük əks-səda doğurub. Hazırda erməni siyasi dairələri içərisində məsələ ətrafında isterik durum var. Bu durumun müxtəlif təzahür formaları özünü göstərməkdədir. Yazımızın ikinci bölümündə belə hallara nəzər salacağıq.
Bundan əvvəl isə bildirək ki, N.Paşinyanın məlum bəyanatı Rusiyanın siyasi daiərələri tərəfindən də təhlil olunmaqda, mövcud xüsusda müxtəlif məqamlara nəzər salınmaqdadır. Bu baxımdan, fikirlərinə istinad etdiyimiz şəxs Moskva Dövlət Beynəlxalq Münasibətlər İnstitutunun tərkibindəki Avro-Atlantik Təhlükəsizlik Mərkəzinin aparıcı elmi işçisi, politoloq Sergey Markedonovdur. Markedonov özünün “Don kazakı” teleqram kanalında keçirdiyi mətbuat konfransında Ermənistanın baş nazirinin fikirlərini təhlil edib. Onun yanaşma tərzi, kifayət qədər, özünəməxsus səciyyə daşımaqdadır.
Beləliklə, politoloq Markedonov bildirib ki, yaxın gələcəkdə üç rəqəm (səkkiz və iki altı) erməni milli rəvayətlərində mürəkkəb dramatik əksetdirmə obyektinə çevriləcək. Söhbət Azərbaycanın baş nazir N.Paşinyan tərəfindən tanındığı bildirilən 86,6 min kvadratkilometrlik ərazisindən gedir. O ərazidən ki, onun tərkibində Qarabağ da var.
Markedonov deyib ki, Nikolu milli xəyanətdə ittiham etmək, eləcə də “Qarabağın təslim edilməsi” prosesinin kim və nə vaxt başladığı barədə sui-qəsd nəzəriyyələri yaratmağa başlamaq daha asandır. “Postsovet Ermənistanının “Qarabağsızlaşdırılmasının” sistemli təhlilini təqdim etməyə çalışmaq isə çətindir. Bir şərh çərçivəsində bu, əlbəttə, mümkün deyil. Ancaq əsas nöqtələri qeyd etmək olar və lazımdır”, – deyən rusiyalı politoloq vurğulayıb ki, əslində Nikolun bəyanatı yenilik deyil. Çünki Qarabağın Azərbaycana məxsusluğunu hələ çoxdan, istər o, istərsə də onun komandasındakı digər şəxslər bu və ya digər dərəcədə təkrarlamaqda idilər.
Əlbəttə, Markedonov Paşinyanın hələ hakimiyyətə gəlməzdən öncə söylədiklərini diqqətə çatdırmağı unudur. Yada salaq ki, Nikol 2018-ci il seçkilərindən əvvəl özünün seçkiqabağı platformasında Qarabağın Ermənistana yük olduğunu bildirmiş və bu yükdən azad olunmağın vacibliyinə toxunmuşdu. Yeri gəlmişkən, onu da diqqətə çatdıraq ki, o zaman Nikolun ideyası cəmiyyətdə xeyli populyarlıq qazanmışdı. Hər halda, bəyənilməsə idi, Paşinyan hakimiyyətə gəlməzdi. Hərçənd, Nikolun mövcud xüsusdakı fikirlərindəki hədəf daha çox Qarabağ klanı, yəni Sarkisyan–Koçaryan xuntası idi ki, erməni xalqı Paşinyana etimad göstərməklə, daha çox bu ruspərəst xunta rejimindən canını qurtarmağı düşünürdü və istəyinə nail oldu da. Ancaq ötən müddət göstərir ki, həmin xalq özünün ənənəvi xəstəliyindən qurtula bilmədi, üstəlik, lap əvvəldən eyforik durumda olan Paşinyan da xəstəliyə yoluxdu. Nəticə etibarilə İkinci Qarabağ müharibəsi baş verdi ki, savaşdakı rüsvayçı məğlubiyyətin Ermənistanın hazırkı dramatik siyasi mənzərəsinin katalizatoru rolunda çıxış etdiyi danılmaz reallıqdır.
Ancaq Markedonov daha böyük reallığa diqqət çəkib və deyib ki, Ermənistanın uduzduğu İkinci Qarabağ müharibəsindən sonra bölgənin Azərbaycanın nəzarətinə keçəcəyini proqnozlaşdırmaq çətin deyildi. Onun sözlərinə görə, 2020-ci ilin noyabrı (10 noyabr 2020-ci il tarixli üçtərəfli Bəyanat nəzərdə tutulur – red.) keçmiş regional status-kvonun qırılma nöqtəsi və yeni Cənubi Qafqaz nizamının formalaşmasının başlanğıcı oldu. İrəvan isə bu prosesdə siyasi benefisiar olmayıb və indi də deyil.
Bəs, nəyə görə Ermənistan müharibədən sonrakı yeni Cənubi Qafqaz düzənində iştirak edə bilmədi? Axı, ilk baxışdan ona bu şans yaradılmışdı. Söhbət Azərbaycan və Türkiyənin liderlərinin, eləcə də ayrı-ayrı rəsmi şəxslərinin İrəvana yönəlik xoş mesajlarından gedir. O mesajlardan ki, onlarda Ermənistan hakimiyyəti avantüradan kənar dayanmağa, əməkdaşlığa çağırılırdı. Markedonov məsələyə diqqət yetirməsə də, heç şübhəsiz, onun siyasi benefisiar məntiqində bu məqam dayanmaqdadır.
S.Markedonov Ermənistan daxilində Rusiyanın ermənilərə kömək etmədiyinə dair yayılmış fikirlərə də münasibət bildirib: “Siz Rusiyanı müttəfiqinə kömək etməməkdə (və düzünü desəm, bu cür tənqidlər heç də həmişə əsassız olmayacaq) nə qədər istəyirsinizsə, ittiham edə bilərsiniz. Amma görürük ki, heç bir qüvvə birmənalı şəkildə Ermənistanın tərəfini tutmayıb. Burada “tvitlər” və PR məqsədilə edilən hərəkətlər, eləcə də ABŞ konqresmenlərinin “demokratik Artsaxın tanınması” ilə bağlı ekzotik təşəbbüsləri nəzərə alınmır. Bu o deməkdir ki, Paşinyanın (və onun yerində hər hansı başqa adın) “erməni rekonkistası”nın həyata keçirilməsi naminə kənar dəstəyi yoxdur. Bunu təsdiqləmək üçün sadəcə faktları sıralamaq yetərlidir”. Bu yerdə yada Azərbaycan Prezidenti İlham Əliyevin əminliklə dilə gətirdiyi bir fikir düşür. Dövlətimizin başçısı dəfələrlə bildirmişdi ki, İrəvana heç kəs kömək göstərməyəcək. Söhbət əsaslı, Markedonovun da nəzərində tutduğu böyük dəstəkdən gedir.
Rusiyalı politoloq Ermənistan daxilində “Qarabağı Azərbaycana təslim etmək” ideyasının populyar olmadığını bildirsə də, “Qarabağ bizimdir” bəyanatı ilə bölgəni həyatı bahasına müdafiəyə hazır olmaq arasında uçurumun mövcudluğunu da diqqətə çatdırıb. “2020–2022-ci illərdə bir neçə etiraz dalğası var idi. Lakin onlar kütləvi xarakter almadı və Qarabağ üçün mühüm əhəmiyyət daşıyan liderlərin (Vazgen Manukyan və Robert Köçəryan nəzərdə tutulur – red.) müxalifət roluna girməsi də 1988–1989-cu illərdə olduğu kimi, Ermənistan cəmiyyətini ayıltmadı. Kütlə isə münaqişədən yorulub. Buna görə onu danlamalısan? Kim kimə bunu etmək hüququnu verib? İnsanlar bəzən müharibələrdən o qədər yorulurlar ki, ədalətsiz sülhə də hazır olurlar. Buna dair çoxlu misallar gətirmək olar”, – deyən Markedonov İkinci Qarabağ müharibəsindən sonra təzyiqlərə məruz qalmış Paşinyanın seçkilərə getməsinə və təzyiqlərin qarşısında yenə prosesdən qalib ayrılmasına diqqət çəkib. Onun sözlərindən belə qənaət hasil olur ki, erməni xalqı Nikolu devirməyə xırda cəhd belə göstərmədi, əksinə baş naziri qorudu və indi də bu meyil özünü göstərməkdədir: “Baxmayaraq ki, onun (Paşinyanın – red.) 2021-ci il seçki proqramında Qarabağın öz müqəddəratını təyin etməsinin dəstəklənməsi ilə bağlı müddəlar var idi. Amma bəyannamə ilə icra arasında xeyli fərq mövcuddur”.
Rusiyalı siyasi ekspert bir daha keçmişə müraciət edib və Ermənistanın daxilində 1988–1989-cu illərdəki yüksəlişlə müqayisə oluna biləcək heç nəyin olmadığını vurğulayıb və əlavə edib ki, hazırda erməni cəmiyyətində Qarabağ yükündən yorğunluq göz qabağındadır. “Dərhal deyəcəyəm ki, bu xoş və ya ürək bulanmasına səbəb ola bilər, amma faktlar olduğu kimidir”, – deyə, S.Markedonov Moskvanın Cənubi Qafqazda baş verən proseslərə təmkinli yanaşmasına da münasibət bildirib. Siyasi ekspert bu təmkinin Moskvanın Qafqazdakı mövcudluğunun sonunun başlanğıcı olacağına dair suala cavab verməyə çalışıb və bildirib: “Cavab verməyə tələsməyək. Qarsın, Ərdəhanın və ya Artvinin itirilməsi Sovet Rusiyasının (sonra SSRİ-nin) Qafqaz regionundan çıxmasına səbəb olmadı. Amma düzünü desək, çoxlu milli travmalar, fobiyalar olub. Qarabağ hekayəsi, ola bilsin, oxşar bir şeyə çevrilə bilər. Qarabağla bağlı bütün qərarlar çətindir”.
***
İndi isə baş nazir N.Paşinyanın mayın 22-də dilə gətirdiyi məlum məzmunlu fikirlərinə Ermənistan daxilindəki reaksiyalardan söz açaq. Başlayaq ölkənin üçüncü prezidenti, Qarabağ cəlladı Serj Sarkisyandan. Sarkisyan pafosu və mənasız sabun köpüyü ritorikasını işə salaraq bildirib ki, Nikolun Qarabağın Azərbaycanın tərkib hissəsi kimi tanınması ilə bağlı bəyanatından sonra, üçüncü prezident kimi ondan cavab tələb edilməsi təhqir deyilsə də, anlaşılmazdır.
Prezidentliyi dövründə Qarabağ məsələsində, guya prinsipial mövqe tutduğunu deyən Sarkisyan fikirlərini daha çox ölkənin hazırkı iqtidarının ona qarşı səsləndirdiyi əks baxışlara cavab tonunda qurub: “Bizə nə qədər böhtan atsalar, bizi gözdən salsalar, təqib etsələr də, vuruşmuşuq və mübarizəmizi davam etdiririk. Əgər kimsə indi birdən “gözlənilmədən təəccüblənirsə” və məndən yeni açıqlama tələb edirsə, bu, ən azı çaşqınlıq yaradır”. Göründüyü kimi, Qarabağ cəlladı Sarkisyan da indiki vəziyyətdə, necə deyərlər, yaxasını kənara çəkməklə məşğuldur.
Qeyd edək ki, Ermənistan parlamentində təmsil olunan müxalifət təmsilçiləri N.Paşinyanın mətbuat konfransı zamanı söylədikləri ilə bağlı Milli Assambleyada ayrıca müzakirələrin aparılmasına dair çağırış səsləndiriblər.
“Ermənistan” bloku fraksiyasının katibi Artsvik Minasyan qeyd edib ki, baş nazir Ermənistanın milli maraqları kontekstində qəbuledilməz fikirlər səsləndirib. O vurğulayıb ki, parlament onun anti-dövlət və antimilli yanaşmalarına qiymət verməlidir. Minasyan, eyni zamanda, ali qanunverici orqandakı parlament çoxluğunun müxalifətin bütün təşəbbüslərini rədd etməsinə diqqət çəkərək bildirib ki, digər müvafiq təşəbbüslər işə salınmalıdır. Hansı təşəbbüslər, deputat bu barədə danışmayıb...
Ermənistan parlamentinin spikeri Alen Simonyan isə baş nazir Paşinyanın yanaşmalarını tam dəstəklədiyini bildirib. Nikola qarşı Milli Assambleyada səslənmiş fikirlərə, o cümlədən, Qarabağ mövzusunda ayrıca müzakirə aparmaq təkliflərinə reaksiya verən Simonyan deyib: “Əgər mənim şəxsi fikrim sizi maraqlandırırsa, o zaman baş nazirin səsləndirdiyi yanaşmaları tam dəstəkləyirəm”.
Qarabağın və anklavların Azərbaycana verilməsi kimi qərarların qeyri-legitim olduğunu deyən siyasi müşahidəçi Arman Abovyan bildirib ki, legitimlik yalnız referendum yolu ilə təmin edilə bilər. “O zaman bəlli olacaq ki, xalqın 90 faizindən çoxu hakimiyyətin apardığı siyasətin əleyhinədir. İndiki hakimiyyət xalqın arxasınca qərar qəbul etməyəcəyinə söz verib. Yaxşı, vədlərinizə əməl edin, qərarı referenduma təqdim edin”, – deyən Abovyanın irəli sürdüyü referendum məntiqi Ermənistan cəmiyyətindəki isterik durumun yalnız bir elementidir.
Yeri gəlmişkən, N.Paşinyan da Qarabağın və anklavların Azərbaycana verilməsi ilə bağlı referendumun keçirilməsinin mümkünlüyünə toxunub. O, belə bir ehtimalın müzakirəsini məqbul hesab etsə də, sözlərindən bu təəssürat yaranıb ki, prosesə gedilməsi istisnadır: “Belə bir qərar verən hakimiyyət siyasi məsuliyyəti öz üzərinə götürür. Təbii ki, mexanizmlər çoxdur. İstəməzdim ki, siyasi məsuliyyətimizdən yayınıb, onu başqalarının üzərinə atmağa çalışdığımıza dair təəssürat yaransın”.
Bu arada N.Paşinyanın məlum fikirlərinə reaksiya verənlərdən biri də “Rusiya Erməniləri İttifaqı” ictimai təşkilatının rəhbəri Ara Abramyandır. Daha doğrusu, o da erməni cəmiyyətindəki isterik durumun təsviri üçün lazım olan təcrübə dovşanlarından biridir. Abramyan bildirib ki, erməni xalqını, guya, ermənilərə qarşı soyqırımı siyasətinə sadiqliyini dəfələrlə təsdiqləyən Azərbaycan rəhbərliyinin mərhəmətinə buraxmaq, nəinki əxlaqsızlıqdır, həm də Ermənistan konstitusiyasına ziddir. Ölkənin müstəqilliyi, digər məsələlərlə yanaşı, “Ermənistan SSR Ali Sovetinin və Dağlıq Qarabağ Milli Şurasının 1989-cu il 1 dekabr tarixli birgə qərarına əsaslanır”, – deyən Abramyanın fikirləri də yumşaq desək, beynəlxalq hüquqa zidd siyasi interpretasiyadır. Böyük anlamda isə buna misli görünməmiş həyasızlıq demək daha məntiqlidir.
Həyasızlığını davam etdirən Abramyan onu da bildirib ki, Qarabağ xalqının öz müqəddəratını təyinetmə hüququnu inkar edən istənilən razılaşma Ermənistan konstitusiyasına ziddir. Təşkilat sədri bir qədər də “irəli gedərək” bildirib ki, 2018-ci ildən başlayaraq, Ermənistanda baş verənlər erməniləri Ermənistandan və Rusiya regionundan sıxışdırıb çıxarmaq məqsədi daşıyır. “Erməni ziyalıları, biznes elitası, ictimai xadimləri, o cümlədən, diaspor nümayəndələri artıq susmamalıdırlar. Bu gün onlar xalqı uzun sürən siyasi süstlükdən çıxarmaq üçün öz mövqeyini açıq şəkildə bildirməyə borcludurlar”, – deyən A.Abramyanın şüvən qopardığı aşkar görünən digər fikirlərinə toxunmaq istəmirik. Həm də ona görə ki, erməni cəmiyyətindəki acınacaqlı durumun təsviri baxımından daha fərqli həyasızlıqlar var.
Qeyd etdiyimiz anlamda Qarabağdakı separatçı rejimdə səslənmiş fikirlər də diqqət çəkməkdədir. Rejimin oyuncaq parlamentinin bəyanatında bildirilib ki, N.Paşinyan Ermənistanın Müstəqillik Bəyannaməsinin və Ermənistan konstitusiyasının Qarabağa münasibətdəki müddəalarını, xüsusən də Ali Sovetin qərarının imperativ prinsipini kobud şəkildə pozub. Çünki Ermənistan Respublikasının 8 iyul 1992-ci il tarixli qərarı ilə ölkənin Qarabağın Azərbaycanın tərkib hissəsi kimi göstərildiyi hər hansı beynəlxalq və ya daxili sənədi qəbul etməsi yolverilməzdir.
Əlbəttə, separatçı rejimin parlamentinin bəyanatındakı bir-birinə zidd ayrı-ayrı məqamları diqqətə çatdırmaq niyyətində deyilik. Görünən budur ki, Ermənistan daxilində olduğu kimi, separatçı rejimdəkilər də başlarını itiriblər. Bu durum ilahi ədalətin təntənəsidir və ilahi ədalət baxımından Qarabağ cəlladlarının düşdükləri miskin durumu təsvir etmək daha məntiqi olduğundan, onlardan daha ikisinin – separatçı rejimin sabiq rəhbərləri Arkadi Qukasyanın və Bako Saakyanın birgə qəbul etdikləri bəyanatın üzərində dayanaq.
Separatçılar bildiriblər ki, Ermənistan hakimiyyəti son illər “Artsax dövlətçiliyinə” şübhə yaradan çoxlu anlaşılmaz addımlar atıb. “Əlimizdə olan kanallar vasitəsilə biz bu cür davranışın zərərli nəticələri barədə xəbərdarlıq etməyə çalışdıq. Təəssüf ki, xəbərdarlığımız təsir vermədi. Danışıqlarda uğursuzluq, fəlakətli müharibə, indi isə düşmənin bütün tələblərini yerinə yetirmək məcburiyyətindəyik”, – deyən sabiq separatçı rəhbərlərin sözlərindən gəlinən qənaət də budur ki, Paşinyan Qarabağdakı erməni tör-töküntülərinin işinə qarışmamalıdır. Əlbəttə, nə Paşinyan, nə də dünya birliyi məsələnin qoyuluşunu belə görmür. Çünki Ermənistan erməni separatçılığı üçün məsuliyyət daşıyan tərəfdir və məsuliyyət həm də separatçılığın və avantürizmin aradan qaldırılmasına prinsipial yanaşma tələbi ön plandadır. Nikol, sadəcə, iş icraçısıdır. İşini nə qədər qüsursuz görsə, Ermənistan dövləti, ümumən erməni dövlətçiliyi üçün bir o qədər xeyirdir.
***
Sonda onu da deyək ki, baş nazir Nikol Paşinyanın mayın 22-də keçirdiyi mətbuat konfransında Qarabağın Azərbaycana məxsusluğunu bildiriməsi və Ermənistanın bunu tanımasına dair fikirləri ölkədə əsil siyasi kollaps yaradıb. Bu durumun daha müxtəlif detallarına da toxunmaq mümkündür. Ancaq ehtiyac duymuruq. Çünki ortadakı mənzərə eynidir. Mövcud situasiyada Ermənistanda yaxın perspektivdə hansı proseslərin yaşanacağı – Paşinyan iqtidarının təzyiqlər qarşısında duruş gətirib-gətirməyəcəyi maraq doğurmaqdadır.
Ə.CAHANGİROĞLU, “Xalq qəzeti”