Azərbaycan Ermənistanla sülh yaratmaq və regional əməkdaşlığı inkişaf etdirməklə bağlı həmişəki mövqeyini Münxen təhlükəsizlik konfransında bir daha ortaya qoydu. Prezident İlham Əliyev bəyan etdi ki, Ermənistanla Azərbaycan arasında sülh sazişi üzərində çalışmalar gedir: “Ümid edirik ki, biz bu işi gec yox, tezliklə tamamlayacağıq. Düşünürəm ki, bu, ciddi tarixi fikir ayrılığına malik olan ölkələrin bir araya gəlməsi və düşmənçilik səhifəsinin bağlanmasında yaxşı nümunə ola bilər”.
Eyni zamanda, komminukasıyaların açılması məsələsi də gündəmin vacib problemlərindədir. Azərbaycan Prezidenti fevralın 18-də Münxendə ABŞ-ın Dövlət katibi Entoni Blinken və Ermənistanın baş naziri Nikol Paşinyanla birgə görüşdə bir daha təklif edib ki, Ermənistan və Azərbaycan ikitərəfli qaydada nəzarət-buraxılış məntəqələrini Ermənistan–Azərbaycan sərhədində yaratsınlar. Azərbaycan liderinin sözlərinə görə, daha əvvəl bu təklif qeyri-rəsmi kanallar vasitəsilə çatdırılıb. Ancaq Ermənistan tərəfindən hər hansı mövqe səsləndirilməyib: “Amma ilkin təəssüratımız belədir ki, həm Avropada, həm Amerikada bizim bu təklifimiz məntiqli hesab olunur. Bu, hər iki ölkə arasındakı əlaqələrin normallaşmasında da, əlbəttə ki, önəmli amildir. Çünki biz sərhədlərin delimitasiyası haqqında danışırıqsa, nəzarət-buraxılış məntəqələri olmadan bu, mümkün deyil. Biz kommunikasiyaların açılması haqqında danışırıqsa, əlbəttə ki, həm Zəngəzur dəhlizinin hər iki başında, eyni zamanda, Laçın rayonu ilə Ermənistan arasındakı sərhəddə nəzarət-buraxılış məntəqələri yaradılmalıdır. Bu gün Dövlət katibi Blinkenin iştirakı ilə keçirilən görüşdə mən bunu rəsmən təklif kimi irəli sürdüm. Ermənistan tərəfindən cavab gözləyəcəyik”.
Hazırda söhbət faktiki olaraq, Zəngəzur dəhlizi və Laçın yolunda yaranmış böhranın aradan qaldırılmasından gedir. Nəzarət-buraxılış məntəqələrinin qurulması bu istiqamətdə açar rolunu oynaya bilər. Amma Rusiya, Azərbaycan və Ermənistan arasında razılaşmalarda, xüsusən 10 noyabr üçtərəfli Bəyanatında Zəngəzur dəhlizinə nəzarətin Rusiya tərəfinə həvalə olunması yer alıb. İndi Rusiya Zəngəzur dəhlizi ilə Türkiyəyə göndəriləcək yüklərinin Ermənistan, yaxud Azərbaycan tərəfindən yoxlamaya məruz qalmasına necə baxacaq?! Bu məsələ, əlbəttə, RF və Ermənistan arasında həll olunmalıdır. Çünki məlum bəyanatın Azərbaycanın digər ərazilərini Naxçıvan ilə birləşdirən yolun açılmasına dair müddəasının həyata keçirilməsinə hər iki ölkə məsul olsa da, buna 2 il ərzində nail olunmayıb. İndi isə kimlərsə məsələyə etiraz edəsi olsa da, Bakı və İrəvanın razılaşacağı təqdirdə, hər kəs bu qərarla, şübhəsiz ki, hesablaşmalı olacaq.
Nəzarət-buraxılış məntəqəsi məsələsi Azərbaycan və Ermənistan üçün olduqca vacibdir. Bu halda, Azərbaycan Qarabağa gələn maşın və yüklərin nədən ibarət olduğunu biləcək, separatçılar üçün silah-sursat daşınmayacaq, eyni zamanda, su bulandırmaq üçün regiona gələn Ruben Vardanyan kimilərin keçidinə imkan verilməyəcək. Ermənistana da Laçınla sərhəddə özünün məntəqəsini yaratmaq təklif olunur. Bu halda, İrəvan Laçın yolu ilə Qarabağa qeyri-humanitar yüklərdən başqa hər şey daşıya biləcək. Amma Ermənistan Laçın yolunun Rusiya sülh-məramlılarının nəzarətinə verilməsi, orada Azərbaycan məntəqəsinin olmaması fikrinin üzərində dayanacaqmı? Hər halda Münxen görüşündə söhbətsə ABŞ Dövlət Departamentinin rəhbəri Antoni Blinken də iştirak edib. Təbii ki, Ermənistan üçün qərar vermək asan olmayacaq.
Bəli, ötən iki il yarım ərzində edilmiş spekulyasiyalar indi Ermənistana baha başa gəlir. Vaxtilə erməni dırnaqarası siyasiləri və politoloqları Zəngəzur dəhlizinin açılmasını bütün Ermənistanın itirilməsi kimi təqdim edəndə bilməliydilər ki, sonra daha çətin olacaq.
Bu günlərdə “Şərəfim var” fraksiyasının katibi Tiqran Abramyan da yazıb ki, “Ermənistan və Qarabağ arasında mümkün Azərbaycan keçid məntəqəsinin yaradılması “Arsax”ın sonu olacaq”.
Onun sözlərinə görə, Münxendə Azərbaycan Prezidenti Ermənistanı Qarabağa birləşdirən marşrutun və Zəngəzurdan Naxçıvana gedən yolun eyni rejimdə işləməsi şərtini irəli sürüb və tələb edib ki, bu hissələrdə nəzarət-buraxılış məntəqələri müəyyən edilməlidir: “Əliyev deyir ki, əgər Ermənistan Zəngəzur dəhlizinin verilməsinin əleyhinədirsə, o zaman Laçın dəhlizi də statusdan məhrum olmalıdır. İstisna deyil ki, Azərbaycan əvvəldən dəhliz mövzusunu kompromis kimi istifadə edib və onun əsas məqsədi Ermənistanı Qarabağla birləşdirən yolda keçid məntəqəsinin quraşdırılmasına nail olmaqdır. Bu isə “Arsax” məsələsinin sonu olacaq”.
Bu cür yanaşmalarla, təbii ki, nə kommunikasiyaları açmaq, nə də sülhə nail olmaq mümkündür. Amma Azərbaycanda həmişə bəyan olunub ki, Zəngəzur dəhlizinin açılmasından ən çox Ermənistan qazanacaq. Ona görə də Paşinyan artıq “bir addım irəli, iki addım geri” prinsipi ilə hərəkət etməməlidir.
Bu gün top, həqiqətən də, Ermənistandadır. Görək Paşinyan onu rəqibin, yoxsa özünün qapısına vuracaq. Görək o, Bakının nəzarət-biraxılış məntəqələri ilə bağlı təklifini qəbul edəcəkmi? Bu, hazırda ən prinsipial məsələdir: həm kommunikasiyaların açılışı, həm delimitasiya və demarkasiya məsələsi, həm də ümumiyyətlə, sülh müqaviləsinin imzalanması baxımından. Yaxın günlərdə hər şey məlum olacaq...
Fərhad MƏMMƏDOV,
politoloq
Bu məsələyə iki aspektdən yanaşaq: Zəngəzur dəhlizi və Laçın yoli ilə bağlı. Ermənistanın uzun müddətdir Qərb ölkələri istiqamətində həyata keçirdiyi təbliğatın əsas hissəsi odur ki, Azərbaycan Zəngəzuru işğal etmək niyyətindədir ki, Zəngəzur dəhlizini açsın. Amma Azərbaycan Prezidentinin daha öncə – 2021-ci dekabrında Brüsseldə Zəngəzur dəhlizində nəzarət-buraxılış məntəqəsi quraşdırması ilə bağlı təklifi dəstəkləməsi Ermənistanın bu istiqamətdəki təbliğatının üstündən xətt çəkir. Yəni təsdiq olunur ki, Azərbaycanın Ermənistan ərazisinə iddiası yoxdur. Bu, birinci məqamdır.
İkinci məqam odur ki, Azərbaycan kommunikasiyaların açılmasında, eləcə də regional əməkdaşlıqda maraqlıdır. Buna görə Azərbaycan faktiki olaraq, nəzarət-buraxılış məntəqələrinin quraşdırılması ilə bağlı təklifi dəstəkləyir ki, bu, kommunikasiyaların açılması prosesinə təkan versin.
Eyni zamanda, Laçın yolunda, Ermənistanla şərti sərhəddə məhz Ermənisatan tərəfinə bu təklifin verilməsi, bu ümumi nəqliyyat kommunikasiyaları üzərində ölkələrin suverenliyinin bərqərar edilməsi istiqamətində olan bir təklifdir. Bu yanaşma, xüsusilə, Qərb tərəfindən dəstəklənir ki, eksterritorriallıq heç bir yerdə olmasın. Ələlxüsus da elə bir vaxtda ki, bu eksterritorriallığın üzərində Rusiyanın nəzarəti olsun. Belə olan halda Laçın yolunda da həm Ermənistan, həm də Azərbaycan tərəfindən bu cür məntəqələrin quraşdırılması məntiqlidir və bu yanaşmaya uyğundur. Bunun əsas mənası odur ki, əgər biz qarşılıqlı olaraq bir-birimizin ərazi bütövlüyünü tanıyırıqsa, məntəqələr quraşdırılır və Qarabağda yaşayan erməni əhaliyə də açıq mesaj verilir ki, Ermənistan bu ərazini Azərbaycan ərazisi kimi tanıyır.
İkinci açıq mesaj odur ki, təminat yolları (qaz, işıq, internet) ilə yanaşı, artıq fiziki olaraq yeganə yol sayılan Laçın yolu da Azərbaycanın nəzarətindədir və orada hər hansı qeyri-qanuni fəaliyyət həyata keçirilə bilməz. Bu, həm iqtisadi, həm də hərbi kontekstdə başa düşülməlidir.
Üçüncü çox maraqlı bir məqam odur ki, Azərbaycan tərəfi Laçın yolundan humanitar məqsədlərdən kənar istifadə olunduğunu bəyan edir: minalar, silah Ermənistan silahlı qüvvələrinin şəxsi heyəti Qarabağda qanunsuz iqtisadi fəaliyyətin nəticəsi olaraq, mis, qızıl daşınır və s. Ermənistan tərəfi isə bunu təkzib edir. Nəzarət-buraxılış məntəqələri bir daha təsdiq edəcək ki, bu yoldan ancaq humanitar məqsədlərlə istifadə edilir. Yəni, burada Ermənistan artıq öz yalanlarını etiraf etməkdən boyun qaçıra bilməyəcək və onun bu təkliflərə rədd cavabı da məhz Azərbaycan tərəfinin fikirlərində, iddialarında düzgün olmasını, Ermənistanın isə yalan danışmasını bir daha sübuta yetirəcək.
Paşa ƏMİRCANOV,
“Xalq qəzeti”