BMT-nin Ərzaq və Kənd Təsərrüfatı Təşkilatının (FAO) bu il Azərbaycanda torpaqların deqradasiyasının neytrallığı ilə bağlı həyata keçirəcəyi 4 illik layihə ölkədə əkinə yararlı torpaqların mövcud vəziyyətinin qiymətləndirilməsinə imkan yaradacaq.
FAO-nun Azərbaycandakı nümayəndəsinin köməkçisi Bariz Mehdiyev mətbuata açıqlamasında daha sonra 2 milyon ABŞ dolları dəyərində həmin layihənin Qlobal Ekoloji Fond tərəfindən maliyyələşdirildiyini bildirib.
“Layihə artıq təsdiq edilib. Onun icrasında əsas məqsəd torpaqların deqradasiyasının neytrallığı ilə bağlı göstəricilərin müəyyənləşdirilməsidir. Layihə çərçivəsində pilot fəaliyyətlər icra ediləcək. Azərbaycan hökuməti bunun üçün Abşeron yarımadasını seçib, amma bu, o demək deyil ki, başqa ərazilər seçilə bilməz. Hökumətlə aparılacaq danışıqlar nəticəsində işğaldan azad edilmiş ərazilərdə də pilot fəaliyyətlər icra edilə bilər. Təbii ki, bunun üçün həmin ərazilərin minalardan təmizlənməsi başa çatdırılmalıdır”, – deyə FAO rəsmisi qeyd edib.
O, eyni zamanda əlavə edib ki, SSRİ dövründə Azərbaycanda torpaqların 53 faizinin əkinə yararlı olması müəyyən edilsə də, bu, dəqiq göstərici deyil və inventarizasiya işlərinin aparılmasını tələb edir. Həmin rəqəm ötən əsrin 50-ci illərində aparılmış inventarizasiyanın nəticəsidir. Həmin dövrün metodikası ilə indiki dövrün metodikası eyni deyil. O vaxt peyk təsvirləri yox idi. Həmin layihə bu istiqamətdə mövcud vəziyyəti qiymətləndirməyə imkan verəcək. Nəticədə, Azərbaycanda torpaqların əkinə yararlılıq göstəricisi dəyişə bilər.
“Xalq qəzeti”
