Fransa və Çin liderləri danışıqlardan sonra birgə bəyannamə qəbul ediblər. Bəyannamənin mətni Yelisey sarayının saytında dərc olunub.
Bəyannamədə bir neçə əsas məqam vurğulanır. Xüsusilə, tərəflər siyasi dialoqun gücləndirilməsi və qlobal təhlükəsizliyin gücləndirilməsinin zəruriliyini qeyd ediblər.
Fransa və Çin qarşılıqlı anlaşmanı gücləndirmək məqsədi ilə strateji məsələlər üzrə mübadilələri və xüsusən də Çin Xalq Azadlıq Ordusunun Cənub Bölgəsi ilə Fransanın Asiya və Sakit Okeandakı Qüvvələr Komandanlığı (ALPACI) arasında dialoqu dərinləşdirmək barədə razılığa gəliblər.
Tərəflər Çin, Fransa, Rusiya, Böyük Britaniya və ABŞ dövlət və hökumət başçılarının nüvə müharibəsinin və silahlanma yarışının qarşısının alınmasına dair 3 yanvar 2022-ci il tarixli Birgə Bəyanatını dəstəklədiklərini bir daha təsdiq ediblər. Bəyanatda qeyd edildiyi kimi, “nüvə müharibəsi qalib gələ bilməz və heç vaxt aparılmamalıdır”. İki ölkə gərginlik riskini artıra biləcək hər hansı hərəkətdən çəkinməyə çağırır.
Bəyannamədə qeyd olunur ki, 2015-ci ildə İranın Birgə Hərtərəfli Nüvə Fəaliyyət Planının (JCPOA) yekunlaşması çoxtərəfli diplomatiyanın mühüm nailiyyəti olub. Fransa və Çin “İranın nüvə problemi”nin siyasi və diplomatik yolla həllinə yardım etmək öhdəliyini təsdiqləyiblər. Onlar beynəlxalq nüvə silahının yayılmaması rejimini və Təhlükəsizlik Şurasının qətnamələrinin nüfuzunu və effektivliyini qoruyub saxlamaq öhdəliyini təkrarlayıblar. Bu kontekstdə onlar Beynəlxalq Atom Enerjisi Agentliyinə dəstəklərini bir daha bəyan ediblər.
"Xalq qəzeti"
