Aprelin 27-də Azərbaycan Memarlıq və İnşaat Universitetində (AzMİU) tələbə və məzunların peşəkar inkişafına, əmək bazarına inteqrasiyasına və iş dünyası ilə əlaqələrinin gücləndirilməsinə xidmət edən “Karyera Həftəsi”nə start verilib. Mayın 1-dək davam edəcək layihə çərçivəsində tələbələr üçün müxtəlif istiqamətlər üzrə seminarlar, təqdimatlar, praktik sessiyalar, açıq qapı günləri və maarifləndirici görüşlər keçiriləcək.
AzMİU-da ənənəvi xarakter alan bu təşəbbüs universitet–sənaye əməkdaşlığının genişləndirilməsi, tələbələrin real iş mühiti ilə erkən tanışlığı və onların peşəkar bacarıqlarının inkişafı baxımından mühüm əhəmiyyət daşıyır. “Karyera Həftəsi” tələbələrə nəzəri biliklərini praktik müstəvidə sınamaq, müasir əmək bazarının tələblərini yaxından öyrənmək və gələcək karyera istiqamətlərini daha düzgün müəyyənləşdirmək imkanı yaradır.
Tədbirin proqramı zənginliyi və çoxşaxəliliyi ilə seçilir. SOCAR, Qarabağ İqtisadi Rayonunda Bərpa, Tikinti və İdarəetmə Xidməti publik hüquqi şəxs, PMD Projects, Kristal, “Azərkosmos”, “Bridge” Şirkətlər Qrupu, “Buxar Mühəndislik” MMC, “MBM Group” MMC, Azərbaycan Respublikası Elm və Təhsil Nazirliyi Riyaziyyat İnstitutu, “ArchiCO” MMC və digər nüfuzlu qurumların nümayəndələrinin iştirakı ilə keçirilən sessiyalarda coğrafi informasiya sistemləri, süni intellekt əsaslı karyera planlaşdırması, sənayedə praktiki bacarıqlar, gömrük prosedurları, neftçıxarma sektorunda texnoloji həllər və yaşıl memarlıq kimi aktual mövzular müzakirə olunur.
Bununla yanaşı, tikinti sektorunda BIM texnologiyalarının tətbiqi, rəqəmsal yaradıcılıq, funksional dizayn, meliorasiya işləri, davamlı inkişaf, təhsil sahəsində yeni yanaşmalar və innovativ idarəetmə modelləri üzrə paralel sessiyalar təşkil edilir. Bu isə tələbələrə müxtəlif sahələr üzrə seçim etmək, maraq dairələrinə uyğun yeni bilik və bacarıqlar qazanmaq imkanı verir.
“Karyera Həftəsi”nin növbəti günlərində AutoCAD proqramının tətbiqi, su ehtiyatlarının inteqrasiyalı idarə olunması, monolit dəmir-beton konstruksiyaların tikintisi, mentorluq və şəxsi inkişaf bacarıqları, geofiziki tədqiqat üsulları, informasiya təhlükəsizliyi, rəqəmsallaşma, süni intellektin əmək bazarına təsiri, fotoqrammetriya və xəritəçilik kimi istiqamətlərdə seminarlar keçiriləcək.
Eyni zamanda, əmək bazarında mövcud trendlər, insan resursları siyasəti, işə qəbul mərhələləri, innovativ texnologiyalarda təhlükəsizlik qaydaları və peşəkar şəbəkələşmə imkanları ilə bağlı sessiyalar da təşkil olunacaq.
Elmi-tədqiqat və mühəndislik istiqamətləri də proqramda geniş yer tutur. İşğaldan azad edilmiş ərazilərdə abidələrin monitorinqi, ekourbanizm, davamlı şəhərlərin inkişafı, elmi mövzuların seçilməsi, tədqiqatların aparılması metodologiyası, beton və armatur işləri, sənaye binalarının layihələndirilməsi, eləcə də daşınmaz əmlakın qiymətləndirilməsində süni intellekt əsaslı ekonometrik modellərin tətbiqi kimi mövzular üzrə müzakirələr aparılacaq.
Ümumilikdə onlarla yerli və beynəlxalq şirkət, dövlət qurumu və təşkilatın iştirakı ilə keçirilən “Karyera Həftəsi” AzMİU tələbə və məzunlarına iş dünyasının aparıcı nümayəndələri ilə birbaşa ünsiyyət qurmaq, peşəkar əlaqələr yaratmaq, təcrübə və iş imkanları barədə məlumat əldə etmək baxımından mühüm platforma təqdim edir.
Qeyd edək ki, AzMİU-da keçirilən bu kimi təşəbbüslər universitetdə təhsil alan gənclərin əmək bazarına inteqrasiyasını sürətləndirməklə yanaşı, onların nəzəri biliklərini praktik bacarıqlarla zənginləşdirərək rəqabətqabiliyyətli və müasir çağırışlara cavab verən mütəxəssis kimi formalaşmalarına mühüm töhfə verir.
