Bakı Dövlət Universitetinin Multimedia və Elektron Kommunikasiya kafedrasının müdiri, professor Qulu Məhərrəmlinin 70 illik yubileyinə həsr olunan "Azərbaycan televiziyası müstəqillik illərində: əsas inkişaf tendensiyaları" mövzusunda elmi sessiya keçirilib.

Sessiyanı açan Azərbaycan Mətbuat Şurasının sədri Rəşad Məcid çıxışında  Qulu Məhərrəmlinin Azərbaycan jurnalistikasında xüsusi yer tutduğunu vurğulayıb. O, qeyd edib ki, Qulu Məhərrəmlinin adı Azərbaycan televiziyası ilə sıx bağlıdır və onun verilişləri ilə böyüyən bir neçə nəsil yetişib. Televiziya tənqidçisi və jurnalistika mütəxəssisi kimi tanınan Qulu Məhərrəmli bu gün də jurnalistika sahəsindəki fəaliyyətini davam edir.

BDU-nun rektoru Elçin Babayev yubiley münasibətilə təbrikində, Azərbaycanda “telejurnalistika” və “televiziya tənqidi” sahələrində ilk növbədə Qulu Məhərrəmlinin adının çəkildiyini vurğulayıb və qeyd edib: “Qulu Məhərrəmli böyük istedad sahibi olan, geniş elmi biliyə malik maraqlı şəxsiyyət və əsl pedaqoqdur. Onun nəzəriyyə ilə təcrübəni müvəffəqiyyətlə birləşdirə bilməsi  müəllimlik qabiliyyətini önə çıxarır. 1991-ci ildən BDU-da çalışan Qulu Məhərrəmli universitetimizin dəyərli professorudur. Eyni zamanda, o, ictimai sahədəki fəaliyyəti ilə də diqqət çəkir, Jurnalistika fakültəsindən Azərbaycan Mətbuat Şurasında təmsil olunan iki əməkdaşımızdan biridir”.

Son illər BDU-da aparılan islahatlar çərçivəsində Jurnalistika fakültəsində əsaslı keyfiyyət dəyişikliyinin yarandığını vurğulayan rektor gənc jurnalistlərin yetişməsində və əmək bazarının tələblərinə uyğun peşəkar kadr kimi formalaşmasında Qulu Məhərrəmli kimi alimlərin böyük rolunun olduğunu diqqətə çatdırıb.

“Azərbaycan Televiziya və Radio Verilişləri” Qapalı Səhmdar Cəmiyyətinin sədri, filologiya elmləri doktoru Rövşən Məmmədov Qulu Məhərrəmlinin Azərbaycan televiziya məktəbinin simalarından biri olduğunu vurğulayaraq onun ünsiyyət mədəniyyəti, jurnalist etikası və audiovizual nitq kimi sahələrdə dəyərlər yaratdığını qeyd edib. Digər media mütəxəssisləri Rəşad Məcid, Cahangir Məmmədli, Xatirə Hüseynova və Vüqar Əliyev müvafiq olaraq Qulu Məhərrəmlinin publisistikası, yaradıcılığı, televiziya tənqidi və jurnalistika təhsili mövzularında məruzələr ediblər.

Elmi sessiyada BDU-nun rektoru Elçin Babayev professor Qulu Məhərrəmliyə uzunmüddətli səmərəli elmi-pedaqoji fəaliyyətinə, gənc nəslin vətənpərvərlik ruhunda tərbiyəsində xidmətlərinə, universitetin ictimai həyatında fəal iştirakına görə və 70 illik yubileyi münasibətilə Fəxri Fərman təqdim edib.

Sonda söz alan rofessor Qulu Məhərrəmli elmi-pedaqoji və jurnalist fəaliyyətinə verilən dəyərə görə təşəkkür edib.

XQ