Birləşmiş Millətlər Təşkilatının (BMT) Elektron Hökumətin İnkişaf İndeksi (EGDI) üzrə 2024-cü il hesabatında ölkəmiz irəliləyiş əldə edib və indeksin ən yüksək kateqoriyası hesab edilən “Very High EGDI” ölkələrin sırasına daxil olub.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İctimaiyyətlə əlaqələr şöbəsindən  bildirilib ki, Elektron Hökumət üzrə Sorğu BMT tərəfindən iki ildən bir keçirilir.

BMT-nin EGDI üzrə 2024-cü il hesabatı 2023-cü ilin may ayına qədər olan göstəricilər əsasında hazırlanıb.

Hesabatda həmin dövr üçün ölkəmiz adından “ASAN xidmət” tərəfindən uğurla həyata keçirilən elektron hökumət və innovasiyalar üzrə layihələr də yer alır.

“Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi olaraq reytinqdə ölkəmizin mövqeyinin güclənməsinə töhfə verməkdən qurur duyuruq.

Əminik ki, dövlət qurumlarının əlaqəli fəaliyyəti və səyləri nəticəsində adıçəkilən reytinqdə ölkəmizin müsbət tendensiyası gələcək illərdə də davam edəcəkdir”, - deyə Dövlət Agentliyinin açıqlamasında bildirilib.