Ulu öndər Heydər Əliyev “Kommunist” qəzetinin 50 illik yubileyində Azərbaycan dilində nitq söyləmişdir

Mən bir dəfə söylədim ki, keçmişdə sovet hakimiyyəti dövründə, Sovet İttifaqı Kommunist Partiyasının liderləri içərisində başqalarına nisbətən mətbuatla ən yaxın olan adam mən olmuşam. Ən dost olan adam mən olmuşam. Bu, mənim xarakterimdədir, xasiyyətimdədir. Mən həmişə mətbuatla maraqlanmışam, qəzet-jurnalları oxumuşam, radio-televiziyada verilən məlumatlara həmişə diqqətlə yanaşmışam. Ona görə də jurnalistika sənəti mənə çox yaxın olubdur...

Ulu öndər bu fikirlərini 2002-ci il martın 22-də “Hyat Regency– Naxçıvan” hotelində keçirilən təntənəli mərasimdə ona “RUH” Azərbaycan Jurnalistləri Müdafiə Komitəsinin “Jurnalistlərin dostu” mükafatı təqdim edilərkən geniş nitqində söyləmişdir.

Ömrünün 60 ildən çoxunu Azərbaycan mətbuatına həsr etmiş, hadisələrin qaynağında olmuş və Ümummilli liderimizin siyasi fəaliyyətini yaxından izləmiş qocaman jurnalist kimi, bu faktların təsdiqinin dəfələrlə şahidi olmuşam. Bu qeydlərimdə onlardan biri haqqında, düz 55 il bundan əvvəl – 1969-cu il sentyabrın 18-də Azərbaycan Dövlət Dram Teatrında “Kommunist” qəzetinin (indiki “Xalq qəzeti”) 50 illik yubileyinə həsr olunmuş təntənəli tədbirdən söz açacağam. Mən həmin mərasimin bilavasitə iştirakçısı olmuşam. 

O vaxt İrəvanda Azərbaycan dilində çıxan “Sovet Ermənistanı” qəzetində partiya həyatı şöbəsinin müdiri işləyirdim. 1969-cu ilin sentyabr ayında məni redaksiyadan Bakı Ali Partiya Məktəbinə bir aylıq kursa göndərdilər. Arada vaxt tapıb “Kommunist” qəzetinin redaksiyasına da gedib-gəlirdim. Əvvəllər də dəfələrlə bu redaksiyada olmuşdum. Onların arasında özümə tanış və dostlar tapmışdım. Mənim üçün həm əlamətdar, həm də xoş idi ki, əvvəllər qəzetdən – imzadan tanıyıb-bildiyim qələm sahibləri ilə indi üzbəüz görüşür, söhbət edir, maraq göstərdiyim məsələlərə dair suallarıma cavablar da alırdım.

Növbəti gəlişimdə dostlar mənə bir dəvətnamə də hədiyyə etdilər. Bu, qəzetin ilk nömrəsinin çapdan çıxmasının 50 illiyinə həsr olunmuş tədbirə rəsmi dəvət idi.

Çox sevindim. Azərbaycanda iki ay idi ki, rəhbərlik dəyişmiş,  Heydər Əliyev Azərbaycan Kommunist Partiyası Mərkəzi Komitəsinin birinci katibi seçilmişdi. Fikirləşdim ki, yaxşı oldu. Yəqin ki, bu fürsət sayəsində yeni rəhbəri də görər, səsini eşidərəm. Çünki o vaxt respublikanın yeni sahibi, demək olar ki, televiziyaya çıxmırdı və Bakının özündə onu görməyə can atanların da sayı-hesabı yox idi.

Heydər Əliyev digər rəhbərlərin əhatəsində salona daxil olanda hamı onu gürultulu alqışlarla ayaq üstündə qarşıladı. Heydər Əliyevin çıxışına Azərbaycan dilində başlaması hamını heyrətə salmışdı. Çoxlarının sualdolu nəzərləri biri-birinə dikilmişdi. Bu baxışlardan aydınca duyulan tədbir iştirakçılarının, o cümlədən rəsmi şəxslərin qəlbində bir şübhə yaratmışdı: görəsən, bunun fəsadları, düşər-düşməzi olmayacaq ki?!

Burada onu da deyim ki, o dövrdə bu qəbildən olan tədbirlərdə müttəfiq respublikaların rəhbərləri, həmçinin digər rəsmi şəxslər yalnız rus dilində çıxışlar edir, məruzələr söyləyirdilər. Ulu öndər Heydər Əliyev isə ilk dəfə  olaraq bu tendensiyanı pozdu, doğma ana dilində nitq söylədi.

Haşiyə: Burada bir məsələni deməyə bilmərəm. Son illərdə bəzi tarixçilər və yazarlar belə bir səhvə yol verirlər ki, guya, Heydər Əliyev Azərbaycan KP MK-nın birinci katibi seçiləndən sonra ilk dəfə Azərbaycan Dövlət Universitetinin  (indiki BDU) 50 illik yubileyində iştirak edib və ilk dəfə orada ana dilimizdə nitq söyləyib. Halbuki, “Kommunist” qəzetinin 50 illik mərasimi Azərbaycan Dövlət Universitetinin yubileyindən 42 gün öncə keçirilmişdi. Ulu öndər ilk dəfə məhz  həmin tədbirdə doğma ana dilimizdə nitq söyləmişdir. 

Mən bu iradımı tarixçilərə ona görə söylədim ki, çox uzaq deyil, aradan cəmi 55 il ötür. Belə səhvlərə və təhriflərə yol verdiyimizdəndir ki, erməni tarixçiləri və yazarları doğru-dürüst yazdıqlarımıza da inanmırlar, özləri isə eramızdan əvvəl baş vermiş hadisələrin nəinki ilinin, ayının, hətta gününün davasını eləyir və bir-birini təsdiqləyirlər.

Ulu öndər nitqində bildirdi ki, bu gün biz respublika qəzeti “Kommunist”in  birinci nömrəsinin çapdan  çıxmasının 50 illiyini  qeyd edirik. Bu yubiley böyük siyasi hadisədir. Sovet Azərbaycanının bütün mətbuatının  bayramıdır. Bütün respublika zəhmətkeşlərinin fərəhli günüdür. Partiya və hökumət  “Kommunist” qəzetinin xidmətlərini yüksək qiymətləndirərək, onu Qırmızı Əmək Bayrağı ordeni ilə  təltif etmişdir.  Azərbaycan Kommunist Partiyasının  Mərkəzi Komitəsi, Respublika Ali Sovetinin Rəyasət Heyəti və Nazirlər Soveti “Kommunist” qəzeti redaksiyasının kollektivini, fəhlə və kəndli müxbirlərini,  bütün oxucularını bu şərəfli mükafat  münasibətilə  səmimi-qəlbdən təbrik edirlər. 

Heydər Əliyev qeyd etdi ki, “Kommunist” qəzeti həmişə yeni həyat uğrunda çarpışanların ön sıralarında getmişdir. Çoxlarının  yaxşı yadında olar ki, bir vaxtlar  Bakı fəhlələri  vətənpərvərcəsinə  belə bir mübariz şüar  irəli sürmüşdülər: “Neft beşilliyini iki il yarıma yerinə yetirək!”  “Kommunist” qəzeti də o zaman  böyük Sovetlər ölkəsinə son dərəcə lazım olan  neftlə, obrazlı desək,  nəfəs alır, şanlı Bakı neftçiləri ilə birlikdə  əmək növbəsində  durur, neft quyuları qazmaqda, neft fontanlarını ram etməkdə onlara kömək edirdi.  O,  qanuni iftixar hissi ilə neftçilərlə birlikdə  Vətənə və partiyaya beşillik planın  vaxtından əvvəl yerinə yetirildiyi haqqında  raport vermişdi. 

Qəzet kənd təsərrüfatının kollektivləşdirilməsi, kolxoz quruluşuna, Sovet hakimiyyətinə əl qaldıran qolçomaqların ləğv edilməsi uğrunda çarpışan mübarizlərin də ilk sıralarında gedirdi.

Böyük Vətən müharibəsi başlandıqda  isə “Kommunist” qəzeti müharibənin ilk günlərindən öz kəsərli silahını azğın düşmənə yönəltmişdi...  Onun hiddət dolu sətirləri  Azərbaycanın mərd övladlarını döyüşə çağırır, onları faşizm üzərində tam qələbə çalmağa ruhlandırırdı.  Cəbhədən alınıb qəzetin səhifələrində  dərc olunan xəbərlər arxa əməkçilərinin qoluna onqat qüvvət  verir, onları sovet xalqının müqəddəs qələbəsi naminə fədakar əməyə ruhlandırırdı.

Qəzet müharibədən sonrakı dövrdə də öz vəzifəsini şərəflə yerinə yetirirdi. İndi artıq onun səsi  Mingəçevirdən, Neft Daşlarından, Sumqayıtdan gəlirdi.  O xalqla birlikdə yüksək binalar ucaldır,  neft və qaz kəmərləri çəkir, metro tikir,  yazıçılarla və mədəniyyət xadimləri ilə birlikdə ədəbiyyatımızı və incəsənətimizi zənginləşdirirdi. 

1970 – 1980-ci illərdə kənd təsərrüfatının sürətli inkişafı bir sıra amilə söykənirdi. Bunun ən başlıcası o idi ki, möhtərəm Heydər Əliyevin şəxsi təşəbbüsü ilə  rayonlarda keçirilən səyyar  müşavirələr ənənə şəklini  almışdı. İl ərzində bəzən  dörd dəfə  belə müşavirə keçirilirdi.  Həmin  müşavirələrin  gedişi  geniş işıqlandırılmaqla yanaşı, orada  söylənilən tənqidi qeydlərin,   nöqsanların  aradan qaldırılması uğrunda qəzetin səhifələrində, sözün əsl mənasında, ciddi mübarizə aparılırdı. 

Bu mübarizə erməni separatçılarının Vətənimizin ayrılmaz hissəsi olan Dağlıq Qarabağın Ermənistana birləşdirilməsi barədə çıxardıqları qərarlardan sonra daha  da  şiddətləndi. Qəzetin kollektivi müsəlləh əsgər kimi ölkənin ərazisinin bölünməzliyi uğrunda döyüşə qalxdı. Qəzet  səhifələrində Dağlıq Qarabağ məsələsi geniş müzakirə obyektinə çevrildi, separatçıları dəstəkləyən Moskvanın mövqeyi  kəskin tənqid olundu. 

1990-cı  ilin qanlı Yanvar hadisələrindən sonra mövcud quruluşa qarşı mübarizədə qəzet xalqın tribunasına çevrildi, müstəqillik ideyaları ilk dəfə buradan dünyaya bəyan olundu. Yeni  həyat uğrunda  mübarizədə xalqın mənafeyini hər şeydən üstün tutduğuna görə, ümummilli liderimiz Heydər Əliyev siyasi hakimiyyətə qayıdanda “Xalq qəzeti”ni yenidən öz himayəsinə götürdü.

Azərbaycan Respublikasının Prezidenti Heydər Əliyev qəzetin 75 illik yubileyi münasibətilə kollektivə ünvanladığı təbrik məktubunda  (25 avqust 1994-cü il) yazırdı: “Xalq qəzeti” mənalı yaradıcılıq yolu keçmiş, özünəməxsus üslub və  sənətkarlıq xüsusiyyətləri  olan nəşrlərimizdəndir. Uzun müddət “Kommunist”  adı  ilə nəşr  edilən bu qəzet bütün Sovet dövrü  ərzində Azərbaycanın ictimai, iqtisadi və mədəni həyatının güzgüsü olmuşdur.

Respublikada qəzetçilik ənənələrinin fornalaşmasında,  jurnalistikamızın inkişafında “Xalq qəzeti”nin xidmətləri  xüsusi  qeyd olunmalıdır. Bugünkü çoxşaxəli, rəngarəng Azərbaycan mətbuatının bir sıra görkəmli nümayəndələri bu qəzetin  yaradıcılıq məktəbini  keçmişdir. Müstəqilliyimizin qazanılmasından sonra da “Xalq qəzeti” respublikanın  ictimai həyatında  baş verən  hadisələrə cəsarətlə müdaxilə etmiş,  bir çox problemlərin aşkarlanmasında mühüm rol oynamışdır. Amansız təcavüzkara  qarşı  apardığımız ədalətli mübarizə  qəzetin daimi mövzusuna  çevrilmişdir. Bu gün qəzet müstəqil Azərbaycanda hüquqi  və  demokratik dövlət quruculuğu işində güclü səfərbəredici rol oynayır”.

Bu gün iftixar hissi ilə deyirik ki, “Xalq qəzeti” milli dildə çıxan ən uzun ömürlü mətbuat orqanımızdır. 105 ilin bütün qovğalarına baxmayaraq, o, xalqımıza, Vətənimizə vicdanla xidmət edib. Çünki burada çalışanlar həmişə dövlətə, dövlətçiliyə, xalqımızın  tarixinə, milli-mənəvi dəyərlərinə, dilinə, dininə, adət və ənənələrinə sadiq olub, onu qoruyub, yaşadıblar. Yoxsa, söz sərrafı olan Ümummilli  liderimiz bu qəzetin fəaliyyətinə böyük qayğıkeşliklə  yanaşmaz, onun xidmətlərini  belə  yüksək qiymətləndirməzdi. 

Əsgər ƏSGƏROV, 
“Sovet Ermənistanı” qəzetinin sabiq məsul katibi, AJB-nin üzvü