Sirkə orqanizmdə bakteriya və virusları məhv edən ən təbii içkilərdən biridir. Türkiyəli professor, dietoloq həkim Canan Karatayın sözlərinə görə, sirkə 7 min ildir istifadə edilən təbii dərmandır.
O, ev sirkəsinin ən sağlam içki olduğunu diqqətə çatdırıb. İnsanlara müraciətlə “Xahiş edirəm bundan istifadə edin”, – deyən professor sirkəni mütləq evdə hazırlamağı məsləhət görüb. C.Karatay qeyd edib ki, bazar və marketlərdə satılan sirkədən məişətdə təmizlik üçün istifadə etmək daha məqsədəuyğundur.:“Ev sirkəsi özünüz hazırladığınız zaman ən sağlam içkidir. Hər cür paraziti öldürür, toksinləri çıxarır, orqanizmi təmizləyir”.
Professor təbii sirkəni səhər saatlarında içməyi və ya salatlara əlavə etməyi məsləhət görüb. O, əlavə edib ki, evdə hazırlanmış sirkədən 2 ay istifadə etmək olar.
C. Karatay təbii alma sirkəsini hazırlamağın qaydasını da izah edib: “Evdə alma sirkəsi hazırlamaq üçün sizə alma, içməli su, təbii fermentləşdirilmiş alma sirkəsi, şüşə qab və istilik saxlaya bilən örtük lazımdır. Almalar yuyulduqdan sonra doğrayıb bankaya qoyun və onların üzərini örtəcək qədər içməli su əlavə edin. Sonra 1 stəkan fermentləşdirilmiş alma sirkəsini də buraya qatın. Qarışdırdıqdan sonra üzərini örtüb qaranlıq yerdə saxlayın”.
Z.HÜSEYNLİ
XQ
