Əvəz RÜSTƏMOV
[email protected]
Sosial şəbəkələrdə nalayiq olduğu bildirilən geyimdə (geyimə qiymət vermək istəmədiyim üçün belə yazdım) olan xanımın mağazadan qovulması səhnəsini əks etdirən videogörüntülər yayılıb. Xanımı qınayanların, sanki növbəyə durduqlarına dair təəssürat var. Bu barədə bir neçə məqama diqqət yetirmək istərdim.
Bəli, kimsə kiminsə geyimini düzgün saymaya bilər. Hər kəs nalayiq bildiyi geyimdə olan şəxsin obyektinə daxil olmağına, ümumən orada görünməyinə şərait yaradıb-yaratmamaqda da sərbəstdir. Ancaq bu durumda düzgün saymadığım məsələ nalayiq kimi qələmə verilən geyimi geyinənin görüntülənməsi və həmin görüntünün sosial şəbəkələrdə, ən başlıcası isə ayrı-ayrı media orqanlarında yayılmasıdır. O media orqanlarında ki, cəmiyyətdə ictimai fikri formalaşdırmaq missiyasını üzərilərinə götürdüklərini bildirirlər. Görəsən, belədirmi?
Qınaqdan danışırdım, axı, ictimai qınaqdan. Onun yol verilən hədləri var. Əlbəttə, sosial şəbəkə iştirakçıları bu barədə xəbərsiz ola bilərlər. Təəssüf ki, bəzi media qurumları da prosesdə fəal iştirak edirlər. Fikrimcə, ən pisi elə budur. Çünki onların sayəsində hadisə daha geniş təbliğ olunur, ictimai obraz qazanır. Müvafiq olaraq ictimai qınaq da əndazəni aşır, ona tünd rəng çalarları əlavə olunur, linç elementləri yaranır. Linç isə ona məruz qalan şəxsi aqressivləşdirir. Həmin şəxs daha əzmlə özünü cəmiyyətə müxalif görməyə başlayır. Hərəkəti səhvdirsə, səhvini daha da dərinləşdirir. Qısaca, "ho ha" var dağa qaldırır, "ho ha" da var dağdan endirir. Buna diqqət edirikmi? Təəssüf ki, yox.
Digər tərəfdən, biz hüquqi dövlətdə yaşayırıq. Təsəvvür edin ki, əxlaqından və mənəvi keyfiyyətlərindən asılı olmayaraq, sıravi şəxs özünün icazəsi olmadan görüntülənir və həmin görüntü yayılır. Adama qarşı təhqirlər bir-birini sıralayır. Budurmu hüquqi dövlət anlayışı? Qəribəsi isə odur ki, bir qayda olaraq, geyiminə görə kimisə linç edənlər sonradan özlərinin üzləşdikləri hansısa qanunsuzluqdan söz açırlar. Axı elementar məntiq var: Sən əlinə düşən ilk fürsətdəcə qanuna məhəl qoymursansa, başqasının əlində daha böyük imkanlar olub bunu edirsə, niyə şikayətlənməlisən? Fikrimcə, ictimai qınaq heç bir halda qanunçuluğu ikinci plana atmamalıdır. Birincidə ikincinin təbiəti mütləq qaydada qorunmalı, hiss edilməlidir.
Başqa bir məqama diqqət yetirək. Daha doğrusu, indiki halda bu məqama diqqət yetirməli olan jurnalist cameəsidir. Nəzərə alaq ki, nalayiq geyimdə olduğu bildirilən xanım vəzifə sahibi deyil, xalqın, millətin taleyinə görə cavabdehlik daşımır. Yəni, videogörüntüyə alınaraq ictimai qınaq hədəfinə çevrilməli olan subyekt sayıla bilməz. Deməli, onun hərəkətinin də cəmiyyətdə mənəvi tərbiyə xüsusunda qiymətləndirilməsi yolverilməzdir. Media bu təbliğatda iştirak edirsə, istər-istəməz onun ictimai missiyası arxa plana keçir. Bu halda demək olmaz ki, media sosial şəbəkələrlə rəqabətdə uduzmaq istəmədiyindən dövrün tələbi ilə uyğunlaşmaq məcburiyyətindədir. Çünki jurnalistika heç bir halda cəmiyyət üçün real fayda amilini unutmamalıdır.
Cəmiyyət rəngarəngdir. Onda tərbiyəli-tərbiyəsiz, əxlaqlı-əxlaqsızlar, şərəfli və şərəfsizlər var. Hesab edək ki, haqqında söz açdığımız xanım nalayiq geyimdə mağazaya daxil olmaqla, ümumən ictimai yerdə görünməklə səhvə yol verib. Məsələnin geniş ictimai müzakirəyə çıxarılması şəxsin səhv addımının təbliğidir. Səhvə yol verən şəxs istər-istəməz kultlaşır, hamı tərəfindən etalona çevrilir. Bu, yolverilməzdir. Həm də ona görə yolverilməzdir ki, cəmiyyətdə ayıb da, ayıb olmayan da bizimdir. Hər ayıb deyilməməli, haqqında söhbət açılmamalıdır. Bineyi-qədimdən abıra bükülmək kimi bir deyim də var.
Nəhayət, bir məqamı da vurğulayım. Nalayiq geyimdə olan şəxsi – xanımı görüntüyə alan və bu görüntünün ictimai qınaq, ümumən diskussiya predmetinə çevrilməsinə şərait yaradanlar, o cümlədən, məsələni xəbər kimi yayan media orqanları daha ziyanlıdırlar, nəinki həmin geyimdə yola çıxmağı özünə rəva bilən şəxs. İstər mənəvi baxımdan, istərsə də hüquqi nöqteyi-nəzərdən onların hərəkətinə bəraət yoxdur.