Söhbət Qarabağ xanlarının əbədiyyət ünvanının öyrənilməsindən və bərpasından gedir
Xəbər verdiyimiz kimi, Azərbayan Prezidenti İlham Əliyev və Birinci vitse-prezident Mehriban Əliyeva bu günlərdə Ağdamda olarkən şəhərin keçmişində “İmarət” adı ilə tanınan tarixi kompleksə də baş çəkmiş, burada aparılan elmi-tədqiqat və bərpa-quruculuq işləri ilə tanış olmuşlar. Xatırladaq ki, dövlət başçısı işğaldan azad edilmiş Ağdam şəhərində dövlət bayrağımızı ucaldarkən ilk baş çəkdiyi ünvanlardan biri Qarabağ xanlarının ata-baba mülkü və axirət evi olan “İmarət” tarixi kompleksi olmuşdu. Prezident o zaman Qarabağın keçmişi ilə bağlı bu önəmli tarixi məkanın tədqiq edilməsi və layiqincə bərpa edilməsi barədə göstəriş və tövsiyələrini vermişdi.
Ötən müddətdə Mədəniyyət Nazirliyinin Mədəni İrsin Öyrənilməsi və Bərpası Xidməti və Milli Elmlər Akademiyasının tarix, arxeologiya, etnoqrafiya qurumları bu qiymətli tarixi məkanda geniş tədqiqat və axtarış işləri aparmış, Qarabağ xanları ailəsinin tarixi ilə bağlı bir çox qiymətli faktları aşkara çıxarmışlar.
Dövlət başçısının səfərindən dərhal sonra Mədəniyyət Nazirliyi və Milli Elmlər Akademiyası mərkəzi media təmsilçilərindən ibarət qrupun “İmarət” kompleksinə səfərini təşkil etmişdir. Burada hər iki qurumun təmsilçiləri jurnalistlərə ötən iki ildə aparılmış axtarış işləri barədə ətraflı məlumat vermişlər. Bildirilmişdir ki, ərazidəki sərdabələrdə və kiçik qəbiristanlıqda Qarabağ hökmdarlarının və onların yaxın qohumlarının 214 məzarı aşkara çıxarılmış, hazırda onların mənsubiyyəti barədə tədqiqatlar davam etdirilir. Sovet zamanından şəhər stadionu kimi istifadə edilmiş bu ərazidə hazırda dünya şöhrətli Qarabağ atlarının “Cıdır” kompleksi yaradılır. “İmarət” kompleksi isə bərpa edildikdən sonra muzey kimi fəaliyyət göstərəcək və ölkənin turizm marşrutuna daxil ediləcək.
30 illik işğal dövründə erməni vandallarının darmadağın etdikləri, tövləyə çevirdikləri bu tarixi məkan Ağdamın ilkin bərpa edilən obyektləri sırasında onun azad bugününə qaytarılır.
Əməkdaşlarımızın media turdan hazırladıqları geniş materialı sabahkı nömrəmizdə oxucularımıza təqdim edəcəyik.
XQ