21 Oktyabr Xalq şairi Xəlil Rza Ulutürkün doğum günüdür. Yaşasaydı, 91 yaşı olacaqdı. Böyük şair 1932-ci il oktyabrın 21-də Salyan rayonunda anadan olub, 1994-cü il 22 iyunda Bakıda vəfat edib. Məzarı Fəxri xiyabandadır.
Azərbaycan ədəbiyyatında istiqlal carçısı kimi tanınan, qələmini düşmənə qarşı silaha çevirən Xəlil Rza Ulutürk şeirləri ilə xalqı milli dirçəlişə, azadlıq uğrunda mübarizəyə səsləmişdir. Vətənini daim xoşbəxt görmək üçün çarpışan Xəlil Rza Ulutürk azadlıq ağrılarını azalda biləcək həb kimi deyil, zülmətə işıq sala biləcək Günəş kimi istəyirdi. Azadlığa təşnə olan şair ümmanlar arzulayırdı:
Azadlığı istəmirəm
zərrə-zərrə, qram-qram!
Qolumdakı zəncirləri
qıram gərək, qıram, qıram!
Azadlığı istəmirəm bir həb kimi,
dərman kimi.
İstəyirəm
Səma kimi,
Günəş kimi,
Cahan kimi!
Çəkil!
Çəkil, ey qəsbkar,
Mən bu əsrin gur səsiyəm!
Gərək deyil sısqa bulaq,
Mən ümmanlar təşnəsiyəm!
Ruhun şad olsun, sevimli oğlu şəhidlik zirvəsinə ucalan, Vətəni Böyük Turan boyda görən şair!
Ruhun şad olsun, Azərbaycanın Milli Qəhrəmanı Təbriz Xəlil oğlu Xəlilbəyli!
ZÜLFİYYƏ
XQ
.jpg)
