Dünya heykəltəraşlığında şəxsiyyət mövzusunun mühüm yer tutması məlum faktdır. Prinsip etibarilə bu heykəltəraşlıqda şəxsiyyət probleminin hələ antik dünyadan başlamış gündəmə gətirilməsi və müsbət həlli ilə bağlıdır. Eyni problemin Azərbaycan heykəltəraşlığında da müsbət həll edilməsi müşahidə olunmaqdadır.
Bununla belə, qeyd etməyə ehtiyac var ki, insan şəxsiyyəti mövzusuna müraciət baxımından Azərbaycan heykəltəraşlığının uğurları, əsasən, müstəqillik dövrü ilə bağlıdır. Başqa sözlə, müstəqil dövlətçiliyimizin Azərbaycan incəsənətinə yeni uğurlar qazandırması heykəltəraşlıq sahəsində də diqqəti cəlb etməkdədir. Bəli, məhz müstəqil dövlətçiliyimiz tarixində qüdrətli heykəltəraşlarımızın öz yaradıcılıqlarında görkəmli dövlət, elm və sənət xadimləri mövzusuna ardıcıl olaraq müraciət etdiklərini görürük. Bu sırada Azərbaycan heykəltəraşlığında Heydər Əliyev mövzusunda monumental əsərlərin yaradılmasını məxsusi qeyd etməyə ehtiyac vardır.
Son dərəcədə qürur duyulası haldır ki, Azərbaycan sənət adamı Heydər Əliyev ruhu qarşısında mənəvi borcunu ulu öndərə məxsus şəxsi keyfiyyətləri müxtəlif sənət əsərlərində canlandırmaqla ödəməyə çalışmışdır. Bu gün fəxrlə deyə bilərik ki, dünya heykəltəraşlığının ən qiymətli sənət inciləri sırasında ulu öndərə həsr olunmuş örnəklər fəxri mövqe tutmaqdadır. Prinsip etibarilə Heydər Əliyev şəxsiyyəti mövzusuna müraciət edən Azərbaycan heykəltəraşı ən ağır sənət imtahanı verməli olmuşdur.
Heydər Əliyev ömrünün müxtəlif anlarını əks etdirən heykəltəraşlıq əsərləri Azərbaycan auditoriyasını yeni bir dünya ilə tanış etmək imkanına malikdir. Digər tərəfdən, həmin əsərlərdə Azərbaycan heykəltəraşının yaradıcılıq imkanları da aydın görünməkdədir. Başqa sözlə desək, Heydər Əliyev mövzusuna üz tutan heykəltəraş sənətdə özünütəsdiq yolu keçmişdir. Qətiyyətlə bildiririk ki, dünya, sənət tarixində son dərəcə zəngin, əlvan vasitələrlə Heydər Əliyev qədər obrazı yaradılan ikinci bir şəxsiyyət tanımır.
Azərbaycan heykəltəraşlıq sənətində özünəməxsus yer tutan, professional heykəltəraşlıq sənətinin inkişafında mühüm işlər görmüş Natiq Əliyev kimi tanınmış bir heykəltəraşın, Heydər Əliyev obrazını bir neçə dəfə yaratması da, onun şəxsiyyətinin və xidmətlərinin Azərbaycan heykəltəraşlığına olan təsiri və mənəvi dəyərini göstərməkdədir. Bu heykəllər, Azərbaycanla bərabər digər ölkələrdə də yer almış və Heydər Əliyevin dünya miqyasında necə böyük bir lider olmasını təcəssüm etdirmək baxımından olduqca əhəmiyyətli rol oynamışdır.
Kiyevdəki Heydər Əliyev heykəlinin açılışının 2004-cü ildə qoyulması, dahi öndər Heydər Əliyevin Ukraynaya olan münasibətinin və dostluğunun bir ifadəsidir. Heydər Əliyev Azərbaycanla Ukrayna arasında dostluq münasibətlərinin qorunmasını daim diqqətdə saxlamışdır. Bu heykəl, iki ölkə arasındakı münasibətlərin və Heydər Əliyevin Ukrayna ilə olan möhkəm bağlarının bir simvolu olaraq əhəmiyyətli yer tutmaqdadır.
Heykəltəraşın qranit kürsü və tunc heykəl arasında uğurlu bir əlaqə yaratması, obrazın güclü və məğrur duruşunu vurğulamağa kömək edir. Heykəltəraş heykəlin plastik ifadəsi, onun nişanələrini əks etdirmiş, yenilməz və qüdrətli rəhbərin xüsusiyyətlərini göstərməyə nail olmuşdur. Bu nişanələr Heydər Əliyevin liderlik keyfiyyətlərini, qətiyyətini və iradəsini ifadə edir.
Heykələ yaxınlaşdıqca, tamaşaçılar Heydər Əliyevin üzündəki nuranilik nişanələrini və diqqətçəkici baxışlarını aydın hiss edirlər. Bu, onun şüurlu, şəffaf liderlik tərzi, xalqının sevgi və hörmətini simgələyir. Heykəl, tamaşaçılara Heydər Əliyevin ruhunu, vizyonunu və fədakarlığını hiss etdirərək, şəhərin atmosferində daha da qüdrətli bir təsir bağışlayır.
Bu sənət əsəri Heydər Əliyevin dəyərli xatirəsinin saxlanılması və onun yaşadığı dövrün özəlliklərini ifadə etmək üçün əsaslı bir simvol kimi xüsusi yer tutur. Tamaşaçılar heykələ tamaşa etdikcə Heydər Əliyevin Vətənə sevgisini, liderlik ruhunu, xidmətlərini və digər mühüm keyfiyyətlərini hiss edirlər.
Natiq Əliyev heykəllərində Heydər Əliyev obrazını da müxtəlif mərhələlərdə inkişaf etdirərək, onun psixoloji baxımdan zənginləşdiyini vurğulayır. Eskizlərdən son variantlara qədər olan yaradıcı prosesdə, heykəltəraş obrazın ifadəsini, plastik şərhini, duruşunu və geyim formasını bir neçə dəfə dəyişdirir. O, obrazın ahəngdar addımları, əllərin vəziyyəti və digər hərəkətlərini təbiətə uyğun şəkildə uyğunlaşdırmaq üçün uzun müddət sərf edir. İşin nəticəsində obrazın ümumilikdən uzaq, təfərrüatsızlaşaraq monumentallığın əldə edilməsi məqsədinə varılır.
Əsərlərinin digər ölkələrin paytaxtlarında ucaldılması, Natiq Əliyevin beynəlxalq səviyyədə də tanınmasını, professional bir heykəltəraş olduğunu göstərir. O, yaradıcılığı ilə bizi obrazın daxili aləminə enməyə sövq edir.
Azərbaycanın Xalq rəssamı Natiq Əliyev yaradıcılığında Heydər Əliyev obrazına dəyərli bədii tutumla yanaşmışdır. Heykəltəraşlıq sahəsində, xüsusən monumental heykəltəraşlıqda müəllifin sənətinin ülviliyi hiss olunmaqdadır.
Natiq Əliyevin 2005-ci ildə yaratdığı və Sumqayıt şəhərinin mərkəzində qoyulmuş Heydər Əliyev heykəli qırmızı mərmər postament üzərində ucalır. Bu monumental əsərdə ulu öndər, özünəməxsus şux qaməti, iti nəzərləri və qətiyyəti ilə diqqəti cəlb edir. Abidədə Azərbaycanın dövlət gerbi kürsü üzərində yerləşir. Heydər Əliyev Azərbaycanın Konstitusiyasına əl basaraq, Azərbaycanın müstəqilliyinin əbədi və dönməz olacağına inam və qətiyyət ifadə etmişdir.
Müəllif Heydər Əliyevi müasir Azərbaycanın qurucusu, ilk demokratik Konstitusiyasının müəllifi kimi təqdim edir. Abidədə heykəltəraş tərəfindən Azərbaycanın gələcək taleyini müdrikcəsinə görən böyük dühanın nəzərləri irəliyə dikilmişdir. Postamentin düzbucaqlı forması ətrafdakı yaşayış binalarının bədii-konstruktiv quruluşu ilə həmahəng təşkil edir.
Xalq rəssamı Ömər Eldarovun da yaradıcılığında Heydər Əliyev obrazı, onun zəngin yaradıcılıq bioqrafiyasının əsasını təşkil edir. Ömər Eldarov Azərbaycan Milli Elmlər Akademiyasının və Rusiya Rəssamlıq Akademiyasının həqiqi üzvü olaraq tanınır. O, "Şərəf nişanı", "Qırmızı Əmək bayrağı" və "İstiqlal" ordenləri ilə təltif edilmiş böyük sənətkardır.
Ömər Eldarov Heydər Əliyev ikinci dəfə Sosialist Əməyi Qəhrəmanı fəxri adına layiq görüldükdən sonra, 1987-ci ildə Naxçıvan şəhərində ümummilli liderin büstünü yaratmışdır. Sənətkar Heydər Əliyev obrazını birbaşa canlı naturadan mükəmməl şəkildə hazırlamışdır. Heydər Əliyev və Ömər Eldarov bir-birini gənclik illərindən tanıyırdılar. Bu səmimi münasibət ilk büstünün uğurlu bədii həllinə nail olmasına imkan verdi.
Ümummilli liderin vəfatından sonra Ömər Eldarov ulu öndərin bir neçə xatirə abidəsinin də müəllifidir. Bunlar arasında Bakıdakı Ali Hərbi Neft Məktəbinin qarşısında general geyimindəki heykəli, Qobustan rayonunda Heydər Əliyev parkında və Fəxri xiyabanda ucaldılan qəbirüstü abidəni, həmçinin Türkiyənin Qars şəhərindəki abidəni xüsusi qeyd etmək lazımdır. Heykəltəraşın Heydər Əliyevi əbədi şəkildə anmaq üçün seçdiyi bu obrazlar, liderin yaşadığı anları və özəlliklərini doğru şəkildə təqdim edir.
Ömər Eldarovun verdiyi müsahibələrin birində qeyd etdiyi kimi, Heydər Əliyev sağlığında öz heykəlinin ucaldılmasına birmənalı olaraq razılıq vermirdi. Ancaq bir istisna hal var idi: O, ikinci dəfə SSRİ Ali Soveti tərəfindən Sosialist Əməyi Qəhrəmanı fəxri adına layiq görüldüyü vaxtda, Vətənində heykəlinin ucaldılmasına razı oldu. Çünki bu kimi fəxri ada ikinci dəfə layiq görülənlərin doğulduğu şəhərlərdə heykəlinin qoyulması dövlət sərəncamına əsaslanırdı. Hər bir məqam öncədən düşünülmüşdü, heykəlin ölçüləri və materialı.
Ömər Eldarovun qeyd etdiyinə görə, Heydər Əliyev çox intizamlı bir dövlət xadimi olduğu üçün, heykəlinin doğru formada işlənməsinə önəm verirdi. Bir müddət sonra o, Heydər Əliyev tərəfindən öz kabinetində qəbul edildi. Heydər Əliyev ona Moskvadan heykəlin işlənməsi ilə bağlı çoxlu təklif aldığını bildirdi. Ancaq Heydər Əliyev özünün istəyinə əsasən, yalnız onu yaxşı tanıyan yerli heykəltəraşın heykəlini işləməsinin doğru olacağını söylədi. Ömər Eldarov ona minnətdarlığını bildirərək, böyük bir şövq ilə çalışacağını bildirdi. Ömər Eldarovun Heydər Əliyevi naturadan işləmək istədiyini bilən Heydər Əliyev, eyni zamanda, Brejnev və Kosıginin heykəllərinin də naturadan işləndiyini bilirdi. Ona görə də, Heydər Əliyev də naturadan işləməsi halında nəticənin daha uğurlu olacağını düşünürdü.
Ömər Eldarov, Heydər Əliyevin Fəxri xiyabandakı qəbirüstü abidəsini 2004-cü ildə yaradaraq, ulu öndər qarşısındakı borcunu yerinə yetirdi. Abidə, 4 metr hündürlüyündə və qranitdən hazırlanan möhtəşəm bir heykəldir. Heydər Əliyevin statik duruşu, abidənin daha təsirli və monumental görünməsinə səbəb olur. Ömər Eldarov, memorial abidəni kompleks şəklində təqdim edərək Azərbaycan üçün, Azərbaycan xalqı üçün gördüyü hər bir xeyirxah əməlini bu abidədə göstərmişdir.
Heykəlin arxa fonunda ucaldılan qaya parçası ilə birlikdə Azərbaycan Respublikasının xəritəsi qabarıq formada mükəmməl şəkildə işlənmişdir. Bu, Ömər Eldarovun ziyarətçilərə göstərmək istədiyi ideyanı tamamlayır. Bu element, ziyarətçilərə “Heydər Əliyev və Azərbaycan” bütövlüyünü nümayiş etdirir.
Heydər Əliyevin vaxtı ilə yaşadığı evin giriş divarında hazırlanan barelyef xatirə lövhəsi də heykəltəraş Ömər Eldarov tərəfindən 2008-ci ildə hazırlanmışdır. Bu barelyef lövhədə aşağıdakı sözlərə yer verilmişdir: "Azərbaycan xalqının ümummilli lideri, müasir Azərbaycan dövlətçiliyinin banisi, Azərbaycan Respublikasının Prezidenti Heydər Əlirza oğlu Əliyev 1962 - 1982-ci illərdə bu evdə yaşamışdır". Bu xatirə lövhəsi, Heydər Əliyevin yaşadığı evin tarixi əhəmiyyətini vurğulayır və ziyarətçilərə onun liderlik və xidmətləri haqqında dəyərli məlumatlar verir.
2013-cü il mayın 7-də Milli İncəsənət Muzeyində Heydər Əliyevin 90 illik yubileyinə həsr olunan sərgidə Ömər Eldarovun 2012-ci ildə ağ mərmərdən hazırladığı "Heydər Əliyevin portreti" əsəri sərgilənmişdir. Bu portret Heydər Əliyevin xarakterini aydın və dolğun şəkildə təqdim etmək baxımından mühüm bir heykəltəraşlıq nümunəsidir. Heykəltəraş Ömər Eldarov bu əsərdə ümummilli liderin möhkəmliyini, mübarizə ruhunu və liderlik vasitələrini ifadə etməyə çalışmışdır. Heydər Əliyevin portreti, onun xarizmatik xətti və dövlət xadimi kimi oynadığı rolun vurğulanması ilə birlikdə, onun Azərbaycanın dövlətçilik və milli inkişafına verdiyi böyük töhfəni təmsil edir.
Böyük düha Heydər Əliyev, Azərbaycanın ümummilli lideri və müasir Azərbaycan dövlətçiliyinin banisi kimi, Azərbaycan heykəltəraşları üçün böyük bir yaradıcılıq mənbəyidir. Bu əsasda Heydər Əliyevin şərəfinə və xatirəsinə bir sıra abidələr yaradılmaqdadır.
Xüsusilə qeyd etməliyik ki, Heydər Əliyevin heykəlləri, onun xarakterini və millətinə olan qayğısını ifadə edir. Azərbaycan heykəltəraşları Heydər Əliyevə həsr etdiyi monumental heykəltəraşlıq nümunələrində onun şəxsən sevdiyi və hörmət etdiyi insana yaraşan şəkildə emosional və ifadəli üslubunu təsvir edirlər.
Heydər Əliyev dühası Azərbaycan heykəltəraşlığının mühüm bir parçası kimi, milli bərabərliyin və Azərbaycan xalqının liderinə olan bağlılığının simvolu olmaq baxımından müstəsna əhəmiyyətə malikdir. Heydər Əliyevə həsr olunan monumental heykəltəraşlıq nümunələri onun düşüncələrini, liderlik keyfiyyətlərini və milli identifikasiya qüdrətini əks etdirməklə bərabər Heydər Əliyev və Azərbaycan xalqı arasında sonsuz bağlılığı ifadə etmək baxımından da mühüm yer tutmaqdadır.
Bəli bu gün, dahi öndərin yüzlərlə, bəlkə də minlərlə portreti yaradılır. Əlbəttə, onların heç də hər biri bədii-texniki səviyyə baxımından mükəmməl ola bilməz. Lakin ulu öndərin böyük sənətkarlıqla, həmçinin böyük sevgi, ehtiramla yonulmuş heykəlləri yetərincədir və bu dəyərli əsərlərin sayı gündən – günə artmaqdadır. Ümidvarıq ki, gələcək tədqiqatlarda Azərbaycan heykəltəraşlığında Heydər Əliyev mövzusu, ulu öndərin işıqlı xatirəsinə həsr olunmuş əsərlərin daha böyük hissəsini əhatə edəcəkdir.
Toğrul CƏFƏRLİ,
Naxçıvan Dövlət Universitetinin müəllimi