Abşeronda ən tez “oyanan” ağac söyüddür. Bu ağacın qeyri-adi xüsusiyyətlərindən biri həm ilk yarpaqlarının, həm çiçəyinin ( bəli, o, bar verməsə də çiçək açır), həm də zoğlarının sarı olmasıdır. Yarpaqlar tam açılandan sonra ağac yaşıllaşır... Bütün bunları kim görməyib ki?
Ancaq görənlərin hamısı şair və ya rəssam olmadığına görə, bu lövhə çoxlarına adi gəlir. Mərhum rəssam Hacağa Nəzərli isə həmin lövhəni görəndə – daha doğrusu, ona həmin gözəlliyi mən göstərmişdim – Məhəmməd Füzulinin “Leyli və Məcnun” əsərinin əvvəlindən bir beyti xatırlatmışdı:
Axır günün əvvəl eyləyib yad,
Axıtdı sirişkü, qıldı fəryad.
Təbii ki, bütün körpələr dünyaya gələndə ağlayırlar. Füzuli isə Qeysin (Məcnunun) dünyaya gələndə ağlamasını onun, guya, axır gününü yad edərək göz yaşı tökməsi kimi mənalandırmışdı. Hacağa Nəzərli də söyüd ağacının ilk yarpaqlarının sarı olmasını onun gələcək xəzanı duyma əlavəsi kimi yozmuşdu.
Dünən – iyulun 10-da işə gələndə küləyin çinar ağaclarından qoparıb asfalt boyu “rəqs etdirdiyi” yarpaqları görəndə məhz Hacağa müəllimin həmin ifadəsini xatırladım. Mən bir neçə gün əvvələdək küçələrin bəzəyi, çinarların libası olan yarpaqları, təmizlik işçilərinin cidd-cəhdlə yığıb toplamağa çalışdığı vaxtsız xəzanın qurbanlarını “quraqlığın yaratdığı lövhələr” kimi qəbul etdim. Həmkarımız, şair Əli Nəcəfxanlı isə iyulda budaqlara vida söyləyib ayaqlar altına düşən yarpaqları dünyadan “vaxtsız köçənlərlə” müqayisə etdi.
... Yadımdadır, gənclik illərimdə kəndimiz haqqında yazdığım bir şeirdə xəzan yarpaqlarını “Külək” adlı atın ayağındakı qızıl nala bənzətmişdim;
Küləklər payızın kəhər atları,
Yarpaqlarsa qızıl naldı, kəndimiz.
Amma indi payız deyil axı. Vaxtsız “ölən” yarpaqların ayaq altına düşməsi quraqlığın insafsızcasına yaratdığı ağır lövhələrdir. Nə yaxşı ki, çinar yenə göyərəcək... Və təəssüf ki, ölənlər geri qayıtmayacaq...
İttifaq MİRZƏBƏYLİ,
Elşən AĞALAR (foto) ,
“Xalq qəzeti”