Üzeyir Hacıbəyli adına Bakı Musiqi Akademiyasında ümummilli lider Heydər Əliyevin 100 illik yubileyinə həsr olunmuş konsert proqramı keçirilib.
Tədbiri giriş sözü ilə açan sənətşünaslıq üzrə fəlsəfə doktoru Minəxanım Babayeva çıxışında Heydər Əliyevin Azərbaycan musiqisinə və mədəniyyətinə verdiyi töhfələrdən danışıb, bu dahi şəxsiyyətin milli-mənəvi irsin qorunmasında və inkişaf etdirilməsində müstəsna rolunun olduğunu deyib:
“Heydər Əliyev istənilən musiqi əsəri və onun müəllifi haqqında dərin biliklərə sahib bir şəxs idi. İncəsənət sahəsində fəaliyyət göstərən bütün insanlarla söhbətində onun incəsənətə, mədəniyyətə verdiyi dəyər aydın hiss olunurdu. Həyatdan köçən incəsənət xadimlərinin yaradıcılıq gecələrinin keçirilməsi, onların ev muzeyinin yaradılması, həmçinin onların adına küçə və prospekt adlarının verilməsi də məhz ulu öndərin daim diqqət mərkəzində olmuşdur”.
Sonra “Konsertmeyster ustalığı” və “İxtisas fortepiano” kafedralarının professoru, sənətşünaslıq üzrə fəlsəfə doktoru Könül Hüseynovanın rəhbərlik etdiyi “Sabah” qrupunun IV kurs tələbələri, respublika və beynəlxalq müsabiqələr laureatları Fidan Yunus, Nigar Hüseynzadə və digər solistlərin ifasında müxtəlif operalardan musiqi nömrələri səsləndirildi.
Fidan HÜQUQQIZI, “Xalq qəzeti”