Xalqımızın böyük oğlu, dahi rəhbər, dünya şöhrətli siyasətçi Heydər Əliyevin yubileyi ilə bağlı paytaxtda və bölgələrdə, ölkənin müəssisə və təşkilatlarında tədbirlər davam etdirilir.
Xarici diplomatların Naxçıvan ziyarəti
Ölkəmizdə akkreditə olunmuş, iqamətgahı Bakıda və Ankarada yerləşən diplomatik korpusun nümayəndələri, eləcə də hərbi attaşelər müasir müstəqil Azərbaycanın qurucusu, ümummilli lder Heydər Əliyevin anadan olmasının 100 illik yubileyi münasibətilə keçirilən silsilə tədbirlər çərçivəsində Naxçıvan şəhərində səfərdədirlər. Ümumilikdə 80-ə yaxın ölkədən və 23 təşkilatdan 140-a yaxın diplomatın və hərbi attaşenin iştirak etdiyi səfər Heydər Əliyevin Naxçıvan şəhərinin mərkəzindəki abidəsini ziyarət etməklə başlayıb. Sonra Heydər Əliyev Muzeyinə gələn qonaqlar ulu öndərin həyat və fəaliyyətinə aid fotoşəkil və eksponatlarla tanış olublar. Onun hər kəsə örnək olan çoxşaxəli siyasi fəaliyyəti, o cümlədən həyatının Naxçıvan mərhələsi barədə qonaqlara ətraflı məlumat verilib.
Onun üçün insan kapitalı prioritet idi
Bakıda “Ümummilli lider Heydər Əliyevin xarici siyasət prioritetləri” adlı konfrans keçirilib. Tədbirdə çıxış edən Dövlət İdarəçilik Akademiyasının rektoru, akademik Urxan Ələkbərov qeyd edib ki, uğurlu xarici siyasət ölkəmizin beynəlxalq aləmdə imicini və nüfuzunu müəyyən edir. “İkinci Qarabağ müharibəsi başa çatdıqdan və ölkəmizin ərazi bütövlüyü bərpa edildikdən sonra Azərbaycan yeni inkişaf dövrünə qədəm qoyub. Prioritet istiqamətlərdən biri inklüziv inkişafa nail olmaqdır. Buna əsaslanaraq onu da əlavə etmək olar ki, Heydər Əliyev insan kapitalının inkişafına, onun ölkə iqtisadiyyatına töhfəsinə xüsusi önəm verirdi”, - deyə U.Ələkbərov çıxışında vurğulayıb.
Gənclərə örnək ömür dastanı
Paytaxtın 132-134 nömrəli təhsil kompleksində “İrəli” İctimai Birliyinin təşkilatçılığı ilə Heydər Əliyevin anadan olmasının 100 illik yubileyinə həsr olunmuş “Heydər Əliyev – 100: Böyük ömrün dastanı” layihəsi çərçivəsində gənclərlə görüş keçirilib. Birlikdən bildiriblər ki, media nümayəndələrinin də qatıldığı tədbir ulu öndər Heydər Əliyev, habelə Vətənimizin azadlığı və suverenliyi uğrunda canından keçən şəhidlərimizin əziz xatirəsinin bir dəqiqəlik sükutla anılması ilə başlayıb. “İrəli” İB-nin sədri Şahin Rəhmanlı ulu öndər Heydər Əliyevin həyatının bütün mərhələlərində daim Azərbaycanın tərəqqisi naminə çalışdığı, eləcə də əsasını qoyduğu dövlət siyasətinin hazırda Prezident İlham Əliyev tərəfindən uğurla davam etdirildiyini diqqətə çatdırıb.
Filarmoniyada xatirə konserti
Bakı Şəhər İcra Hakimiyyəti və Mədəniyyət Nazirliyinin birgə təşkilatçılığı ilə Azərbaycan xalqının ümummilli lideri Heydər Əliyevin 100 illik yubileyi ilə əlaqədar Azərbaycan Dövlət Akademik Filarmoniyasında klassik musiqi gecəsi keçirilib. Meriyadan verilən məlumata görə, tədbirdə Bakı Şəhər İH-nın başçısı Eldar Əzizov, bir sıra dövlət qurumlarının rəhbərləri, Milli Məclisin deputatları, paytaxt ictimaiyyətinin nümayəndələri, ali və orta təhsil müəssisələrinin, veteran və gənclər təşkilatının nümayəndələri, elm və mədəniyyət xadimləri və çoxsaylı qonaqlar iştirak ediblər.
AHİK 65 min ailəyə yubiley sevinci bəxş etdi
Azərbaycan Həmkarlar İttifaqları Konfederasiyası (AHİK) tərəfindən ulu öndər Heydər Əliyevin anadan olmasının 100-cü ildönümü münasibətilə respublikanın rayonlarında 4500 aztəminatlı ailə, o cümlədən şəhid və qazi ailələri üçün ərzaqla dolu avtomobil karvanı yola salınıb. Bundan başqa, Naxçıvan Muxtar Respublikasında yaşayan həmin kateqoriyadan olan 2500 ailəyə də ərzaq payı göndərilib. AHİK-dən başqa, sahə həmkarlar ittifaqları da bu ərəfədə bütün bölgələr üzrə qeyd edilən kateqoriyadan olan ailələrə ərzaq yardımları göstərirlər. Qeyd edək ki, bununla da sovqat göndərilən ailələrin ümumi sayı 65 minə çatıb.
Ultramarafona yekun vurulub
Gənclər və İdman Nazirliyi, Azərbaycan Atletika Federasiyasının təşkilatçılığı ilə Heydər Əliyevin anadan olmasının 100 illiyinə həsr edilmiş Ağstafa-Bakı marşrutu ilə ultramarafon yürüşünə yekun vurulub. Ağstafanın Vurğun qəsəbəsinin sakini Ağa Əliyev yürüşə mayın 1-də Heydər Əliyevin rayon mərkəzindəki abidəsi önündən başlayıb. İlk gündə Gəncəyə kimi 96 kilometrlik məsafə qət edən marafonçu ardınca 70 kilometrlik məsafəni keçərək Gəncədən Yevlaxa gəlib. Növbəti dayanma məntəqələri Kürdəmir və Hacıqabul rayonları olub. Son mərhələyə Hacıqabuldan start verən yarış iştirakçısı 118 kilometr məsafəni qət edərək finişə çatıb. Ağa Əliyev Azərbaycanda 5 gün ərzində ən uzaq məsafəni qətetmə rekorduna sahib çıxıb.
Yubileyə həsr olunmuş seminar
Milli Azərbaycan Tarixi Muzeyində Heydər Əliyevin 100 illik yubileyinə həsr edilmiş “Ümummilli lider Heydər Əliyevin siyasi konsepsiyasında Azərbaycan gəncliyi” mövzusunda seminar təşkil olunub. Tədbir Tarix Muzeyinin və Bakı Dövlət Universitetinin (BDU) Tarix fakültəsinin birgə təşkilatçılığı ilə keçirilib. Seminarda muzeyin əməkdaşları, BDU-nun Tarix fakültəsinin müəllim və tələbələri, eləcə də hərbi təhsil müəssisəsinin kursantları iştirak ediblər.
Səhiyyə ocağında beynəlxalq konfrans
Ümummilli liderin doğum günü ölkəmizin hər yerində olduğu kimi, Ə.Əliyev adına Azərbaycan Dövlət Həkimləri Təkmilləşdirmə İnstitutunda da qeyd edilib. Bu münasibətlə institutda beynəlxalq elmi-praktik konfrans keçirilib. Konfransın işində tanınmış yerli mütəxəssislərlə bərabər müxtəlif ölkələrdən - ABŞ, Türkiyə, Ukrayna, Rusiya, Özbəkistan, Çexiya, Avstriya, İtaliyadan olan mütəxəssislər əyani və onlayn rejimində iştirak ediblər. Konfransda çıxış edən Səhiyyə nazirinin müavini Nadir Zeynalov Heydər Əliyevin keçdiyi mənalı və şərəfli həyat yoluna nəzər salıb.
İnstitutun rektoru, professor Nazim Qasımov çıxışında ulu öndərin tibb kadrlarının hazırlanmasında, diplomdansonrakı təhsilin inkişaf etdirilməsində, bilavasitə bu müəssisənin inkişafındakı əvəzolunmaz rolunu qeyd edib.
Hazırladı:
İ.HƏSƏNQALA, “Xalq qəzeti”