“Azərbaycan Xəzər Dəniz Gəmiçiliyi" QSC-nin (ASCO) sifarişi ilə Bakı Gəmiqayırma Zavodunda inşa olunan Ro-Pax tipli “Zərifə Əliyeva” gəmi-bərəsinin istismara verilməsindən bir il ötür.

ASCO-dan verilən məlumata görə, Prezident İlham Əliyevin iştirakı ilə 2022-ci il aprelin 28-də istismara verilən gəmi-bərə indiyədək 163 dəfə səfərə çıxıb. Həmin səfərlər çərçivəsində 148 vaqon, 1061 ədəd minik avtomobili, 5595 ədəd yük avtomobili/TIR və 5616 nəfər sərnişin daşınıb.

“Zərifə Əliyeva” gəmi-bərəsi ötən müddətdə Transxəzər Beynəlxalq Nəq­liyyat Marşrutu üzrə yükdaşıma zənci­rinin mühüm həlqəsi olan ASCO-nun digər bərələri ilə birgə yükdaşımalara, eləcə də əlverişli coğrafi mövqeyə ma­lik ölkəmizin tranzit potensialının real­laşdırılmasına mühüm töhfə verir. Gəmi ilə səfərlər Aktau-Ələt, Ələt-Aktau, Türkmənbaşı-Ələt, Ələt-Türkmənbaşı, Kurık-Ələt, Ələt-Kurık istiqamətləri üzrə həyata keçirilib.

Xatırladaq ki, 30 nəfərlik daimi heyətdən ibarət olan bu unikal bərənin uzunluğu 154,50, eni 17,7, bortunun hündürlüyü isə 7,5 metrdir. Gəmi 100 nəfər sərnişin, 56 sistern tipli vaqon və ya 50 yük avtomobili/TIR daşımaq im­kanına malikdir.

ASCO-nun Dəniz Nəqliyyatı Do­nanmasına məxsus bu gəmi-bərənin “Zərifə Əliyeva” adlandırılması Azər­baycan dənizçilərinin görkəmli alim və həkim, tibb elmləri doktoru, professor, Əməkdar elm xadimi, akademik Zərifə Əliyevanın xatirəsinə olan sonsuz ehti­ramının ifadəsidir.

“Xalq qəzeti”