Uzun ömrün sirlərindən biri də sağlam qidalanmadır. Şübhə yoxdur ki, təbii ərzaqlardan ən çox tərəvəzlər sağlam qidanın əsasını təşkil edir, lakin onların miqdarı və müxtəlifliyi məsələsi mühümdür. Çox yaşamaq üçün orqanizmə qəbul edilən meyvə və tərəvəzlərin müxtəlifliyinə daha çox diqqət etmək lazımdır. Həkimlər bağırsağın sağlamlığının, immunitetin və əhvali-ruhiyyənin yaxşılaşdırılması üçün həftə ərzində azı 30 müxtəlif bitki əsaslı ərzaq qəbul etməyi məsləhət görür.
Sağlam qidalanma – xəstəliklərlə mübarizə aparmaq və insan həyatını uzatmaq üçün əlimizdə olan ən yaxşı vasitədir. Bu məsələdə qızıl qayda ondan ibarətdir ki, hər həftə rasiona təbii ərzaqlar daxil edilsin. Qidada qəbul edilən duzu azaltmaq, doymuş yağların qəbuluna nəzarət etmək və alkoqolun tövsiyə olunan hədd çərçivəsində qəbulu da çox əhəmiyyətlidir.
Bitki əsaslı qida antioksidantlarla zəngindir, bu maddələr oksidləşdirici stresin qarşısını almağa imkan verir. Meyvə, tərəvəz, paxlalılar, dənli bitkilər, qoz-fındıq kimi bitki əsaslı ərzaqlar qiymətli vitaminlər, minerallar, həll olunan lifli maddələr qarışığı və faydalı bitki əsaslı birləşmələrlə zəngindir.
Əhalinin hər həftə rasiona balıq əlavə etməsi də tövsiyə olunan miqdara uyğun deyil. Ağ və yağlı balıq əla zülal mənbəyidir və A, D kimi çoxlu müxtəlif vitaminlərlə, eləcə də kalsium, sink, dəmir və yod kimi minerallarla zəngindir. Çoxumuz bu maddələri lazımi qədər qəbul etmirik.
Yağlı balıq da (qızılbalıq, skumbriya, alabalıq, sardina) Omeqa-3 yağları adlandırılan uzunzəncirli yarıdoymamış yağlarla zəngindir. Bu maddələr ürəyin normal fəaliyyətini və normal qan təzyiqini dəstəkləyir, - deyə doktor vurğulayır.
Zərifə BƏŞİRQIZI, “Xalq qəzeti”