Bəzi qüvvələr Rusiya–Azərbaycan müttəfiqliyinə zərbə vurmağa cəhd edirlər 

Dirijor çubuğunun yuxarı qalxmasını gözləyən orkestrin ifaçıları kimi, Rusiyadakı bəzi siyasətçilər, “müstəqil” ekspertlər, deputatlar, QHT təmsil­çiləri də son vaxtlar Azərbaycanı təhdid etməyə, Qarabağ məsələsində ölkə­mizi haqsız çıxarmağa cəhdlər edir, rəsmi Moskvanın Azərbaycana müna­sibətdə mövqeyinə zidd siyasət sərgiləməklə müttəfiqlik səviyyəsinə qalxmış ölkələrarası münasibətlərə kölgə salmağa çalışırlar.

Rusiya Dövlət Duması komitə səd­rinin müavini Konstantin Zatulinin er­mənipərəst, anti-Azərbaycan çıxışları­na birinci dəfə deyil şahidlik edirik. Bu dəfə, o, bir az da irəli gedərək, Qarabağ separatçılarına “artsaxın yubileyi” müna­sibətilə təbrik ünvanlayıb. Çox güman ki, onun bu addımı atmaqda məqsədi növbəti siyasi avantürası ilə gündəmə gəlməkdir. Əgər belə olmasaydı, dörd il əvvələ kimi bölgədə terrorizmi və separatizmi dəstək­ləməz, indi isə insanlığa qarşı törətdikləri ağır cinayət əməllərinə görə Femida qarşı­sında cavab verməli olan bir rejimin fərari təmsilçilərinə təbrik müraciəti göndərməz­di. Rusiya qanunverici orqanının səlahiy­yətli nümayəndəsi üçün bu hərəkət rəsmi siyasi kursa qarşı olmaqla yanaşı, həm də ədalətdən uzaq və çox uğursuz bir addım sayılmalıdır. Dövlət Dumasının yüksək ranqlı təmsilçisinin belə “avantürist siyasi romantizmə” ayıq başla yol verməsinə biz­də ciddi şübhələr yaranıb. İqtidardakı “Va­hid Rusiya” Partiyasının üzvü olan şəxsin belə təxribatçı və səbatsız müraciətini başa cür şərh etmək mümkün deyil. 

* * *

Zatulinin istinad etdiyi “2020–2023-cü il hadisələri”, 30 illik separatizmə, iş­ğala, terrorizmə və iztirabına son qoymuş Vətən müharibəsi və lokal antiterror təd­birləri tarixin arxada qalmış səhifələridir. Azərbaycan məhz bunların sayəsində Cə­nubi Qafqazda yeni geosiyasi reallıqlar yaratdı, sülh, sabitlik və təhlükəsizliyin möhkəm zəminini formalaşdırdı. Dumanın komitə sədri müavininin yol verdiyi siya­si davranışı hazırda bölgədə cərəyan edən hadisələrin fonunda “Qafqaz evi”ndə sül­hə və əməkdaşlığa yalnız zərər vuaracaq məkrli niyyət kimi dəyərləndirmək olar.

Batumidə hərbçi aləsində doğulmuş, iki gündən sonra 66 yaşı tamam olacaq Kons­tantin Zatilinin Rusiyadakı erməni diaspo­ru ilə “isti əlaqələri” barədə mediada mə­lumatlar dolaşmışdı. Xüsusilə, Zəfərimizlə başa çatmış 44 günlük müharibədən sonra onun haypərəst ritorikasının daha da güc­lənməsi medianın bu ehtimalının reallıqla üst-üstə düşməsinə şübhə yeri qoymur. Belə görünür ki, iqtidar düşərgəsində yer alsa da, siyasət meydanında hələ də yerini tuta bilməyən deputat dediyi sözlərin, ver­diyi bəyanatların, ölkə xaricinə göndərdiyi məktubaların törədə biləcəyi fəsadları he­sablamaq iqtidarında deyil. Bunu anlamış olsaydı, münaqişəni yenidən körükləməyə hesablanmış cəfəng açıqlamalardan, xam xəyallardan əl çəkərdi.

“Bu, başqa bir dövlətin suverenliyinə müdaxilədir”. Rusiya Dövlət Duması­nın daha bir deputatı, hüquqşünas Alek­sandr Tolmaçev Azərbaycan Prezidentinin köməkçisi Hikmət Hacıyevin beynəlxalq ictimaiyyətin Ermənistana silahlı qüv­vələrinin inkişafına məhdudiyyətlər qoy­malı olması ilə bağlı bəyanatını “Alpha News”a bu formada şərh edib. Deputatın fikrincə, qonşusu ilə müharibə şəraitin­də olan ölkənin silahlanması onun daxili məsələsidir: “Tərəflərdən biri qarşı tərəf­lə bağlı beynəlxalq ictimaiyyətə müraciət edərək, onun silah və silahlı qüvvələrinin sayını məhdudlaşdırmasının lazım olduğu­nu söyləməsi başqa dövlətin suverenliyinə müdaxilə deməkdir. Məsələn, Yaponiya ordusu ilə müqayisə aparmağa çalışanda deyirlər ki, ordumuz yoxdur, çünki İkinci Dünya müharibəsindən sonra onlar da Al­maniya kimi, özünümüdafiə ilə məhdudla­şırlar. Bu zaman çaşqınlığa ehtiyac yoxdur. Çünki 80 il əvvəl müttəfiqlərin beynəlxalq koalisiyası Almaniyaya qalib gəldi. Onlar həm də buna görə Yaponiya ilə sülh müqa­viləsinin şərtlərini diktə etdilər”.

Reallıqdan min kilometr uzaq, yer­siz və aidiyyatsız müqayisəyə yol verən A.Tolmaçev bu kontekstdə hətta Bakıya məsləhət verməkdən də çəkinmir: “Məsələ ondadır ki, Azərbaycan nədənsə qorxursa, o zaman suveren dövlət kimi silahlı qüv­vələrini gücləndirməyə, inkişaf etdirməyə, səfərbərlik və sair tədbirləri həyata keçir­məyə tam haqqı var”. 

Deməli, Ermənistan Almaniya, Yapo­niya kimi məğlub tərəf deyil, boynuna da silahlanma ilə bağlı, onlar kimi, heç bir öhdəlik götürməyibmiş. İndi, o, dünyanın dörd tərəfindən ölkəsinə kütləvi qırğın silahları daşıya bilər. Hüquq təhsili al­mış rusiyalı deputat açıqlamasında bunu qırmızı-qırmızı dilə gətirir: “Ermənistan da bunu edə bilər. Ermənistan məğlub ol­muş, sülhə məcbur edilmiş və bunu sülh müqaviləsində qeyd etməyə məcbur edil­miş işğalçı ölkə (?) olsaydı, bu, mümkün olardı. Amma bu gün Ermənistanın silahlı qüvvələrini ixtisar etməsi ilə bağlı istənilən cəhdlərin bununla heç bir əlaqəsi yoxdur. Ermənistanın daxili qanunları bu gün belə bir ordunun olmasına icazə verir, amma sabah başqa ordu da ola bilər. Hər şey par­lamentdən, Ermənistan hökumətinin istə­yindən və büdcənin bu və ya digər ordunu dəstəkləmək qabiliyyətindən asılıdır”. 

Dövlət Dumasının üzvü Tolmaçevin demədiyi bircə o qalıb ki, Ermənistan nəinki qonşu ölkənin torpaqlarını işğal et­məkdə haqlı olub, üstəlik, onun öz konsti­tusiyasına bu ölkəyə qarşı ərazi iddialarını daxil etməsi də normal sayılmalıdır. 

* * *

Qondarma “erməni məsələsi”in üzərin­dən 100 ildən çox vaxt keçib. Artıq hay­ların təkcə “miatsum” kimi sərsəm ideyası deyil, milyardlarla dollarla ölçülən, siyasi avantüra ilə müşayiət olunan lobbiçilik mexanizmləri də öz əhəmiyyətini itirmiş­dir. Azərbaycan torpaqlarını işğaldan azad etməklə yanaşı, bölgədə təhlükəsizliyin, sabitliyin təmin olunmasına maneəçilik törədən, bu məqsədlə yüz minlərlə insanın faciəsinə yol açan, radikal-revanşist se­paratizmdən faydalanmağa cəhd göstərən bütün xarici aktorların riyakar planlarını birdəfəlik pozdu. 

Sonda onu da nəzərə çatdıraq ki, Azərbaycanın Rusiyadakı səfiri Polad Bülbüloğlu Rusiya Federasiyası Dövlət Dumasının MDB komitəsi sədrinin birin­ci müavini Konstantin Zatulinin təxribatçı videomüraciəti ilə əlaqədar Rusiya Döv­lət Dumasının sədri Vyaçeslav Volodinə məktub göndərib. Zatulinin dövlətçiliyi­mizin və xalqımızın əleyhinə bəyanatlar verdiyi vurğulanan məktubda Azərbaycan tərəfinin bu cür nalayiq halların qarşısını almaq üçün Rusiyanın rəsmi orqanlarına dəfələrlə müraciət etməsinə baxmayaraq onun ölkələrimiz arasında müttəfiqlik münasibətlərinə xələl gətirən təxribatçı fəaliyyətinə qarşı hələ də təsirli tədbirlər görülmədiyi qeyd olunur. 

Məktubda P.Bülbüloğlu, həmçinin V.Volodindən Rusiyanın rəsmi mövqeyinə və Dövlət Dumasının reqlamentinə uyğun olaraq, bu məsələyə prinsipial yanaşmasını və Zatulin tərəfindən gələcəkdə bu cür təx­ribatçı hərəkətlərin qarşısını almaq üçün mümkün olan bütün tədbirləri görməsini təkidlə xahiş edib.

Bu gün “kollektiv Qərb”, ermə­nipərəst qüvvələr da yaxşı bilirlər ki, Azər­baycanla Ermənistan arasında sülhün əldə olunması Rusiyanın strateji maraqlarına cavab verir. Daha Kremlin “Vardanyan kartı”ndan istifadə etmək kimi istəyi də yoxdur. Bu səbəblərdən Rusiyadakı er­məni lobbisinin təxribat xarakterli açıq­lamalar verdirməklə, yazılar yazdırmaqla vasitəçilərsiz sülh danışıqlarına, eləcə də Azərbaycan–Rusiya münasibətlərinə zər­bə vurmaq, bölgədə gərginliklər yaratmaq kimi cəhdləri heç bir nəticə verməyəcək. Ermənilərin puluna onlara “züy tutanlar” – Zatulin, Tolmaçev və digərlərinin verdi­yi açıqlamalar heç bir halda Rusiya döv­lətinin mövqeyi ola bilməz. Bu, yuxarıda yazdığımız kimi, bir tərəfdən Rusiyadakı zəngin erməni diasporunun apardığı an­ti-Azərbaycan təşviqatının növbəti dalğa­sı, digər tərəfdən isə “siyasi təzyiqi” xeyli qalxmış Ermənistan ictimaiyyətinin üstünə “su çiləmək” məqsədini daşıyır.

Tofiq ABBASOV, 
siyasi şərhçi:

– Rusiya erməni lobbisinin güclü dayaqlara malik olduğu ölkələrdən biridir. Onu da yaxşı başa düşürük ki, Zatulin, Tolmaçev kimi bəzi depu­tatlar, hüquqşünaslar, ekspertlər bir­başa təsir altında olmasalar belə, Ara Abramyanın rəhbəri olduğu ittifaqla yaxın əlaqələrə malikdirlər. Bu, ge­niş maliyyə imkanları olan ittifaqdır. Hətta, bir dəfə Rusiya Prezidenti Ab­ramyanın üzünə demişdi ki, həddinizi aşmayın, çünki Rusiyada yaşayan er­mənilərin sayı Ermənistandakı ermə­nilərdən çoxdur. 

Azərbaycana təzyiq göstərmək, mövqelərimizi sarsıtmaq üçün bunlar həmişə bəhanə axtarıblar. Əlbəttə ki, bunlar səmərəsiz və məqsədə çatılma­sı mümkün olmayan cəhdlərdir. Zatu­linin separatçılara təbriki, yaxud ona bənzər siyasi avantüristlərin çıxışları onların siyasi fırıldaqçı olmalarına də­lalət edir. Erməni vəsaitinin üstündə oturmuş və ondan yararlanan tiplər özlərini nüfuzlu siyasi xadim kimi qələmə verməyə çalışırlar. Dövlət Du­masında komitə sədrinin müavini olan Zatulinin bu cəbhədə mövqeyi xeyli zəifləyib. Ona görə də özünü “reabi­litasiya” etməkdən ötrü Ukrayna ilə münaqişə zəminində rəsmiləri də cid­di şəkildə tənqid atəşinə tutur. Yəni, faktiki olaraq, Kremlin üzünə qayıdır. 

Anti-Azərbaycan cəbhəsində “vuruşanlar” isə beynəlxalq birliyin diqqətini Qarabağdan könüllü getmiş etnik ermənilərin “problemlərinə” yönəltməyə çalışırlar. Guya, Bakı onları “etnik təmizləmə nəticəsində” bölgədən çıxarıb. Beynəlxalq təşki­latlar, müvafiq strukturlar ermənilərin qayıdışına zəmanət verməlidirlər. Bu, tamamilə faydasız və zərərli fəaliy­yətdir. Birincisi, onları Qarabağdan Azərbaycan çıxartmayıb, qapıları da bağlamayıb. Bakı deyir ki, əgər əliniz azərbaycanlıların qanına bulaşma­yıbsa, buyurun, müraciət göndərin, vətəndaşlığımızı qəbul edin və sairə. Digər tərəfdən, onlar separatçı, avan­türist fəaliyyətləri ilə bizim vətən­daşların ata-baba torpaqlarına – Zən­gəzura qayıtmasının qarşısını almağı hədəfləyirlər. Beynəlxalq gündəliyə çıxarılan bu məsələnin həlli departa­siyaya məruz qalmış soydaşlarımızın haqqıdır. O torpaqda doğulan insanın orada yaşamaq hüquqi var. Bütün bey­nəlxalq konvensiyalarda nəzərdə tutu­lan hüquqi qayda və normalar vətən­daşlarımızın arxasında durmuş güclü sipərdir. 

Haylar məhz qabaqdangəlmişlik etmək üçün xarici dəstəkçilərini, o cümlədən, Rusiyadakı ermənipərəst şəbəkəni irəli veriblər. Heç birinin faydası olmayacaq. Azərbaycanın bərpa etdiyi ərazi bütövlüyünü BMT başda olmaqla bütün beynəlxalq təşki­latlar tanıyırlar.

İmran BƏDİRXANLI
XQ