ABŞ-ın siyasi elitası 2024-cü il prezident seçkisini siyasi üstünlük məsələsi deyil, “ümid və ağrı” arasında seçim hesab edir.
Bu fikri “Fox News”-a müsahibəsində respublikaçı senator Con Kennedi bildirib: “Baydenin prezidentliyi dövründə ölkədə cinayətlər artıb, enerji sektoru batıb, sərhəddə xaosdur, ABŞ beynəlxalq arenada nüfuzunu sürətlə itirir, insanlar isə sürətlə yoxsullaşırlar”. Kennedi tam səmimi şəkildə bildirib ki, əhali axmaq deyil, Baydenin siyasətinin nəyə gətirib çıxardığını yaxşı başa düşür.
Ölkədə vəziyyət həqiqətən belədirsə, onda prezident seçkisi marafonunda Bayden Trampı, yoxsa Tramp Baydeni üstələyəcək? Son praymerizlər hansı namizədin daha çox seçilmək şansına sahib olduğunu göstərir? Ümumiyyətlə, seçkilərə hazırlıq prosesi hansı hadisələrlə diqqət çəkir?
Dünya mətbuatının diqqət mərkəzində olan əsas məsələlərdən biri, əlbəttə, Baydenin əqli sağlamlığı ilə bağlı respublikaçı konqresmenlərin qaldırdığı hay-küylə bağlıdır. Nümayəndələr Palatasının Koloradodan olan respublikaçı üzvü Ken Bak Konqresə Prezident Adminstrasiyasını Co Baydeni hakimiyyətdən kənarlaşdırmaq üçün Konstitusiyaya 25-ci düzəlişdən istifadə etməyə çağıran qətnamə təqdim etmək niyyətindədir.
K.Bak Baydenin zehni sağlamlığı ilə bağlı ciddi problemləri olduğuna görə vəzifəsindən uzaqlaşdırılmasını tələb edir. Səbəb kimi o, xüsusi prokuror Robert Hurun Baydenin məxfi sənədlərlə işləməsi ilə bağlı apardığı təhqiqatın hesabatını göstərib. Sənəddə prezidentə qarşı heç bir ittiham olmasa da, o, dəfələrlə yaddaşı zəif olan qoca insan kimi təqdim edilir. Bak hesabatın əksər amerikalıların çoxdan öz gözləri ilə gördüklərini əks etdirdiyini bildirərək deyib: “Prezident Bayden artıq öz postunun əsas vəzifələrini uğurla yerinə yetirə bilməz".
Bak “Fox News Digital”a müsahibəsində daha sonra deyib: “Hesabatda göstərilən çoxsaylı faktlar prezident Baydenin açıq-aşkar əqli qabiliyyətinin zəifləməsini və əqli gücsüzlüyünü açıq şəkildə nümayiş etdirir. Ölkəmizin üzləşdiyi sosial çağırışlar və təhlükəsizlik təhdidləri saysız-hesabsızdır və bu, dövlət başçısından güclü əqli və fiziki qabiliyyət tələb edir. Vitse-prezidentin və Nazirlər Kabinetinin ölkəmizi birinci yerə qoymalarının və 25-ci düzəlişin tətbiqini irəli sürmələrinin vaxtı çatıb”. O, irəli sürdüyü qətnamənin mətnində Baydenin nitqindəki yanlışlıqları və ictimaiyyət arasındakı gülüş doğuran səhvlərini sübut kimi göstərib. Qeyd edib ki, Bayden bir müddət əvvəl Fransa prezidenti Emmanuel Makronu onilliklər əvvəl vəfat etmiş sələfi ilə səhv salıb, Almaniyanın eks-kansleri Angela Merkeli 2017-ci ildə həyatdan köçmüş Helmut Kolla qarışdırıb və səhvən Misir prezidentini Meksika prezidenti adlandırıb.
Təbii ki, Nümayəndələr Palatasının üzvü Ken Bak siyasi elitanın belə qənaətdə olan nə birinci, nə də sonuncu nümayəndəsidir. Oxşar bəyanatlarla senatorlar Rik Skott və Mayk Li, həmçinin Nümayəndələr Palatasının üzvləri Meri Miller və Mayk Kollinz də çıxış ediblər. Respublikaçı senator Con Kennedi isə fevralın 29-da “Fox News”-a müsahibəsində deyib: “Bu prezident seçkiləri eks-prezident Trampla prezident Bayden arasında mübarizə olacaq. Mən prezident Trampı dəstəkləyirəm. Media mənsubları məndən bunun səbəbini soruşduqda, onlara deyirəm ki, bu, respublikaçılar və demokratlar arasında seçim deyil. Bu, daha çox ümidlə ağrı arasında seçimdir. Prezident Baydenlə biz yalnız ərzaq mağazasına getməyin xərcindən tutmuş küçələrdəki cinayətlərə qədər daha çox ağrı ilə qarşılaşacağıq.
Sərhəd açıq qanaxma yarasıdır. Düşmənlərimiz artıq bizə hörmət etmir. Demək istəyirəm ki, bu, sadəcə, bir sıra uğursuzluq idi. Əlbəttə, bu haqda danışmaq mənə sevinc gətirmir. Amma Amerika xalqı bunu belə görür”.
Bütün bunlara baxmayaraq, Ağ ev xüsusi prokuror Robert Hurun Co Baydenin məxfi sənədləri düzgün saxlamaması ilə bağlı təhqiqatının hesabatını ciddi cəhdlə tənqid etməkdədir. Xatırlayırsınızsa, Ağ evin mətbuat katibi Karine Jean-Pierre hesabat açıqlanandan dərhal sonra demişdi: “Xüsusi prokuror Hur respublikaçıdır. O, həkim deyil”. Və əlavə etmişdi ki, “Amerika prezidentinin vəziyyəti ilə bağlı qərarı "təbii ki, həkim verməlidir".
Nəhayət, fevralın 28-də ABŞ prezidenti Milli Hərbi Tibb Mərkəzində illik tibbi müayinədən keçib. Bundan dərhal sonra onun həkimi Kevin O’Konnor ictimaiyyətə hesabat verərək bildirib ki, Co Bayden öz vəzifələrini yerinə yetirə bilir.
Sənəddə deyilir: “Prezident Bayden prezidentin vəzifələrini, o cümlədən icra hakimiyyətinin rəhbəri, dövlət başçısı və Ali Baş Komandan kimi vəzifələrini uğurla yerinə yetirməyə qadir olan sağlam, fəal, 81 yaşlı möhkəm kişidir”. Bununla belə hesabatda Baydenin yuxu apnesi, hiperlipidemiya, qastroezofageal reflüks və artrit daxil olmaqla bir neçə xəstəlikdən əziyyət çəkdiyi də qeyd olunur.
Təbii ki, bu, demokratlarda tam arxayınçılıq yarada bilməz. Ona görə də xüsusi prokurorun hesabatı, respublikaçı rəsmilərin açıq hücumları və özlərinin müşahidələri bir çox demokratları 2024-cü il prezident seçkilərində alternativ namizədi nəzərdə tutan “B” planı haqqında düşünməyə vadar edib. “Politico” nəşri bu barədə dərc etdiyi məqalədə yazır: “İndiyə qədər Co Baydenin partiya üzvləri bu məsələ ilə bağlı şayiələrdən qətiyyətlə qaçırdılar, lakin xüsusi prokurorun sənədi, çox güman ki, onları daha fəal hərəkətə keçməyə məcbur edəcək”.
Demokratların prezident seçkiləri planına korreksiyasında bir çox amillər xüsusi rol oynayıb. Bunlara Baydenin yeni prezidentlik müddəti üçün çox qoca olduğuna dair geniş yayılmış rəy və seçicilərin mövcud siyasi kursdan məyusluğu da daxildir. Populyarlıq səviyyəsinə görə Bayden, prezident seçkilərinin taleyini həll edən mühüm ştatlarda keçmiş eks-prezident Donald Trampdan geri qalır. Bu, qarşıya çox ciddi suallar çıxarır: 46-cı prezident noyabrda yenidən partiyaya rəhbərlik edə biləcəkmi və gözlənilməz vəziyyətlər yarandığı məqamda partiya üzvlərinin hansı ehtiyat variantları var?
Prosessual və siyasi incəliklərə görə, Baydeni sadəcə əvəz etmək çox çətin olacaq. Çünki o, artıq demokratların əsas namizədi kimi birbaşa finiş xəttinə çıxıb. Hətta fevralın 28-də nəticəsi elan olunan Miçiqan ştatında keçirilmiş praymerizdə belə böyük səsçoxluğu ilə öz partiyasının qalibi olub. Belə ki, demokratlar partiyasından Bayden 81,1 faiz, respublikaçıların əsas namizədi Tramp isə 68,2 faizlə qalib gəlib.
Doğrudur, Bayden səslərin mütləq əksəriyyətini qazanıb, lakin onların 13,2 faizi "qeyri-sadiq" sütununu (təxminən "hamıya qarşı") qrafasını seçib. Amerika mediası bunu Baydenin Qəzza zolağı ilə bağlı siyasətinə qarşı çıxan “Miçiqanə dinlə” hərəkatının fəaliyyəti ilə əlaqələndirir. Hərəkatın rəsmi saytında deyilir: “2016-cı ildə Tramp Miçiqanda 10 min səslə qalib gəldi. Baydenin Qəzza ilə bağlı siyasətindən narazı olan Miçiqan ştatının qeyri-müəyyənlikdə qalan demokratları bu üstünlüyü bizim təşkil etdiyimizi göstərə bilərlər. Bayden bizim səsimizi öz siyasətini dəyişdirməklə qazanmalıdır”. Ona görə də hərəkatın fəalları “qeyri-sabit” qrafasında səs verməyə çağırıblar.
Təbii ki, Yaxın Şərqdəki vəziyyətin qeyri-müəyyənliyini nəzərə alaraq, yerli müsəlmanların Baydendən narazılığı daha da artacaq. Miçiqanda adətən demokratlara üstünlük verən, lakin hazırda Baydendən narazı olan etnik ərəblərin dəstəyi çox əhəmiyyətlidir. Əlbəttə, onlar Trampı dəstəkləməyəcəklər, amma sadəcə seçkiyə gəlməyəcəklər və Baydenin ştatda qalib gəlmək şanslarını azaldacaqlar.
Belə bir vaxtda ABŞ medasında Co Baydenin əsas rəqibi olan respublikaçıların əsas namizədi Trampın İllinoys ştatında keçirilən praymerizdə iştirakına qadağa qoyulması ilə bağlı xəbər yayılıb. “The New York Times” nəşri məhkəmənin qərarına istinadən xəbər verir ki, bu qərarı Kuk (İllinoys ştatı) dairə məhkəməsinin hakimi Treysi Porter verib.
Porter bəyan edib ki, ştatın seçki komissiyası yanvarda Trampın ştatın seçkilərdə iştirakına icazə verməklə səhv edib. Hakimin sözlərinə görə, indi qurum keçmiş prezidentin martın 19-da ştatda keçiriləcək ilkin səsvermədə iştirakını qadağan etməli olacaq. O, Trampın 2021-ci il yanvarın 6-da baş verən hadisələrdə – “Kapitoliya hücum”da iştirakı səbəbindən ştatda ilkin seçkilərdə iştirak edə bilməyəcəyini vurğulayıb. Porterin qərarı cümə gününə qədər qüvvəyə minəcək və bu da Trampa qərardan şikayət etmək imkanı verəcək.
Müşahidələrdən aydın görünür ki, Birləşmiş Ştatlarda noyabrda baş tutacaq prezident seçkilərinə qədər hələ çox hadisələr baş verəcək. Ona görə də indidən Baydenin, eləcə də Trampın bu seçkilərdə əsas rəqib olacaqlarını əminliklə söyləmək hələ çox tezdir.
İlqar RÜSTƏMOV
XQ