II Məqalə
Ermənilər öz fikirlərini, hisslərini və niyyətlərini gizlədən dələduzlara və yalançılara çevrilmişlər.
Aleksandr Düma (Ata)
Birinci yazımızda Cənubi Qafqazda geosiyasi parçalanma riskinin təməlində hazırda regionda rəqabət aparan iki geosiyasi xəttin qarşılıqlı münasibətlərindən yaranan ziddiyyətli vəziyyətin dayandığı tezisini irəli sürmüşdük. Həmin geosiyasi trendlərdən biri son yüzilliklərdə Cənubi Qafqazda dominantlıq edən “konfrontasiya geosiyasəti”dir. Digəri isə dünyanın güclü geosiyasi aktorlarının II Qarabağ savaşından sonra postmüharibə mərhələsinin mahiyyəti və məzmununa uyğun inkişaf edən “yeni geosiyasi konstruktivizm” xəttidir.
Konfrontasiya geosiyasətinin regionda aktoru Ermənistandır. Konstruktiv geo-siyasətin aparıcı gücü isə Azərbaycandır! Müəyyən mənada, bu iki yerli gücün qarşılıqlı münasibətləri və ona dünyanın böyük güclərinin təsiri özəlliyi hazırda regional geosiyasi proseslərin əsas trekini təşkil edir. Məsələnin bu tərəfi üzərində geniş dayanmaq lazım gəlir.
Siyasi və geosiyasi etibarlılıq
Ümumiyyətlə, keçən əsrin sonları XXI əsrin əvvəllərindən siyasətdə etbarlılıq məsələsinin dərki xeyli aktuallaşmışdır. Tədqiqatçılar məsələni birbaşa “tərəflərin bir-birinə etibarı” anlamı kontekstində qoyurlar. Problem miqyasından asılı olmayaraq, siyasi və geosiyasi münasibətlərin müsbət nəticəli tənzimlənməsi kontekstində araşdırılır. Məsələn, Frensis Fukuyama 1996-cı ildə bir cəmiyyət və ölkə mqiyasında etibarllılıq problemini sosial fəzilətlilik və tərəqqiyə aparan yol faktorları ilə sıx bağlılıqda araşdırmışdır. O, müxtəlif ölkələrdə iqtisadi, sosial və siyasi xarakterli etibarlılığın modellərini tədqiq etmişdir.
Müəllif nümunə kimi, ABŞ, Böyük Britaniya, ÇXR, Fransa, Yaponiya, Rusiya və digər dövlətlərin etibarlılıq dərəcəsini araşdırılır. Bütün faktorları vahid sistemdə birləşdirmiş və ümumu nəticələr əldə etmişdir. F.Fukuyama hesab edir ki, kapitalizm sistemində uğurluluq əsas olaraq etibarlılıqla müəyyən olunur. Burada etibarlılıq dövlətin köməyi olmadan ailədən kənarda insanların birləşə bilməsini ifadə edir. Həmin kriteriya əsasında F.Fukuyama ABŞ, Almaniya və Yaponiyanı yüksək etibarlılıq dərəcəsi olan ölkələr kimi müəyyənləşdirir. Politoloji aspektdə etibara iki rolda baxırlar. Birincisi, toplum miqyasında həmrəylik dərəcəsidir. İkincisi, etibar toplum səviyyəsində qəbul edilən “oyun qaydaları”na əməl etməkdir. O cümlədən, üzərinə düşən öhdəlikləri yerinə yetirməkdir. F.Fukuyama bu rolların bir-biri ilə sıx əlaqədə olduğunu yazır.
Deməli, ümumi halda etibar subyektin (bu halda dövlətin, ölkənin) təsəvvürləri və əhval-ruhiyyələrinin cəmidir ki, onun resurslarının artması və ya azalmasına gözləntisini əks etdirir. Eyni zamanda, bu, subyektin bu funksiyaları yerinə yetirməyə hazırlıq səviyyəsinin göstəricisidir. Təbii ki, bunlara əks olan keyfiyyətlərin cəmi etibarsızlığı ifadə edir. Psixoloji olaraq, etibarlılıq kommunkasiyanın ön qaydası kimi dərk edilə bilər.
Bütün bunların fonunda Konfutsinin etibarlılıq anlayışının maraqlı izahı vardır. Humanizm, qanunçuluq, xeyirxahlıq və müdriklik etibara əsaslanır və o, bütün bu prinsiplərin təməlində dayanır.
Onu da qeyd edək ki, etibarlılıq dərəcəsində iki aspektdən biri daha aktiv rol oynaya bilər. Onlardan biri oyun qaydalarının üstünlük təşkil etməsidir. Digəri isə şəxsi münasibətlərin, mənəvi-əxlaqi faktorların üstün olmasıdır. Etibarlılığın birinci halında cəmiyyət qanunun aliliyi ilə idarə olunur. İkinci növdə şəxsi münasibətlər önə çıxır ki, bu da bərpa korrupsiyanı gücləndirir. Birinci cəmiyyətlərə “soyuq toplumlar”, ikincilərə isə “isti toplumlar” deyirlər. Rusiyanı ikincilərə aid edirlər.
Etibarlılıq məsələsini ayrıca bir cəmiyyətə o dərəcədə aid edirlər ki, bir sıra tədqiqatçılar həmin fenomeni “qorxusuz iş” adlandırırlar.
Etibarlılıqla bağlı bu tezisləri siyasi və geosiyasi sferalara tətbiqini necə konseptuallaşdırmaq olar? Öz-özünə aydındır ki, siyasi və geosiyasi münasibətlərdə etibarlılıq ciddi yer tutur. Bunu həm sözün adi mənasında, həm də nəzəri anlamında dərk etmək çətin deyil. Və burada söhbət dövlətlərin etibarlılığından, qəbul edilən qaydalara, müəyyən olunan oyun qaydalarına əməl etmələrindən danışmaq mümkündür. Əgər dövlət razılaşdırılmış şərtlərə hər hansı bəhanə ilə əməl etməkdən boyun qaçırırsa, bu, onun yüksək etibarsızlıq göstəricisidir. Belə olan halda, həmin dövlət oynadığı roldan səmərə gözləmir və ya səmərə olacağına inanmır. Nəticədə, o, etibarsız tərəfdaş olur.
Etibarsızlıq və etibarlılıq əlamətlərinin siyasi və geosiyasi faktorları kimi bir sıra terminlərdən istifadə etmək olar. O sırada “siyasi normalar”, “siyasi suverenlik” və “siyasi təzyiq” anlayışlarına nəzər salmaq lazım gəlir.
Siyasi normalar
“Siyasi normalar” siyasi dəyərlər və siyasi qaydaları, nümunələri tənzimləyən vacib requlyativdir. Bütövlükdə siyasi normalar siyasi davranışı, gözləntiləri və standartları, qadağaları konkret siyasi sistemin dəyərlərinə uyğun tənzimləməsidir. O halda regional miqyasda geosiyasi normalar regionun dəyərlərinə uyğun dövlətlərarası münasibətlərin tənzimlənməsini ifadə edir. Burada regionun təhlükəsizliyi və sabitliyi ön plana çıxır.
Siyasi və geosiyasi suverenlik
Vurğulanan tezislərdən “siyasi suverenlik” və “regional geosiyasi suverenlik” kimi anlayışlara baş vurmaq olar. Siyasi suverenlik dedikdə dövlətin başqa mərkəzlərdən asılı olmadığı ifadə edilir. Regional miqyasda geosiyasi suverenlik isə region ölkələrinin birgə kənar təsirləri neytrallaşdırmaq əsasında ortaq maraqlarını təmin edən geosiyasi şərtlərə əməl olunmasıdır. Aydındır ki, burada həm regionun ayrı-ayrı dövlətləri suveren olmalı, həm də onlar həmin suverenlik “sahəsi”ndə, bütövlükdə, regionun asılı olmamasını nəzərdə tutan ortaq şərtləri müəyyən etməlidirlər. Lakin bu da son hədd deyil. Çünki, eyni zamanda, həmin şərtlərə praktiki əməl edilməsinə nail olmaq gərəkdir.
Buradan aydın olur ki, siyasi suverenlik olmadan hər hansı müstəqil dövlətin siyasi (həm də geosiyasi) normalara real əməl etməsi mümkün deyildir. Ona görə də siyasi suverenlik siyasi normaları təmin edən ümumi “fondur”. Eyni məntiqlə geosiyasi suverenlikdən danışmaq olar. Hər hansı bir region o zaman geosiyasi suveren olur ki, qəbul edilən qaydalara bütün region ölkələri əməl etsinlər. Üstəlik, bunun geosiyasi proyeksiyasına birlikdə (yəni qarşılıqlı əlaqədə) nail olsunlar.
Siyasi və geosiyasi təzyiq
Siyasi suverenlik və siyasi normaların etibarlılıq kontekstində münasibətlərinin müəyyən edilməsində “siyasi təzyiq” anlayışının roluna da baxmaq gərəkdir. Əslində, geosiyasi sabitlik və bütövlük aspektində siyasi (iqtisadi, sosial, ideoloji, energetik və s.) təzyiqlər siyasi normaların hansı dərəcədə siyasi suverenliyin təmin edilməsində rol oynaya biləcəyinin ölçüsüdür. Siyasi təzyiqin sıfır olduğu yerdə normalar maksimal tətbiq edilə bilir, əks halda vuğrulanan nisbət dəyişir. Buna görə də “siyasi təzyiq”in konseptual anlamı vacibdir. Siyasi təzyiq geosiyasi kontekstdə və regional təhlükəsizlikdə kənar qüvvənin regional miqyasda öz marağının təminatı üçün tətbiq etdiyi texnoloji-ideoloji, diplomatik və iqtisadi təsirlər sistemidir. Bunun üçün xüsusi təzyiq qrupu yaradıla bilər. Lakin, bu, mütləq şərt deyildir. Əsas odur ki, təzyiq subyekti (ayrıca bir güclü dövlət və ya dövlətlər qrupu) yerli ölkələrə müxtəlif üsullarla onun şərtləri əsasında fəaliyyət göstərmələrini tələb edir. Bu da istər-istəməz həm yerli dövlətlərin əks-reaksiyasına səbəb olur, həm də regionda geosiyasi sınma xətləri (və ya çatları) yaradır. Regional intriqalar, qarşıdurmalar və münaqişələr həmin geosiyasi sınma xətləri üzrə yarana bilər. Aydındır ki, bu vəziyyət regional parçalanmalara ciddi təsir edə bilər.
Beləliklə, siyasi və ya geosiyasi təzyiq müxtəlif dərəcədə regional geosiyasi bütövlüyə mənfi təsir edir və parçalanmalara yol açır. Bu proses dövlətin etibarlılıq dərəcəsi ilə birbaşa bağlıdır.
Qarşıdurma vəgeosiyasi konstruktizm
İndi vurğulanan nəzəri məqamların konkret Cənubi Qafqazda təzahür nümunələrinə baxaq. Biz, geosiyasi parçalanma riskinə geosiyasi konfrontasiya və yeni geosiyasi konstruktivizm xətlərinin qarşılıqlı təsirlərinin ortaq “məkanı”nda nəzər salacağıq. Konkret faktlardan başlayaq. Rusiyanın Xarici İşlər naziri Sergey Lavrov (atası ermənidir) Ermənistan rəhbərliyinə çağırış edərək bildirmişdir ki, ABŞ-a etibar (diqqət edin, “etibarlıq” anlayışı konkret geosiyasi kontekstdə işlədilir) edən hər bir postsovet məkanı ölkəsinin “qibtə edilməyəcək taleyi olur”. Burada siyasi məntiq üç geosiyasi məqam üzərində qurulmuşdur: Birincisi, “Ermənistan Rusiyanı itirərsə...”, ikincisi, “İrəvanda bir sıra aparıcı siyasətçilər bunu deyirlər”, üçüncüsü, “Rusiyanı itirməyi, bir qayda olaraq, Qərbi qazanmaq fonunda qəbul edirlər”.
Burada üç məntiqi özəl bir ümumi mənzərə yaradır: Rusiyaya görə, Ermənistan geosiyasi etibarsız dövlətdir! Erməni siyasətçilərin ritorikasına görə, bu etibarsızlığın o biri tərəfi Qərbə etibar etməkdir. Bunların hansının real olduğunu zaman göstərəcək. Lakin geosiyasi etibarsızlıq aspektində əhəmiyyətli olanı ondan ibarətdir ki, Rusiyanın bu qiymətləndirməsi birbaşa regional geosiyasi təhlükəsizliyin və sabitliyin təminatı kontekstində real məzmun kəsb edir. Çünki Moskva məsələni məhz həmin müstəvidə təqdim edir: “Qərbə üz tutanların taleyi qibtəedici deyil”.
Şübhə yoxdur ki, bu cür yanaşma birbaşa Cənubi Qafqazda geosiyasi olaraq hər şeyin dəyişə biləcəyinə işarədir. Bu mənada, söhbət Ermənistana göstərilən siyasi təzyiqdən gedir. Elə bir təzyiq ki, erməni dövlətinin suverenliyi şübhə altına alınır. Və eyni zamanda, siyasi normaları, əvvəllər əldə olunmuş razılaşmaları qeyri-legitim və təxribatçı formada pozmaqda Ermənistanı ittiham etməkdir!
(ardı var)
F.MƏHƏMMƏDOĞLU
XQ