Keçmiş XİN rəhbəri Paşinyan iqtidarını hədəfə almaqla, özünün təmsil olunduğu mənfur komandanın iç üzünü açır
Qocaldıqca ağlı ilə bərabər, simasını da itirən Ermənistanın sabiq xarici işlər naziri Vardan Oskanyan yenə də ağzına gələni danışıb. Bu barədə söz açacağıq. Hələlik isə bildirək ki, son zamanlar V.Oskanyanın işi-gücü baş nazir Nikol Paşinyanın komandasına ağıl verməkdir. Doğrudur, Nikol və komandasının ağıla ehtiyacı var. Ancaq Oskanyanın ağlına yox. Çünki bu şəxs hazırda tipik erməni xəstəliyinin bariz sifətidir, özündə avantürizmi nəinki bəsləyir, onu yoluxucu mərəz kimi həm də ətrafa sıçratmaqla məşğuldur.
Amma bir neçə ildir fəallığını artıran V.Oskanyan Facebook hesabında yaydığı axırıncı videomüraciətində artıq erməni iqtidarına ağıl verməkdən daşınıb. Yəqin, bunun mənasızlığı qənaətinə gəlib. Deyir ki, Paşinyanın hərəkətləri və onun hakimiyyəti sayəsində Ermənistan “Artsax”ı viran qoydu və gümüş nimçədə Azərbaycana təqdim etdi.
***
Ermənistanın keçmiş xarici işlər naziri, eyni zamanda, bildirib ki, müstəqillik əldə etdikdən sonra ölkədə 4 lider - 3 prezident, konstitusiyaya dəyişikliklərdən sonra isə artıq baş nazir var idi. Onların dövründə Qarabağda yeni prezident seçildi. Amma bu üç rəhbərdən heç biri Qarabağın yeni “prezidentinin” andiçmə mərasimində rəqs etməyib, Xankəndi meydanında çıxış edərək deməyib ki, “Qarabağ Ermənistandır və nöqtə”. Paşinyan isə bunu etdi. 44 günlük müharibədən cəmi bir neçə gün əvvəl isə o, Matenadaran zalında Ermənistanın 20-50 illik baxışını açıqladı. Həmin baxışa əsasən ölkəyə yeni ərazilərin lazım olduğu bəyan edildi. Oskanyanın fikrincə, Paşinyan və hökuməti sadəcə yuxuda idi və bu gün də vəziyyət eynidir. “Bütün bunların nəticəsi o oldu ki, “Artsax”ı viran qoyub, nimçədə Azərbaycana təhvil verdik. Bu gün isə Ermənistan artıq boşqabdadır, lakin onlar hələ də bunu kimə verəcəklərini bilmirlər”, - deyə Oskanyan bildirib.
***
Əslində, Oskanyanın dilə gətirdikləri reallıqdır. Başlıca məsələ isə budur ki, reallıq gündəmə şərəfsizcəsinə, riyakarlıqla sırınır. Onun söylədiklərindən belə nəticə hasil olur ki, Nikola qədərki erməni siyasi industriyası, o cümlədən hakim komandası Qarabağı vaxt öldürməklə, hiyləgərliklə saxlamaq istəyirmiş. Bunu sübuta yetirən başqa amillər də var. Axı erməni beyin mərkəzləri bir zamanlar Azərbaycanda nəsil dəyişikliyinin Qarabağa münasibət trayektoriyasını cızmış, müddət müəyyənləşdirmişdilər. Məsələn, 20, 30, 40, 50 ildən sonra Azərbaycan insanı Qarabağı hansı formada unudacaq. Amma hesablamalar puça çıxdı.
Prezident İlham Əliyevin də fəxrlə bildirdiyi kimi, bölgəni onun hakimiyyəti dövründə dünyaya gəlmiş gənclər azad etdilər. Ümumən, Azərbaycan xalqı Qarabağ dərdini unutmadı, dövlətimizin siyasəti bu dərdi ümummilli müqavimət və dirəniş əzminə çevirdi. Yekun parlaq nəticə isə göz önündədir.
***
Oskanyan özü də haqqında söz açdığımız hiyləgərlikdə, Qarabağı unutdurmağa çalışan sistemdə təmsil olunmuş biridir. Uzun müddət Azərbaycanla sülh danışıqlarının bilavasitə iştirakçısı kimi Ermənistanın prosesdə hansı yaramaz oyunlar oynadığının fərqindədir. Ən acınacaqlısı isə budur ki, keçmiş XİN rəhbəri belə gedişləri diplomatik bacarıq olaraq təqdim edir. Görünür, onun üçün Ermənistan prezidenti postunu tutmuş Serj Sarkisyanın tualet adı ilə danışıqlar masasını tərk etməsi son dərəcə böyük məharət imiş.
***
Əslində, məsələyə fərqli aspektdən yanaşsaq, deyə bilərik ki, Paşinyan “Qarabağ Ermənistandır və nöqtə” deyəndə istər Koçaryandan, istərsə də Sarkisyandan min dəfə səmimi davranmışdı. Erməni məkrini, ərazi iddiasını açıqdan-açığa ortaya qoymuşdu. Bunu hansı ağıl və düşüncə ilə etmişdi, hansı cəsarətlə Ermənistan üçün, belə demək mümkünsə, ölüm hökmü çıxarmışdı, hər nə idisə, həmin an Nikol riyakarlıq etməmişdi. Danışıqlardan tam uzaqlaşmış və 2018-ci ilədək aparılan nizamlama prosesinin vaxt udmaq naminə olduğunu ortaya qoymuşdu. Oskanyan isə bu fikirdədir ki, Paşinyan əvvəlki liderlər kimi davranmalı idi...
Bəli, V.Oskanyan Ermənistanın hazırda boşqabda olduğunu söyləməkdə haqlı görünə bilər. Çünki Nikol vaxtilə irəli sürdüyü “Qarabağ Ermənistandır və nöqtə” sərsəmləməsinə əsaslanmış kor inadla xarici siyasət kursu müəyyənləşdirməkdədir. Koçaryandan və Sarkisyandan fərqli olaraq, Paşinyanın dövründə anti-Azərbaycan ritorikası daha güclüdür və bu ritorika ölkəmizin nəinki Cənubi Qafqazdakı, bütövlükdə dünyadakı roluna demarş xəttini seçib.
Bəli, elə buna görə də hazırda erməni iqtidarı, Oskanyanın təbirincə desək, boşqabdadır və obrazlı ifadə etsək, boşqabda üzür, ancaq özünü okeanda üzürmüş kimi aparmaqdadır. Əlbəttə, demək olmaz ki, Oskanyanın dediyi də elə budur. O, daha çox Paşinyan hakimiyyətinin səriştəsizliyi üzərinə fokuslanıb və elə zənn edir ki, təmsil olunduğu komanda iqtidarda qalsaydı, indiki durum yaranmayacaqdı.
***
Ermənistanın sabiq XİN rəhbərinin söylədikləri ilə əlaqədar mübahisə etmək mümkündür. O anlamda ki, 2018-ci il inqilabından sonra İrəvanın siyasi kursu tamamilə dəyişdi. Həmin vaxta qədər ölkəni idarə etmək üçün heç bir bacarığa ehtiyac yox idi və Ermənistanın o zamankı durumu araba kölgəsini öz kölgəsi hesab edən iti xatırladırdı. Oskanyan da itlərdən biri idi və hesab edirdi ki, hansısa müstəvidə atdığı addım rəsmi İrəvanı Qarabağ avantürasında güclü tərəfə çevirir. Reallıq isə bu idi ki, həmin vaxt ölkə Rusiyanın himayəsinə sığınmışdı və Ermənistan Moskvanın kölgəsini öz kölgəsi kimi təsəvvürə gətirirdi. Oskanyan da bu ağılla 10 il XİN rəhbəri postunu tutmuşdu.
***
V.Oskanyan özünün videomüraciətində N.Paşinyanın və onun komandasında təmsil olunanların son zamanlar haqqında söz açdıqları “Dünya kəsişməsi” layihəsini də məsxərə predmetinə çevirib. Əslində, bu baxımdan da sabiq XİN rəhbərini haqlı saymaq üçün əsaslar var. Məsələ ondadır ki, Paşinyanın “Dünya kəsişməsi” mahiyyətcə Azərbaycanın Zəngəzur dəhlizi ideyasına alternativ kimi irəli sürülmüş təşəbbüsdür. Əgər Zəngəzur dəhlizi Azərbaycanın digər ərazilərini hazırkı Ermənistanın bir hissəsindən keçib Naxçıvanla birləşdirirsə və bu, bütövlükdə, türk dünyasının birliyinə hesablanıbsa, Nikolun qaldırdığı təşəbbüs Ermənistanı tranzitə çevirir. Yəni, Fars körfəzindən Qara dənizə və Avropadan Çinə.
Amma gerçəklik budur ki, Paşinyan “Dünya kəsişməsi” məntiqini qabartmaqla, ilk növbədə, 10 noyabr 2020-ci il tarixli üçtərəfli Bəyanata əsasən, Azərbaycanın digər ərazilərini Naxçıvanla birləşdirən yoldakı təhlükəsizlik nəzarəti funksiyasını heçə endirməyə çalışır, ərazinin suveren Ermənistana məxsusluğunu bildirib orada təhlükəsizlik təminatını özü gerçəkləşdirmək məqsədi güdür. Təbii ki, böyük layihədəki başlıca oyunçular İrəvanın təhlükəsizlik zəmanətinə etibar edənlər deyil, çünki Ermənistan müstəqil dövlət deyil, Qərbin təsiri altındadır və hər an layihənin hərəkətliliyini axsada bilər.
Oskanyan qənaətinə görə, Paşinyanın “Dünya kəsişməsi” layihəsində ölkə gümüş nimçəyə qoyulub və hələlik bilinmir ki, onu kimə verəcəklər. Qeyd edək ki, ümumən İrəvan anti-Azərbaycan ritorikası yürütməklə özünü beynəlxalq aləmdən təcrid durumuna salmaqdadır. Bu isə ölkəni, həqiqətən, məhvə aparır. Ancaq Oskanyan məhv ssenarisini, belə demək mümkünsə, daha parlaq düşünür, hiss olunur ki, tam şəkildə pessimizmə qapanıb. Bildirir ki, Qarabağın erməni əhalisi heç vaxt geri qayıtmayacaq: “Nə vaxtsa biz Azərbaycana anklavları verdiyimizi və 100 mindən çox azərbaycanlını qəbul etdiyimizi görəcəyik. Təəccüblənməyin, bu mümkündür. Ən inanılmaz hadisə baş verərsə, təəccüblənməyin. Bu adamlar (Paşinyanın və komandasının üzvləri – red.) azıblar və nə etdiklərini bilmirlər”, - deyə Ermənistanın sabiq XİN rəhbəri müraciətini yekunlaşdırıb.
Ə.RÜSTƏMOV
XQ