Oğurluq kimi bədxahlığın və rüşvətxorluğun da ömrü uzun çəkmir

Xaricdəki zəngin erməni diasporunun və lobbi təşkilatlarının verdikləri pulların, hədiyyələrin əvəzində onların maraqlarına “xidmət edən”, se­paratçılara “qulluq göstərən” konqresmen, prokuror və vəkillərin baş­larının üzərini indi qara buludlar alıb. ABŞ Senatında hayların dəstəkçi­si, rüşvətxor Bob Menendezin ardınca Fransada sağçı müxalifətin lideri Loran Vokie və Norveçin Xarici işlər naziri Anniken Xyuitfeldt maliyə fı­rıldaqlarında şübhəli qismində sorğu-suala çəkilirlər. Qatı ermənipərəst mövqeyi ilə tanıdığımız, Fransada 2027-ci ildə keçiriləcək prezident seçkilərində birinci posta iddia edən Loran Vokie vəzifə səlahiyyətlə­rini aşmaqda ittiham olunur. Fransa mətbuatı bəzi dövlət məmurlarının onun fəaliyyətində çoxlu nöqsan aşkarladıqlarını yazıb.

Bu həmin Loran Vokyedir ki, Fran­sanın bəzi ermənipərəst siyasətçiləri ilə birlikdə 2023-cü ilin iyun ayında “Qarabağın blokadaya alınmasını” əsas gətirərək, guya, erməni sakin­lərə yardım etmək məqsədilə BMT-yə kollektiv müraciət ünvanlamışdı. Hay­ların “qayğıkeşi” aprel ayında İrəvan­da Qarabağdan süpürüb atdığımız separatçı-xunta rejimin “xarici işlər naziri” Sergey Kazaryanla görüşmüş, Azərbaycana qarşı qərəzli fikirlər söy­ləmişdi. Vokye o zaman təmsil etdiyi regionun dəstəyi və Fransadakı erməni icmasının təşkilatçılığı ilə Xankəndiyə “humanitar yardım” gətirəcəyinə, ma­şın karvanını Laçın yolundan keçirəcə­yinə söz vermişdi. 

Doğrudur, o vaxt populist Vokyenin bu açıqlaması rəsmi Bakı tərəfindən sərt etirazla qarşılanmış, onun davra­nışının Azərbaycanın suverenliyinə və ərazi bütövlüyünə qarşı yönəlik fəaliy­yət kimi dəyərləndirilmişdi.

Fransa Senatında büdcə müza­kirələri zamanı regional ekoloji təşki­latın rəhbəri Fabyen Qraeber Vokyeyə qarşı büdcə vəsaitlərini təyinatdan kənar, qeyri-qanuni şəkildə istifadə etməsi ilə bağlı ittihamlar səsləndirib. O, prezidentliyə iddialıya üzünü tutub belə deyib: “Sizə aid olmayan dövlət vəsaiti ilə bizim regionumuzdan karye­ranızda bir pillə yuxarı qalxmaq üçün istifadə edirsiniz. Amma ölkənin fiskal qənaət dövründə daha buna dözmək olmaz!”

Regional Şuranın deputatı, Sosi­alist Partiyasından tanınmış siyasətçi Najat Valo-Belkasem isə çıxışında bil­dirib ki, izafi xərclər, qanunsuz yollarla işədüzəltmələr Loren Vokienin regio­nun büdcəsini bərbad idarə etməsinin, şəffaflığın olmamasının bariz nümunə­sidir və mövcud vəziyyət onun siyasi gələcəyi ilə bağlı ciddi sualları ortaya çıxarır.

“Reuters” agentliyi isə Vokienin özünün partiyadaşları və hökumət məmurları barədə təhqiramiz, kobud ifadələr işlətdiyi, biabırçı şərhlər verdi­yi səs yazısının onu hər tərəfdən zər­bələr altında qoyduğunu xəbər verib. Hətta, iş o yerə çatıb ki, Mühafizəkarlar Partiyasının yüksək çinli üzvlərindən biri üzvlükdən istefa vermək qərarına gəlib. 

Dilini dinc saxlaya bilməyən 42 yaşlı Vokienin siyasi cəhətdən səbat­sız olduğu çoxlarına bəllidir. O, iki-üç il bundan əvvəl Almaniyanın sabiq kans­leri Angela Merkeli ələ salaraq, onu xa­rizmadan məhrum, Kanadanın baş na­ziri Castin Tryudonu isə ifrat dərəcədə siyasi korrektəli adlandırmışdı. Fransa parlamentində ən böyük müxalif fraksi­yaya malik partiyanın üzdəniraq lideri bir il bundan əvvəl prezident Emma­nuel Makronun həyatını “cəhənnəmə çevirəcəyini” bəyan etmişdi. İntəhası, onun mühacirlərə münasibətdə tutdu­ğu kəskin mövqeyi ölkənin keçmiş baş naziri Alen Jüppe daxil olmaqla, parti­yanın bir neçə tanınmış nümayəndəsi­ni Vokienin siyasəti kursundan məsafə saxlamağa məcbur edib.

Fransanın BFM TV telekanalının sifarişi ilə Elabe şirkətinin üç gün bun­dan əvvəl keçirdiyi rəy sorğusunun nə­ticələri göstərib ki, respondentlərin 57 faizi Vokienin çıxışlarını “şokasalan, heyrətləndirici” kimi dəyərləndirib.

“Vokienin şərhlərini dinləyəndə əv­vəlcə düşündüm ki, o, özünü tələbələ­rin qarşısında “ağıllı böyük qardaş” kimi göstərməyə çalışır, sonra dediklə­rindən peşman olduğunu söyləyəcək. Amma, bu, olmadı”. Bu sözləri biabırçı axşam tele-şousundan bir gün sonra “Reuters”-ə açıqlamasında ölkənin sa­biq nəqliyyat naziri, keçmiş partiyadaşı Dominik Bussero deyib. 

Oxuculara xatırladaq ki, Loran Vo­kie Fransada ən qatı ermənipərəst lobbiçilərdən sayılır. O, Qarabağdakı marionet rejimi açıq-aşkar dəstəklə­miş, dəfələrlə beynəlxalq təşkilatları Azərbaycana qarşı sanksiyalar tətbiq etməyə çağırmışdı. İntəhası, indi, o, Bakının tarixin arxivinə göndərdiyi separatçı rejim kimi, ədalət mühakimə­sinə cəlb olunacağı günü gözləməkdə­dir. 

* * * 

Ermənipərəst siyasilərdən daha birinin əskisi tüstülənməyə başlayıb. Bu, Norveçin Xarici işlər naziri Anni­ken Huitfeldtdir. Beş gün bundan əvvəl tutduğu postundan istefaya göndərilən xanım Huitfeldtin adı silah şirkətinin səhmlərinin qanunsuz satışı ilə bağ­lı qalmaqalda hallanır. Bununla bağlı Norveç Krallığının Baş naziri bildirib ki, səhmlərin alqı-satqısı ilə bağlı qaran­lıq məsələlər onun vəzifəsindən istefa verməsini əsaslandırıb. 

Bundan başqa Anniken Huitfeldt həyat yoldaşı Ola Petter Flemin “Kon­gsberg Gruppen” silah şirkətinin səhm­lərini qanunsuz olaraq satdığını etiraf edib. Sabiq baş nazirin sözlərinə görə, onun ərinin investisiya fəaliyyətindən xəbəri olmayıb.

Qeyd edək ki, Anniken Huitfeldt də özünün ermənilərə “özəl rəğbəti” ilə tanınan siyasətçilərdən olub. O, keçən il İrəvana rəsmi səfəri çərçivəsində erməni həmkarı Ararat Mirzoyanla ke­çirdiyi görüşdə ölkəmizə qarşı əsassız və məsuliyyətsiz ittihamlar səsləndirib. Həmçinin, Qarabağın erməni sakinlə­rinin 44 günlük Vətən müharibəsindən sonra “humanitar böhranla” üzləşdiyini, onların “hüquqlarının qorunmasının” vacibliyindən danışıb.

Leyboristlər Partiyasının 53 yaşlı funksioneri, 2021-ci ilin oktyabr ayın­dan etibarən xarici işlər naziri postun­da əyləşmiş Anniken Huitfeldt hökumət azlığının ən uğursuz kadrlarından he­sab olunur. Xatırladaq ki, Huitfeldtdən əvvəl ABŞ Konqresinin xarici əlaqələr komitəsinin sədri, ermənipərəst Bob Menendez səlahiyyətlərindən sui-isti­fadədə ittiham edilərək istefa verməyə məcbur olub. Yəqin yaxın vaxtlarda korrupsiyaya bulaşmış, şübhəli və çirkli fəaliyyətləri ifşa olunacaq ermə­nipərəstlərin növbəti siyahısı ortayab çıxacaq. 

Yeri gəlmişkən, ABŞ Konqresin­də Azərbaycana qarşı çıxışlar edən, müəyyən qərarların qəbul olunmasına çalışan ermənipərəst lobbiçilərə Azər­baycan Prezidentinin köməkçisi, Prezi­dent Administrasiyasının xarici siyasət məsələləri şöbəsinin müdiri Hikmət Hacıyev vaxtında tutarlı cavab verib. O, Senatın Azərbaycana hərbi yardımını məhdudlaşdırmaq cəhdlərinin, əslin­də, ermənilərə lobbiçilik edən, ABŞ-ın dövlət maraqlarını deyil, korporativ ma­raqlarını güdən konqres nümayəndələri tərəfindən təşkil edildiyini bildirib. Pre­zidentin köməkçisi bu kimi hərəkətlərin Vaşinqton və onun müttəfiqlərinin böl­gədə davamlı sülhü təmin etmək səylə­rinə zərər gətirə biləcəyini deyib.

Rasim MUSABƏYOV, 
Milli Məclisin deputatı, politoloq

Ermənilərə siyasi maraqlarına görə xidmət edənlər də tapıla­caq. Artıq hiss olunur ki, həmin muzdlu lobbiçilərdən daha çox özünün siyasi karyerasından bərk narahat olan Fransa prezi­denti Emmanuel Makrondur. O, həm Avropa Şurası Parlament Assambleyasında, eləcə də İs­paniya, Niderland, Avstriya kimi əlinin çatdığı ölkələrdə Azərbay­cana qarşı hansısa qətnamələrin qəbul olunmasına çalışır. Yəni, Bakını qınayan, nədəsə pisləyən qərarların verilməsi üçün uğur­suz cəhdlər edir. Onlar Azərbay­cana qarşı hansısa sanksiyala­rın tətbiq olunacağı xəyalları ilə yaşayırlar. İndi də Kanada belə bir təşşəbüslə çıxış etməyə ha­zırlaşır. Hamısı boş cəhdlərdir. Birincisi, bizim o ölkələrdən heç bir asılılığımız yoxdur. Yəni, heç kəsin əlinə baxan dövlət deyilik. Azərbaycanın nefti və qazı üçün növbədə duranlar var. Buna möhtac qalmış xeyli ölkənin adı­nı çəkə bilərik. Həm də bu sə­bəbdən ermənipərəst qüvvələrin səylərinin heç bir nəticəsi olma­yacaq.

Əgər onlar Azərbaycana psixoloji təsir göstərmək, infor­masiya savaşını davam etdirmək istəyirlərsə, bizim səbrimiz bö­yükdür. Son otuz ildə o insanla­rın hər sifətini görmüşük, bütün təxribatlarını dəf etmişik. İndi də Azərbaycana təzyiq məsələsində acizlikliklərini görəcəklər. 

Tofiq ABBASOV, 
siyasi şərhçi

Adətən, görmüşük ki, sağ­lam və normal işlərə şəffaf ruhda olan insanlar, qruplar, qüvvələr qatılırlar. Belələri hə­mişə səmimi niyyətlə təşəb­büslər irəli sürürlər. Ermənilər separatizm, terrorizm, bəşəriy­yətə zidd fəaliyyəti isə sağlam dəstəkdən məhrumdur. Onlar bu dəstəyi xaricdə özləri kimi fırıldaqçıların, siyasi dələduz­ların, qeyri-qanuni işlərə qur­şanmış şübhəli personaların timsalında tapırlar. Belələrinin xidmətindən yararlanmağa ça­lışan hayların bu çürük dəstəyi qırılmaqdadır. 

Vaxtilə Fransanın və Azər­baycanın bir çox şəhər, qəsə­bələri qardaşlaşmışdı. Məhz erməni lobbisinin mənfi təsir­ləri nəticəsində rəsmi Paris hə­min əlaqələri qırdı. Daha sonra gördük ki, Qarabağa ayaq aç­mış erməni əsilli separatçılar oradakı, guya, erməni yaşayış məntəqələri ilə Fransanın mü­vafiq əraziləri ilə qardaşlaşma­sını “təşkil etdilər”. Bəs sonra nə oldu? Fransanın öz femidası o əlaqələrin legitimliyini şübhə altına aldı və həmin əməkdaş­lığın dayandırılmasına qərar verdi.

Ermənilərin Fransadakı dəstəkçiləri artıq düz yerdə büdrəməyə, çapalamağa baş­layıblar. Bu, ondan xəbər verir ki, tarixin “kölgə zolağında” olanlar qanunsuz işlərini qanu­ni məcraya salmağa çalışırlar. Daha alınmır. Atalar demişkən, yalan ayaq tutar, amma çox ye­riyə bilməz. Ermənilərə xaricdə “züy tutanların” ifşası Azərbay­canın növbəti qələbəsi demək­dir. 

İ.HƏSƏNQALA
XQ