Humanitar yardımdan imtina etmək separatçılar üçün məğlubiyyət deməkdir
Əvvəlcə dünən Ağdam-Xankəndi yolunda və oradan kənarda baş verən hadisələrin xronikasına nəzər yetirək. Bakının humanitar yardımı barədə informasiya yayılandan sonra bir qrup erməni təxribatçı yük maşınlarının qarşısını kəsmək məqsədilə Ağdam-Xankəndi yolundakı Rusiya sülhməramlılarının postunun qarşısına gəlib. Az sonra separatçıların “silahlı dəstələri” də ərazidə görünüb. Separatçılar sülhməramlılara qarşı fiziki təzyiqə əl atıblar. Yayılan video-görüntülərdə təxribatçıların sülhməramlıların avtomobilinə hücum çəkdiyi, rusiyalı hərbçiləri təhqir etdiyi aydın görünür. Sülhməramlılar yalnız avtomobili ərazidən uzaqlaşdırmaqla təxribatçılardan canlarını qurtara biliblər.
Cavabını gözləyən suallar
“Ağdam-Xankəndi yolu açılandan sonra Laçın yolu da 24 saat ərzində açılacaq”. Bu sözləri Azərbaycan Prezidentinin köməkçisi Hikmət Hacıyev BBC-yə müsahibəsində açıqlayıb. “Yollar nə qədər çox olsa, hamı üçün bir o qədər yaxşıdır”, – deyən Prezidentin köməkçisinin sözlərinə görə, Qarabağdan olan ermənilərə Azərbaycanın digər vətəndaşları kimi dil, mədəni, dini, o cümlədən bələdiyyə hüquqları təklif olunur.
İndi sual olunur: Ağdam-Xankəndi yoluna toplaşıb Bakının göndərdiyi humanitar yardıma etirazlarını bildirənlər Qarabağın erməni əhalisinin rəyini, mövqeyini ifadə edirlərmi? Həmin hay dəstəsinin separatçılardan ibarət olduğunu erməni mənbələrinin özləri təsdiqlədi. Onlar Ruben Vardanyanın yaratdığı qondarma “Qarabağ təhlükəsizlik və inkişaf cəbhəsi”nin üzvləri imiş. Təxribatçılara təşkilatın “rəhbəri” Arşak Abramyan başçılıq edir. Əslində, separatçı hayların bu “yolkəsənliyi” bir daha onu sübut edir ki, “Qarabağda humanitar fəlakət yaşanır” iddiaları siyasi avantüradan başqa bir şey deyil. Əgər, doğrudan da, “humanitar fəlakət” yaşanırsa, Bakının göndərdiyi yardımı niyə qəbul etməsinlər. Yoxsa, öyrədilmiş erməni qadının dili ilə “mən Türkün göndərdiyi undan bişirilən çörəyi yeyə bilmərəm” tərzində komik və istehza doğuran reaksiya quraşdırmazdılar. Deməli, bunların “aclıq” kartı ilə manipulyasiya etdikləri şübhəsizdir. Bu, Ağdam-Xankəndi yolundan istifadəyə məqsədyönlü şəkildə Ermənistan və onun Azərbaycanın Qarabağ bölgəsində yaratdığı və dəstəklədiyi qondarma rejim tərəfindən süni əngəllər yaradıldığını bir daha sübuta yetirir. Məsələyə bu prizmadan yanaşanda əminliklə deyə bilərik ki, rəsmi Bakı Ağdam-Xankəndi yoluna humanitar yardım karvanını çıxarmaqla həm İrəvan iqtidarını, həm də Qarabağdakı separatçıları ciddi dilemma qarşısında qoydu. Yəni “aclıqdan əziyyət çəkən” ermənilərin bu yükü qəbul etməmələri məntiqsizlikdir. Onların vəziyyətində undan imtina özünəqəsdə bərabərdir. Amma humanitar yükün qəbul edilməsi də Qarabağ erməniləri ilə revanşistlər arasında daxili münaqişənin alovlanması demək olar. Bəli, Bakı diplomatik müstəvidə özünün “Şah!” gedişi ilə separatçı yığnağını qaçılmaz məğlubiyyətlə üz-üzə qoyub.
...Keyfiyyət sertifikatı da üstündə
Azərbaycan Qızıl Aypara Cəmiyyətinin əməkdaşları, könüllülər ötən gün ərazidə qurulan çadırlarda gecələyib və istirahət ediblər. Onların əsas məqsədi Qarabağda yaşayan erməni əsilli vətəndaşlara humanitar yardımı çatdırmaqdır. Bunun üçün içərisində 40 ton un məmulatı olan iki yük maşını Ağdam–Xankəndi yolunun üzərində dayanıb.
Bu arada bir qrup xarici jurnalist humanitar yardım karvanının dayandığı Ağdam–Xankəndi yoluna gəliblər. Onlara Azərbaycan Qızıl Aypara Cəmiyyətinin nümayəndələri məlumat veriblər. “Bloomberg”, “BBC”, “Gettyimage” kimi aparıcı media orqanlarının ölkəmizdəki nümayəndəliklərinin əməkdaşları ərazidə vəziyyətlə tanış olublar.
Oxuculara xatırladaq ki, humanitar yardımın Xankəndiyə çatdırılması ilə bağlı cəmiyyətin əməkdaşları Qarabağda müvəqqəti yerləşdirilmiş Rusiya sülhmərmalıları ilə danışıqlar aparıblar. Daha sonra humanitar yükün keyfiyyət sertifikatı Azərbaycan və rus dillərində sülhməramlı kontingentin həkiminə təqdim edilib. Bu barədə Azərbaycan Qızıl Aypara Cəmiyyətinin baş katibi Ceyhun Mirzəyev məlumat verib. O, əlavə olaraq bunları bildirib: “Bizim əlaqə vasitələrimiz onlarda var. Gün ərzində ola bilsin ki, bizə cavab verilsin”. Fəqət günün sonuna qədər sülhməramlılardan hər hansı cavab alınmayıb.
Erməni mediasının yazdığına görə, Qarabağdakı separatçı rejimin oyuncaq “parlamenti”nin “sədri” David İşxanyan dünən keçirdiyi mətbuat konfransında deyib ki, Rusiya sülhməramlılarının Azərbaycanın yük maşınlarının Qarabağ (?) ərazisinə daxil olmasına imkan yaratmaq təklifi heç bir nəticə verməyib: “Rusiya sülhməramlılarının yeni komandiri Qarabağa bu yaxınlarda gəlib və daxili vəziyyətlə tam tanış olmayıb. Burada bəzi epizodlar, elementlər var ki, bunları Rusiya tərəfi daha yaxşı bilməlidir. Amma sülhməramlıların müvafiq kontingenti bizim yanaşmamızı, Azərbaycan tərəfinin mövqeyini çox gözəl bilir”.
İşxanyanın bu açıqlamasının özü Qarabağ ermənilərinin “acından ölürük” hay-küyünün siyasi şou olduğunu aydın şəkildə göstərir.
“Dqr”-nın oyuncaq “parlamentində” təmsil olunan “Vahid Vətən” adlı “partiyasının” “lideri” Samvel Babayan isə bildirib ki, onların mövqeyi problemin paket həlli çərçivəsində, yəni yüklərin eyni vaxtda Laçın yolu və Ağdam–Xankəndi marşrutu vasitəsilə Qarabağa gətirilməsini nəzərdə tutur. Babayanın fikrincə, razılaşma paketində qondarma “Artsax”ın statusu (?) məsələsi də öz əksini tapmalıdır: “Yəni yüklərin hara getdiyi aydın olmalıdır”.
Jurnalistin Azərbaycan tərəfinin bununla razı olub-olmayacağı sualına isə Babayan erməni həyasızlığını işə salaraq belə cavab verib: “Düşünürəm ki, bəli, razılaşacaqlar”.
Madam merin “Qarabağ yürüşü”nə STOP!
Parisin, Marselin və Strasburqun merlərinin müşayiət etdikləri “humanitar yüklü” fransız karvanı Laçın yoluna çatıb. Verilən məlumatlara görə, karvana Fransa paytaxtının meri madam Ann İdalqo başçılıq edir. Fikrimizcə, bu “humanitar jesti” ermənipərəst İdalqonun dövlətlər-arası münasibətlərə müdaxilə aktı kimi dəyərləndirmək daha doğru olardı. Hələ biz onu demirik ki, cinsindən asılı olmayaraq erməni daşnaklara “züy tutan” birisi qosqoca Parisin meri olmağa layiq deyil. Bu “xeyriyyə aksiyası” ilə İrəvandakı revanşist iqtidara, Xankəndidəki separatçılara açıq-aşkar dəstək verən Fransa Ermənistan–Azərbaycan sərhədinə qədər gəlib çıxıb. Onlar, guya, Xankəndidə “acından qırılanlara” humanitar yardım çatdırmağa çalışırlar. Onda madam və müsyölərdən soruşmaq lazımdır ki, əgər məramın, niyyətin səmimidirsə, nə üçün bu barədə əvvəlcədən Azərbaycan tərəfinə rəsmi müraciət etməmisiniz? Axı bunu sizdən Bakı deyil, ilk növbədə beynəlxalq qanunlar, diplomatik qaydalar tələb edir.
Gözlənilən məlumat ermənilərin Teleqram kanalları vasitəsilə yayımlandı. Fransanın üç böyük şəhərindən və əyalətlərdən Qarabağdakı ermənilər üçün göndərilən “humanitar yardım karvanı” dünən Ermənistan və Azərbaycan arasındakı şərti sərhəddə saxlanılıb. “Humanitar yardım”dan ibarət 10 “tır”-ı Azərbaycan sərhədçiləri Həkəri postundan ölkəmizin suveren ərazisinə buraxmamaq barədə qərar qəbul ediblər.
Beləliklə, Fransanın adı çəkilən şəhərlərindən toplandığı iddia edilən və Paris meri Ann İdalqonun müşayiət etdiyi deyilən “humanitar yardım” maşınları bundan əvvəl Ermənistan hökumətinin göndərdiyi və bir aydan çoxdur Laçın yolunun o tərəfində gözləyən 21 “tır”-ın yanında “lövbər salıb”. Ermənilər “karvanların” dayandığı həmin ərazidə “humanitar yardım mərkəzi” yaradaraq, yükləri qəbul edəcəklərini elan ediblər. Deyəsən, yük dolu bir avtomaşının günlük saxlanma xərcini çəkmək asan olmadığından indi bu xarakterli feyk-xəbərləri yaymağa başlayıblar. Amma belə görünür ki, Hayastan bu “humanitar böhran”, “karvan- şou”sunu bundan sonra da davam etdirmək niyyətindədir.
Bölgədən verilən məlumata əsasən, fransızların “humanitar yardım” “tır“-ları Gorus istiqamətində hərəkətə başlayıb.
Kənar aktorlara ötürülən siqnal
Ermənistan hakimiyyətinin sülh danışıqlarının vaxtını uzatmaq və ya Azərbaycanla razılaşmadan boyun qaçırmaq istiqamətində qurduğu çeşidli ssenarilərin hamısı ortalıqdadır. İrəvanın sülhdənqaçma siyasətinə kənar qüvvələrin dəstəyinə bəslədiyi ümidləri də zəifləmək üzrədir. Hazırda siyasi dalana dirənmiş İrəvan-Xankəndi daşnak-revanşist-separatçı tandeminin Bakının şərtlərini qəbul etməkdən başqa çıxış yolunun qalmadığını özləri də etiraf etmək mərhələsinə çatıblar.
Cənubi Qafqaz Tədqiqatlar Mərkəzinin rəhbəri Fərhad Məmmədov hesab edir ki, Qarabağ ermənilərinə Bakıdan ərzaq göndərilməsi o deməkdir ki, birincisi, Ağdam yolu işlək vəziyyətdədir və buradan Xankəndiyə daha tez çatmaq mümkündür: “İkincisi, bu, Qarabağda “humanitar böhrandan” narahat olan ölkələrə ötürülən siqnaldır. Yəni Laçın yolundan yan keçməklə də erməni sakinlərə kömək etmək olar. Sadəcə, bu kömək Azərbaycan Respublikasının qanunları və normaları çərçivəsində edilməlidir. Bu isə Xankəndiyə aparan yeganə marşrut kimi Laçın yolunu siyasiləşdirmək cəhdlərinə Bakının tutarlı zərbəsi və “aclıq” mifinin miqyasını şişirtmə piar-kampaniyasının təşkilatçılarına çağırışdır”.
F.Məmmədov onu da qeyd etdi ki, Qızıl Aypara Cəmiyyətinin ərzaq yükü Qarabağ ermənilərinə Azərbaycan cəmiyyətinə tezliklə reinteqrasiya olunmaları üçün konkret mesajdir: “Onlar gələcəklərinin Azərbaycandan asılı olduğuna inanmalıdırlar. Bu qaçılmaz reallığı qəbul etməli və onları düşdükləri vəziyyətə separat-xunta rejiminin və Ermənistan hakimiyyətinin saldığını anlamalıdırlar. İndi onlar həyatlarının ən vacib seçimini etməlidirlər”
Azərbaycan 44 günlük müharibədən sonra Qarabağda qalan problemlərin həlli üzrə praktiki siyasətini davam etdirir, bu istiqamətdə konkret addımlar atır.
Rusiyalı politoloq, “Vestnik Kavkaza” informasiya agentliyinin baş direktorunun müavini Andrey Petrovun qeyd etdiyi kimi, Azərbaycan tərəfindən Ağdam-Xankəndi yolunun inşası separatçıların planlarının dağılması demək idi: “Bu, birinci addım oldu. İkinci addım Bakının Xankəndi istiqamətinə ərzaq yardımı göndərməsidir. Əgər İrəvanda və Xankəndidə deyirlərsə ki, Qarabağda aclıq, ərzaq qıtlığı var, erməni sakinlər yeməyə heç nə tapmırlar, bu halda yükü qəbul edilməlidir. Buna görə onlar Azərbaycana minnətdar olmalıdırlar. Bu, baş verərsə, Cənubi Qafqazda sülh prosesinin davamında maraqlı olan xarici aktorlar da rahat nəfəs alacaqlar. Çünki yaranmış vəziyyət de-fakto Qarabağ erməniləri və Bakı arasında dialoqun başlanması demək olacaq. Həm də bu dialoq heç kəsin müdaxiləsi olmadan, vasitəçilərsiz, Azərbaycan ərazisində baş tutmalıdır”.
Hazırda bölgədə cərəyan edən hadisələrə bir qədər fərqli prizmadan yanaşan Milli Məclisin deputatı, politoloq Rasim Musabəyovun fikrincə, böyük hesabla indi Xankəndidəki ermənilərə hansısa ərzaq yardımı göstərmək üçün Bakının əlində aşkar səbəb yoxdur və bu, istisnasız olaraq, xoşməramlı bir jestdir: “Məgər orada təbii fəlakət baş verib? Zəlzələ, yaxud subasması olub? Yoxsa Qarabağda müharibə gedir? Ermənilər özləri özlərini blokadaya salıblar. Ağdam və Əsgəran arasındakı yolu nə azərbaycanlılar bağlayıb, nə də ki rusiyalı sülhməramlılar. O yolu Qarabağ erməniləri bağlayıblar. Bütün bu oyunu konkret olaraq Ruben Vardanyan təşkil edib. Onu, ümumiyyətlə, Azərbaycan ərazisindən çoxdan qovmaq lazım idi. Ərzaq yardımının göndərilməsi faktına baxsaq, bu, ilk növbədə, Qarabağ erməniləri üçün test deməkdir. Həm də BMT TŞ-da yenidən Azərbaycana qarşı təxribatçı təbliğatı, ermənilərin üzləşdiyi “humanitar böhranı” şişirtməyə çalışanlar üçün testdir. Hesab edirəm ki, bütün bunları Qarabağ erməniləri üçün sonsuz ərzaq yardımlarına çevirməyə dəyməz. Yalnız ona görə ki, onlar həmin ərzağı Azərbaycan ərazisində, bizim mağazalardan almaq istəmirlər?”.
Qızıl Aypara Cəmiyyətinin prezidenti Novruz Aslan jurnalistlərə açıqlamasında bildirib ki, onlardan nə üçün gecikdiklərini soruşa bilərlər: “Biz problemi müəyyən etməliyik. Hesab etmirəm ki, Qarabağda ermənilərin yaşadığı yerlərdə fəlakət var.Bu, subyektiv mövqeyimdir. Amma tərəfdaşlarımızın müəyyən rəyləri var. Onlara əsasən, sülh məramımızı göstərmək üçün həmin insanlara yardım etmək qərarına gəlmişik”.
Artıq oyunun həlledici mərhələsi yaxınlaşıb. Uğursuz gedişlərdən sonra “Şah!”-la üzləşən cığal rəqibin “Mat!” olmaqdan savayı çıxış yolu qalmayıb. Amma bir faktı da unutmamalıyıq ki, söhbət lövhə arxasında təmizliyinə və səmimiyyətinə etimadımızın xeyli zəiflədiyi oyunçudan gedir.
P.S. Rusiyanın Xarici işlər naziri Sergey Lavrov və türkiyəli həmkarı Hakan Fidanın bu gün Moskvada Cənubi Qafqaz və Ukraynadakı vəziyyəti müzakirə edəcəkləri gözlənilir.
İmran BƏDİRXANLI, “Xalq qəzeti”