Üzdə özünü müttəfiq, tərəfdaş, ədalət carçısı kimi göstərənlərin
arxada Ermənistana tərəfkeşlik etməsi aşkar sezilir
Hələ BMT Təhlükəsizlik Şurasının növbədənkənar toplantısında məlum müzakirəyə qədər maraqlı hadisələr baş verdi. Onlardan biri barədə dünən “armenpres” xəbər vermişdi. Saytın hayları muştuluqlayan “şad xəbəri” ondan ibarət idi ki, TŞ-də müzakirələrə bir gün qalmış ermənipərəst senatorlar Robert Menendes və Aleks Padilya ABŞ-ın BMT-dəki səfiri və TŞ-dakı debatlara sədrlik edəcək Linda Tomas-Qrinfildi “kəskin mövqe” ortaya qoymağa, Azərbaycan hakimiyyətinə təzyiq göstərməyə çağırıblar.
Bundan başqa, BMT-nin Nyu-Yorkdakı mənzil-qərargahının önündə ABŞ-dakı erməni diasporunun təşkil etdiyi aksiyada haylar yalan və böhtanla dolu şüarlar səsləndirib, hətta “Qarabağda acından ölən adamın şəkli” yazılmış foto-plakat qaldırıblar. Azərbaycanın Qarabağ iqtisadi rayonunda yaşayan ermənilərdən bugünədək heç birinin acından ölmədiyi məlum faktdır. Onlar nəinki aclıqdan əziyyət çəkirlər, tamamilə əksinə, Xankəndidə, Ağdərədə hər gün toy-düyün mərasimlərini keçirir, ziyafətlər təşkil edirlər. Bu kef məclislərinin birində içib keflənəndən sonra Laçın yoluna yürüş etmək xəyalına düşənlərin olduğu da danılmaz faktlardandır. İstər Avropada, istərsə də ABŞ-da erməni separatçı-daşnak-lobbist dairələrin təşkilatçılığı ilə keçirilən “etiraz aksiyalarının” birbaşa Vaşinqtona, daha doğrusu, onun Nyu-Yorkdakı nümayəndəsinə ötürülən şifrəli mesajlardan başqa bir şey deyil.
Əvvəlcədən planlaşdırılan “blokada”, “humanitar böhran”, “tır-şou” treklərindən ibarət popurri tamaşa-məzhəkəyə dirijorluq etmək üçün Ermənistan XİN başçısı Ararat Mirzoyan Nyu Yorka gedib.
* * *
Ermənistanın BMT-dəki daimi nümayəndəsi Mqer Marqaryanın gözlənilən çıxışında Qarabağdakı ermənilərin “total blokada” şəraitində yaşamasından, Azərbaycanın Laçın dəhlizini (?) 15 iyunda bağlamasından, bununla da Qarabağ ermənilərinin Ermənistana və dünyaya çıxışını kəsməsindən danışacağı şəksizdir. Marqaryanın daha sonra TŞ-nın daimi və qeyri-daimi üzvlərinin diqqətinə bütün bunların nəticəsində bölgədə humanitar vəziyyətin ağırlaşdığını və yerli əhalinin gündəlik tələbat malları, dərman və yanacaq qıtlığından əziyyət çəkdiyini, hətta bir nəfərin acından öldüyünü qeyd edəcəyi şübhəsizdir. Onun beynəlxalq təşkilatları, dünya birliyini “Dağlıq Qarabağı humanitar təcriddən qurtarmaq üçün Azərbaycana təsir göstərməyə, Laçın dəhlizindəki sərhəd məntəqəsini aradan qaldırmağa məcbur etməyə, Artsax xalqını (?) məhvolma təhlükəsindən qurtarmağa” çağıracağı da gözlənilən hay vay-şivənidir.
Aydın məsələdir ki, rəsmi İrəvanın elçisinə cavab nitqində Azərbaycanın BMT yanında daimi nümayəndəsi Yaşar Əliyev Ermənistanın bölgədəki mövcud vəziyyətə dair BMT Təhlükəsizlik Şurasına müraciətini yalan və dezinformasiya xarakterli manipulyasiya siyasətinin davamı kimi qiymətləndirəcək. Səfirimiz çıxışında Ermənistanı bölgədə vəziyyəti gərginləşdirən təxribatçı addımlardan və bəyanatlardan, ölkəmizin daxili işlərinə müdaxilədən çəkinməyə, beynəlxalq ictimaiyyəti çaşdırmaq cəhdlərini davam etdirmək əvəzinə üzərinə götürdüyü öhdəlikləri yerinə yetirməyə çağıracaq.
BMT TŞ-nın Ermənistanın “Qarabağdakı vəziyyətlə bağlı” tələbilə çağırılan növbədənkənar iclasında qurumun 5 daimi üzvü – ABŞ, Rusiya, Çin, Fransa və Böyük Britaniya ilə yanaşı, 10 qeyri-daimi üzvü – Albaniya, Braziliya, Qabon, Qana, Birləşmiş Ərəb Əmirlikləri, Niger, Norveç, Sent-Vinsent və Qrenada, Tunis və Estoniya da iştirak edirlər.
Oxucularımızın nəzərinə çatdıraq ki, adları çəkilən ölkələrdən Qabon, Qana, BƏƏ, Niger, Sent-Vinsent, Qrenada və Tunis, eyni zamanda, Qoşulmayanlar Hərəkatının üzvləridir. Yəni, bu ölkələrin Azərbaycanın yanında yer alacağına şübhə yoxdur.
* * *
Yeri gəlmişkən, Nyu-Yorkda müzakirələrin başlanmasına bir neçə saat qalmış Ermənistan silahlı qüvvələrinin kəşfiyyat-diversiya qrupu terror-təxribat əməliyyatları həyata keçirmək məqsədilə Azərbaycan ərazisinə sızmağa cəhd göstərib. Bununla bağlı Azərbaycan Müdafiə Nazirliyinin məlumatında deyilir: “Avqustun 16-da saat 11:15 radələrində Ermənistan silahlı qüvvələrinin kəşfiyyat-diversiya qrupu terror-təxribat əməliyyatları həyata keçirmək məqsədilə Ordumuzun Kəlbəcər rayonu İstisu yaşayış məntəqəsi istiqamətində yerləşən döyüş mövqelərinin arasındakı boşluqlardan istifadə edərək Azərbaycan ərazisinə sızmağa cəhd edib. Ermənistanın bu növbəti təxribatının qarşısı alınıb və diversiya qrupunun bir üzvü saxlanılıb”.
Ermənistan Müdafiə Nazirliyi isə Q.B. adlı əsgərin döyüş mövqeyini “özbaşına olaraq” tərk etdiyi haqda məlumat tirajlayıb. Guya hazırda onun axtarışlarını həyata keçirirlər.
Azərbaycan XİN İrəvana ünvanladığı növbəti bəyanatında Ermənistanı bölgədə vəziyyəti gərginləşdirən təxribatçı addımlardan çəkinməyə çağırıb.
İmran BƏDİRXANLI, “Xalq qəzeti”