ABŞ, Rusiya və Avropa İttifaqı riyakarlığı, yoxsa səmimiyyəti seçir?
Hazırda tam qətiyyətlə demək mümkündür ki, Ermənistan rəhbərliyi, xüsusən də, xaricdəki ermənipərəst dairələr var gücləri ilə dünya ictimaiyyəti rəyinin Azərbaycan əleyhinə çevrilməsinə, bununla da beynəlxalq hüquq prinsiplərinin arxa plana keçməsinə, Qarabağın müstəqil quruluş kimi düşüncələrdə möhkəmlənməsinə çalışırlar. Bu, ikili standartlardan çıxış edən dünyanın köhnəki “metod”udur – əvvəlcə rəy yaratmaq, sonra qanunların həmin rəyə uğunlaşdırılmasına çalışmaq. Elə bu səbəbdəndir ki, beynəlxalq aləmdə qanunlar və hüquq normaları əxlaqın, indiki halda siyasi əxlaqın dalınca sürünməkdədirlər.
Əslində, BMT Təhlükəsizlik Şurasında dünən Qarabağdakı humanitar vəziyyətə dair keçirilmiş müzakirə təşəbbüsü də qeyd etdiyimiz “metodun” leqallıq qazanmasına hesablanmışdı. Əsas o götürülmüşdü ki, Azərbaycana təzyiq göstərilsin və ölkəmiz mövqeyindən geri çəkilsin. Bəs, diqqətə çatdırdığımız “prosesdə” iştirak edən kimlərdir?
Ermənistan rəhbərliyi və xaricdəki ermənipərəst qüvvələrlə bağlı hər şey aydındır. Bu sıraya ənənəvi anti-Azərbaycan mövqeyi ilə seçilənləri də aid etmək mümkündür. Vasitəçi kimi üzərinə öhdəlik götürmüş tərəflər necə? Onların mövcud dolaşıq labirintdəki mövqeyi nədən ibarətdir? Nəhayət, onlar deyə bilirlərmi ki, BMT-də belə bir mənasız təşəbbüsü müzakirə etmək yersizdir. Bildirirlərmi ki, kənar meyillər vasitəçilik missiyalarına xələl gətirir? Xeyr, bildirmirlər.
Azərbaycan–Ermənistan münasibətlərinin tənzimlənməsinə, sülhün əldə edilməsinə ABŞ-dakı, Rusiyadakı və ya Avropadakı ədalətsizliyə həssas yanaşırıq. Yəni, məsələn, düşünmək istəmirik ki, Rusiyada kimsə ermənipərəst mövqe tutub əsl reallıqları təhrif edirsə, bu, həmin adamın öz işidir, dövlətin məsələyə qarışacağı yoxdur. Qısaca desək, hər kəsin sərbəst fikir bildirmək azadlığının indiki halda keçərsizliyi qənaətindəyik. Eyni yanaşmanı ABŞ-a və Avropa İttifaqına aid etməkdə də haqlıyıq.
Birincisi, ona görə ki, qəbuledilməz, Cənubi Qafqazda sülh ritorikasına zidd fikirlərə vurğuladığımız qütblərdən reaksiyalar ya gəlmir, ya da çox zəifdir. Onlar həmişə susurlar. Susqunluq isə razılıq əlaməti kimi qəbul edilir. Ən əsası isə susqunluq erməni illüziyalarına qol-qanad verir. İkincisi, biz onu da görürük ki, kimlərinsə ortaya atdığı məsuliyyətsiz ritorikanın danışıqlar prosesinə daxil edilməsi yönümlü səylər var. Yəni, Bakı – İrəvan münasibətlərinin axarına əks hansısa fikir əvvəl ortaya atılır, sanki buna reaksiyalar öyrənilir, eyni zamanda, həmin fikir ictimai rəyə sırınır, ardınca aram-aram onun əsas müzakirə masasına çıxarılmasına cəhd göstərilir. BMT-də dünən keçirilmiş müzakirənin də məqsədi elə bu idi.
***
Məsələyə qeyd etdiyimiz prizmadan yanaşaraq, ilk növbədə Rusiyanın üzərində dayanaq. Ölkənin ictimai rəyinin böyük əksəriyyətinin ermənipərəst olduğu məlumdur. Yəni, bu kəsim üçün Qarabağı ayrıca erməni cəmiyyəti olaraq təqdim etmək su içimi kimi bir şeydir. Əlbəttə, belə bir yanaşmaya rəsmi Moskvanın da zaman-zaman, xüsusən İkinci Qarabağ müharibəsindən sonra ortaya qoyduğu mövqe təsir göstərməkdədir.
Ümumən, Rusiyanın ictimai rəyinin dövlətin mövqeyindən uzaqlığını demək mümkünsüzdür. Ola bilər, ölkədə hansısa ekspertin, deputatın və kiminsə indiki məqamda söylədiyi hazırda rəsmi Moskvanın prioritetində deyil. Amma bu, bir siqnaldır. Nə zamansa Kreml onun üzərinə gələcək…
Rusiyanın siyasi industriyasındakı vəziyyətə nəzər salaq. Söhbət BMT-nin Təhküləsizlik Şurasının Qarabağda humanitar vəziyyətə dair müzakirəsindən əvvəlki durumdan gedir. Bu platformada ermənipərəst ritorikanın incəliklərinə diqqət yetirəndə gördük ki, ölkənin ictimai rəyi mövzu ilə bağlı sakitdir. Buna gözləmə mövqeyi demək daha məqbuldur. Axı rəsmi Moskvanın özü də gözləyir. Gözləyir ki, xaricdəki ermənipərəstlər öz “işlərini” görsünlər. Onsuz da Azərbaycana qarşı böyük dalğa var. İndi sakit qalmaq və Bakı ilə münasibətləri korlamamaq daha məqbuldur.
Digər tərəfdən, ermənipərəstlərin hay-küyü – Qarabağın müstəqil quruluş, oranın əhalisinin xüsusi imtiyazlı qrup kimi təqdimatları bəhrəsini versə, Rusiya həmin bəhrədən faydalanmağa girişəcək. Ölkə yaxşı bilir ki, Qarabağ, Azərbaycan–Ermənistan münasibətləri müstəvisində ermənipərəst ritorikanın güclənməsi yekun nəticədə onun xeyrinədir. Münaqişəli durum həllini tapmamış qalacaq, vaxt uzanacaq və sair.
***
Keçək ABŞ-a. Diqqət yetirək, nə vaxt ki, Azərbaycan – Ermənistan münasibət tənzimləməsinin Rusiyanın inhisarından çıxarılması məsələsi aktual idi, Birləşmiş Ştatlar Administrasiyası aktiv görünürdü. Dövlət Departamentinin elə bir rəsmisi qalmamışdı ki, bəyanat verməsin. Bəs, indi niyə susublar? Nəzərə alaq ki, hazırda BMT Təhlükəsizlik Şurasına sədrliyi edən ABŞ-dır. Vaşinqton Azərbaycan –Ermənistan münasibətlərində vasitəçidirsə, üstəlik o vasitəçilikdə ölkəmizin ərazi bütövlüyünün Ermənistan tərəfindən tanınması, ən əsası isə sülh müqaviləsinin imzalanması aktual əhəmiyyət daşıyırsa, bəs, BMT-dəki bu erməni oyunbazlığı nə üçündür?
Vaşinqtonda bu oyunbazlığın onun vasitəçilik missiyasına zidd anlam daşıdığını bilmirlərmi? Çox yaxşı bilir və dərk edirlər, sadəcə susurlar. Ağ ev Administrasiyasının susqunluğu təxminən bu deməkdir: Azərbaycan özü mübarizə aparsın, qalib gəlsin, sonra biz danışıqlar prosesinə vasitəçilik edərik. Sual olunur: Bakı özü mübarizə aparacaqdısa, bəs siz nə üçünsünüz? 44 günlük müharibə də prinsip etibarilə eyni mahiyyətə söykənmişdi. Azərbaycan öz torpaqlarını işğaldan qurtardı, yəni işin ağırlığının öhdəsindən gəldi, sonra vasitəçilik missiyası işə salındı…
Ancaq ictimai rəyə təsir, beynəlxalq hüququn ermənipərəst ritorikaya qurban verilməsindən danışırıqsa, Birləşmiş Ştatlardakı çərənçi ekspert, senator, konqresmen kəsim də kifayət qədər aktivdir. Biz onların da “müstəqil fikirlərinə” münasibətdə Ağ evin susqunluğunu görürük. Bəli, nəzərə alırıq ki, Rusiyadan fərqli olaraq, ABŞ-da ictimai rəyə təsir instrumentlərinin idarə olunması mürəkkəbdir.
Məsələn, BMT-də dünənki müzakirədən əvvəl Senatın Xarici Əlaqələr Komitəsinin sədri Robert Menendez və Kaliforniya senatoru Aleks Padilla ölkənin qurumdakı səfiri Linda Tomas-Qrinfildə Qarabağın blokadasının dərhal aradan qaldırılması tələbi ilə qətnamənin Təhlükəsizlik Şurasına təqdim edilməsi xahişi ilə məktub göndəriblər. Yəni, onlara başa salına bilməz ki, sizin bu məktubunuz ABŞ-ın sülh vasitəçiliyi missiyasına ziddir. Hələ beynəlxalq hüququ bir kənara qoyuruq.
Rusiyada isə bu mənada idarəolunan mexanizm var. Rəsmi Moskva, əgər ona lazımdırsa, belə “təşəbbüsləri” özü təşkil edir, Birləşmiş Ştatlar isə durumu sərbəst buraxır və vəziyyəti formalaşdıranların qoyduqları ağırlığa adekvat mövqe seçir. Əlbəttə, eyni zamanda, indiki halda Azərbaycan tərəfinin öz mövqeyini necə müdafiə edəcəyinə diqqət yetirərək qərar verir. Ölkəmiz qətiyyətlidirsə, menendezlər və padillalar keçir arxa plana. Yeri gəlmişkən, onlar yenə də arxa plandadırlar və bir müddət sonra ABŞ Administrasiyası heç nə olmamış kimi, özünün ənənəvi vasitəçilik xəttinə davam edəcəkdir. Halbuki olan oldu. Vaşinqton erməni avantürasının BMT-yə çıxmasına maneçilik törətmədi.
***
Avropa İttifaqı xətti. Ümumən, Avropa siyasi spektrində vəziyyətin daha mürəkkəb olduğunu söyləməliyik. “Köhnə qitə” ermənipərəstliklə sanki nəfəs alır. Burada erməni avantürası naminə beynəlxalq hüquq normalarını tapdalamağa hazır vəziyyətdə olan qatı siyasi konqlomerat mövcuddur. Diqqət yetirək, Ermənistan Azərbaycanla münasibətlər kontekstində din amilini ortaya heç də əbəs yerə atmır. İrəvan haqqında söz açdığımız kəsimin baxışlarına yaxşı bələddir. Bilir ki, onlar XII əsrin “Səlib yürüşləri” ab-havasındadırlar. Ermənistanın destruktivizmi həmin ab-havaya, bir növ, “ahəng” gətirir.
Fikir verin, hazırda Avropa İttifaqı yoxa çıxıb. Qurumun Bakı – İrəvan münasibətlərinin nizamlanmasındakı missiyasından əsər-əlamət qalmayıb. Ermənipərəstlərin yaratdıqları ədalətsizlik dünyası onu, obrazlı desək, Roma imperiyasının, Bizansın xarabalıqları arasında basdırıb. Aİ Şurasının prezidenti Şarl Mişeldə də görünmür. Yəqin evdə oturub ermənipərəstlərin və anti-Azərbaycançı qüvvələrin BMT-də qurduqları tamaşanı seyr edib. Çox güman, prosesləri izləyərək öz vasitəçiliyi üçün yeni libas toxuyub. O da sonra heç nə olmamış kimi, öz missiyasına davam edəcək…
***
Ümumiləşdirmə apararaq, bir məqamı vurğulayaq. Azərbaycan onsuz da ikili standartlara öyrəşiklidir. Bakı otuz ilə yaxın müddətdə İrəvanla münasibətlər, danışıqlar müstəvisində onun ən müxtəlif təzahür formalalarını görüb və işini buna uyğun formada quraraq, diplomatiya meydanında uğur qazanıb və qazanmaqdadır. Ölkəmiz proseslərə səbr və təmkinlə yanaşır. Düşünülə bilər ki, vasitəçi tərəflər də səbr və təmkin nümayiş etdirirlər. Ancaq, bu, lazımsızdır, ən əsası isə sərfəli deyil.
Məsələn, Azərbaycan Avropanın enerji təchizatında mühüm rola malikdir. Avropa İttifaqı ilə əməkdaşlığımızın vacib seqmentini təşkil edən də budur. Mövcud durumda qurum Fransanı əsas götürərək, erməni avantürizminə münasibətdə səssiz qalırsa və nəticə etibarilə özünün vasitəçilik missiyasının həmin avantüristlər tərəfindən təhqirinə imkan yaradırsa və üstəlik, kənar cəbhədə tərəflərdən hansınınsa qazanacağı üstünlüyə fokuslanıb vasitəçilik etmək istəyirsə, deməli, öz missiyasına münasibətdə səmimi deyil.
Eyni sözü ABŞ və Rusiya barədə də söyləmək mümkündür. Dünyanın iki super gücü xəstə erməni təfəkküründən irəli gələn məsələlərin girovundadır, oyuncağa çevrilib. Erməni xəstəliyi onlar arasındakı rəqabət mühitinə köklənib, tərəfləri ədalət hissindən yayındırırsa, şübhələrə salırsa, yeni metod və üsullar fikirləşməyə vadar edirsə, deməli, bu iki cinah da səmimiyyətdən uzaqdır.
Bəs, ümumən ortada olan səmimiyyətsizlik mühiti Azərbaycanın vasitəçi təşkilatla – Avropa İttifaqı və ölkələrlə – ABŞ və Rusiya ilə gələcək münasibətlərinə təsir göstərməyəcək? Əlbəttə, göstərəcək. Kim ki, hansı qüvvələr ki, Azərbaycanın haqq səsinin eşidilməsinə, ədalətli mövqeyinin təmin olunmasına loyallıq göstərirlərsə, əslində, beynəlxalq hüququn prinsiplərinin pozulmasına, ali dəyərlərlə manipulyasiyaya yol verilməsinə seyrçi yanaşırlarsa, onların Bakı ilə əməkdaşlığının gələcək konturlarına baxmaq şərtdir. Yəni ikili standartlar da bir yerə qədərdir. O, siyasət prizmasından çıxıb ikiüzlülüklə əvəzlənirsə, buna bəraət əsla olmamalıdır və olmayacaq da.
***
Sonda ən vacib məqama keçid alaq. Əvvəldə bir sual ünvanlamışdıq – vasitəçilər özlərinə hörmət qoyurlarmı? Sual ritorikdir. Baxın, vasitəçilər Azərbaycan-Ermənistan danışıqlar prosesini bir yerə qədər gətirirlər. Deyək ki, səy göstərirlər, əziyyət çəkirlər. Anidən Ermənistan rəhbərliyi və ermənipərəstlərin ağlına nə isə gəlir və onlar tamam başqa xülyalara düşürlər. BMT-də dünən keçirilmiş müzakirə də həmin xülyanın təzahür formasıdır. Belə çıxır ki, erməni avantürizmi hər an nə isə ortaya atıb əldə edilmiş pozitiv meyilləri sıradan çıxarmaq potensialındadır. Elə isə vasitəçilik lazımdırmı? Özlərinə hörmət qoymayanların gördükləri işə ehtiyac varmı?
Əvəz CAHANGİROĞLU, “Xalq qəzeti”