Ermənilər “satqın, xain” hesab etdikləri soydaşlarına qarşı dəfələrlə terror aktları törədiblər
Müasir dövrdə beynəlxalq miqyaslı terror aktlarını dəfələrlə dəstəkləmiş dövlətlər terrorçuluğun sponsoru olan dövlətlər hesab edilir. ABŞ Dövlət Departamentinin rəsmi mövqeyinə görə, 2023-cü ildə bu siyahıya Kuba, İran, Şimali Koreya və Suriya daxildir. Siyahıda əvvəllər İraq, Liviya, Cənubi Yəmən və Sudan da yer alıb. Bir sıra dövlətlər də var ki, onlar beynəlxalq birlik tərəfindən terrorçu və ya terrorçuluğa sponsorluq edən dövlət kimi tanınmasalar da, terror siyasətindən fəal şəkildə istifadə edirlər. Heç şübhəsiz ki, əgər həmin dövlətlərdən ibarət siyahı tərtib olunsaydı, Ermənistan Respublikası orada ilk yeri tutardı. Yazdığımız fikir Ermənistana qərəzli yanaşmağın göstəricisi deyil. Bu, bir həqiqətdir ki, Ermənistan dövlət səviyyəsində terroru dəstəkləyərək terrorçuluğu hər zaman təcavüzkarlıq siyasətinin əsas vasitələrindən birinə çevirib.
Dünyada erməni terror təşkilatlarının 160 ildən çox (ilk erməni cəmiyyəti 1860-cı ildə İstanbulda yaradılan “Xeyriyyə Cəmiyyəti” olub. Onun təşkilatçıları X.Şişmakyan və M.Beşikdaşyan “Zeytun qırğınları”nın fəal iştirakçıları olublar–S.H.) yaşı var. 1869-1870-ci illərdə İstanbulda “Kilikiya” adlı cəmiyyət təşkil edilib, 1874-cü ildə X.Kerekçyan Qarsda “Azadlıq” adlı gizli təşkilat yaradıb. 1881-ci ildə Ərzurumda “Vətən müdafiəçiləri” təşkilatı zühur edib. 1885-ci ildə Fransanın Marsel şəhərində “Armenakan” partiyası yaradılıb. 1887-ci ildə Cenevrədə Qafqazdan olan bir qrup erməni tələbə tərəfindən “Hnçak” (“Zəng”) partiyasının əsası qoyulub. Qurumun əsas məqsədi Türkiyənin Anadolu bölgəsini, rus və İran Ermənistanları adlandırdıqları əraziləri birləşdirməklə “böyük Ermənistan” dövləti yaratmaq idi. Partiyanın proqramının 4-cü bəndində göstərilir ki, qarşıya qoyulmuş məqsədə çatmaq üçün təbliğat-təşviqat, terrorizm və dağıdıcılıq metodu seçilməlidir. Partiyanın ilkin məqsədi Türkiyədə siyasi cəhətdən müstəqil olan Ermənistanın yaradılmasına nail olmaq idi. Məqsədə çatmaq üçün təbliğat, fitnəkarlıq, terrorçuluq və təşkilatlanma əsas metod seçilib.
Ancaq bu dövrdə yaradılan daha təhlükəli və qatı millətçi partiya 1890-cı ilin yayında təsis olunan Erməni İnqilabi Federasiyası – “Daşnaksütyun” olub. “Daşnaksütyun”un 1892-ci ilin iyununda Tiflisdə keçirilən ilk qurultayı ermənilərin silahlanması, təşkilatlanması, silahlı üsyan, dövlət idarələrinə basqınlar, dövlət adamlarına sui-qəsdlər yolu ilə müstəqil demokratik respublika yaradılmasını son məqsəd olaraq qərarlaşdırdı. Partiyanın rəsmi manifestində bəyan edilirdi ki, öz məqsədlərinə çatmaq üçün inqilabi qruplar yaradılacaq və üsyanlara rəvac veriləcəkdir. İnqilabçı qrupların yaradılmasını vacib sayan məqamlar rəsmi manifestdə çap olunub. Bura döyüşən dəstələrin yaradılması, xalqı silahlandırmaq üçün bütün vasitələrdən istifadə, inqilabi komitələr təşkil edilməsi və onların arasında sabit əlaqələr qurulması, dövlət müəssisələrinin talanması daxil idi. Milli erməni dövləti yaratmaq “Daşnaksütyun”un minimum, Qara və Aralıq dənizlərindən Xəzərə qədər uzanan “böyük Ermənistan” yaratmaq isə maksimum məqsədi idi. Partiya məqsədə nail olmaq yolunu terrorda görürdü.
“Daşnaksütyun” fəaliyyəti ərzində keçmiş Osmanlı imperiyası ərazisində türklərə, Rusiya imperiyası və Qacarlar dövləti ərazisində isə azərbaycanlılara qarşı çoxsaylı terror aktları, soyqırımları törədib. Daşnakların 1905-1906-cı illər qırğınlarında, 1918-ci ilin martında Bakıda baş verən soyqırımının təşkilində və həyata keçirilməsində xüsusi rolu olub. 1918-ci ilin ortalarından başlayaraq daşnak Andranik Ozanyanın başçılığı ilə Zəngəzurda azərbaycanlılara qarşı etnik təmizləmə aparılıb. 1920-ci ilin iyunundan 1922-ci ilin iyuluna qədər “Daşnaksütyun” “Nemezis” adı verilən əməliyyat həyata keçirib. Bu əməliyyat müstəqil ekspertlər tərəfindən belə silsilə terror aktları kimi qiymətləndirilib. Əməliyyat zamanı 1920-ci il iyunun 19-da Azərbaycan Xalq Cümhuriyyətinin (AXC) keçmiş Baş naziri Fətəli Xan Xoyski Tiflisdə öldürülüb. Eyni vaxtda Cümhuriyyətin keçmiş ədliyyə naziri Xəlil bəy Xasməmmədov yaralanıb. Qətl Aram Yerkanyan tərəfindən törədilib. 1920-ci il iyulun 19-da AXC Parlamentinin sədr müavini Həsən bəy Ağayev Tiflisdə qətlə yetirilib. 1921-ci il martın 15-də Osmanlı dövlətinin keçmiş daxili işlər naziri, adı daşnakların “qara siyahı”sında birinci olan Mehmet Tələt paşa Berlində qətlə yetirilib. Mühakimə olunan Soqomon Teyleryan, qətli anlaqsız vəziyyətdə törətdiyi bəhanəsi ilə Berlin məhkəməsi tərəfindən bəraət alıb.
1921-ci il iyulun 19-da AXC-nin keçmiş daxili işlər naziri Behbud xan Cavanşir İstanbulda (şəhər 1930-cu ilədək Konstantinopol adlanırdı-S.H.) öldürülüb. Bu qətli törədənlər də cəzasız qalıb. Həmin ilin dekabrın 5-də Romada Osmanlı imperiyasının Baş naziri Səid Halim paşa qətlə yetirlib. Cinayəti törədən Arşavir Şirakyan tutulmayıb. Həmçinin 1922-ci il aprelin 17-də Berlində ailəvi gəzinti zamanı Trabzonun keçmiş valisi Camal Əzmi, iyulun 25-də Tiflisdə Osmanlı imperiyasının keçmiş dəniz donanması naziri Camal paşa öldürülüb.
Onu da qeyd edək ki, bu il aprelin 25-də İrəvanda “Nemezis” terror əməliyyatına həsr olunan abidənin açılışı olub. Bu abidənin qoyulması Ankara ilə münasibətləri normallaşdırmaq istiqamətində danışıqlar aparan rəsmi İrəvanın nə dərəcədə qeyri-səmimi olduğunun göstəricisi hesab oluna bilər.
Sonrakı illərdə ermənilər tərəfindən dünyanın müxtəlif ölkələrində “Ermənistanın azadlığı uğrunda erməni gizli ordusu” (ASALA), “Geqan”, “Geqaron”, “Erməni azadlıq hərəkatı” (AOD), “Erməni azadlıq cəbhəsi”, “Orli” qrupu, “Erməni soyqırımı ədalət komandosları”, “Erməni birliyi”, “Demokratik cəbhə”, “Apostol” kimi qayəsində terror aktlarının törədilməsi dayanan təşkilatlar yaradılıb. Erməni terror təşkilatlarının 1973-cü ildən 1984-cü ilədək xaricdə yaşayan türklərə etdikləri sui-qəsdlər nəticəsində 31-i diplomat və onların ailə üzvləri olmaqla, ümumilikdə 58 Türkiyə vətəndaşı qətlə yetirilib. “Böyük Ermənistan” xülyasının arxasınca düşən bu terror təşkilatlarının bəziləri hazırda da fəaliyyət göstərir.
***
Maraqlıdır ki, ermənilərin terrorçuluq əməlləri onların satqın, xain hesab etdikləri öz həmvətənlərinə münasibətdə də törədilib. Məsələn, elə “Nemezis” əməliyyatı çərçivəsində, satqınlıq etdiklərinə görə, Mkrtıç Arutyunyan, Vahe Yesayan və Adur Yaysyan qətlə yetiriliblər. Ancaq ermənilərin daxildəki ən böyük qırğını 1999-cu ilin oktyabrın 27-də parlamentdə törədilən terror aktıdır. O zaman Qarabağ məsələsi üzrə danışıqlarda xeyli məsafə qət edilmişdi. İrəvan və Bakı sülhə yaxın idi. Noyabrın 18-19-da ATƏT-in İstanbulda keçiriləcək sammitində iştirak üçün ABŞ Prezident Bill Klintonun da Türkiyəyə gəlişi gözlənilirdi. Sammitin keçirilməsinə 20 gün qalmış parlamentdə terror aktı törədilib. Nəticədə 8 nəfər, o cümlədən Ermənistanın baş naziri Vazgen Sarkisyan, parlamentin spikeri Karen Demirçiyan, vitse-spikerlər Ruben Miroyan və Yuri Baxşyan, operativ məsələlər üzrə nazir Leonard Petrosyan, deputatlar Armenak Armenakyan, Henrik Abramyan və Mikael Kotanyan qətlə yetiriliblər. Beləliklə, İstanbulda hansısa razılaşma əldə etmək mümkün olmayıb.
İndi də Ermənistanla Azərbaycan arasında danışıqlarda müəyyən irəliləyişlər var. Vaşinqtonda və Brüsseldə aparılan danışıqlar sülhün əldə olunacağına inam yaradır. Belə bir məqamda revanşistlərin fəallaşması onların prosesi ənənəvi üsullarla pozmasına gətirib çıxara bilər. Ancaq indi 24 il əvvəlki dövr deyil.
Ermənistanda hansı proseslərin baş verməsindən asılı olmayaraq, Azərbaycan öz məqsədinə çatacaq. Dövlət başçımızın mayın 3-də Şuşada “Böyük Avrasiya geosiyasətinin formalaşması: keçmişdən bu günə və gələcəyə” mövzusunda beynəlxalq konfransda dediyi kimi, biz onların konstruktivliyinə ümid edirik: “Əgər onlar konstruktiv olmasalar, biz diplomatik tədbirlərdən başqa hər hansı bir digər tədbirlərə əl atmağı planlaşdırmırıq. Bu qədəri bizə bəsdir. Buna görə, sadəcə, sülh olmayacaq, kommunikasiyalar açılmayacaq. Onlar yenə də təcrid olunacaqlar və onlar bu yeni geosiyasi konfiqurasiyada özlərinə yer tapmalı olacaqlar. Çünki bütün geosiyasi vəziyyət, – söhbət təkcə regiondan deyil, qlobal vəziyyətdən gedir, – dəyişib. Bizim orada öz yerimiz var. Bu yer çox sabitdir və getdikcə daha da möhkəmlənir. Lakin onlar üçün bu, böyük çağırış olacaqdır”. Bəli, Ermənistanın yeni çağırışlar qarşısında özünü necə aparacağını, necə duruş gətirəcəyini əlahəzrət zaman göstərəcək.
İlyas HÜSEYNOV,
politoloq
– Nikol Paşinyan sülh istədiklərini dəfələrlə bəyan edib. Lakin onun bu çıxışlarına inanmaq çətindir. O, bir tərəfdən sülh çağırışları edir, digər tərəfdən isə təxribatlara rəvac verir. Məsələn, İrəvandan Xankəndiyə doğru hərəkət edən humanitar yük karvanı bunun göstəricilərindən biridir. Yaxud, Hindistan istehsalı olan hərbi texnikalar İran vasitəsilə Ermənistana daşınır. Yəni, sülhdən danışan adam bu qədər məkrli davranaraq sülhü pozmaq üçün addımlar atmaz.
Məsələnin ikinci tərəfi Paşinyanın sülh müqaviləsinə imza atacağı təqdirdə, bunu daxili auditoriyanın, revanşistlərin, o cümlədən daşnakların necə qəbul edəcəyidir. Şübhəsiz ki, Hayastan baş naziri sülh müqaviləsini imzaladıqdan sonra ona qarşı böyük müqavimət hərəkatı başlayacaq. Ona qarşı sui-qəsd cəhdləri də ola bilər. Lakin hətta Nikol Paşinyanın həyatı bahasına olsa da, Ermənistan sülh müqaviləsini imzalamalıdır. Çünki sülhün alternativi yoxdur.
Səxavət HƏMİD, “Xalq qəzeti”