Ermənistanda bir neçə gündür ki, bu ölkənin xarici işlər naziri Ararat Mirzoyanın Azərbaycanın xarici işlər naziri Ceyhun Bayramovla iyunun 12-də Vaşinqtonda keçirilməli olan növbəti görüşünün təxirə düşməsi müstəvisində süni ajiotaj yaradılmaqdadır. Görüşün təxirə düşməsi ölkəmizin sülh danışıqlarından guya çıxması kimi təqdim olunmaqdadır. 

Ancaq məlumdur ki, Vaşinqton raun­dunun başqa vaxta keçirilməsi Türkiyə Prezidenti Rəcəb Tayyib Ərdoğanın Ba­kıya səfəri ilə bağlıdır. Erməni mediası və siyasi dairələrinin yaratdıqları fon isə ilk baxışdan elə təsəvvür yaradır ki, Türkiyə liderinin Azərbaycana səfəri bə­hanədir. 

İndi görürük ki, Ermənistan rəhbər­liyi uydurduğu “ssenariyə” öz aləmində məntiqi ardıcıllıq müəyyənləşdirmək­dədir. Diqqət yetirək, dünən Azərbay­can Ordusunun mövqeləri bir neçə istiqamətdən atəşə tutulub. Bura Şuşa da daxildir, Naxçıvan da. Nəzərə alaq ki, Prezident Ərdoğanın ölkəmizə səfəri Şuşa Bəyannaməsinin ikinci ildönümü ərəfəsində reallaşmışdı. Səfər çərçivə­sindəki ayrı-ayrı ikitərəfli və çoxtərəfli təmaslarda həmin sənədin önəmi üzə­rinə gəlindi, onun əhəmiyyəti vurğulan­dı. 

Görünür, bu cəhət İrəvanın hakim siyasi dairələrində qıcıq yaratdı. Buna görə də məhz Şuşa istiqamətində atəş­kəsi pozdular. Onu da nəzərə alaq ki, çoxdandır sırf bu yöndə belə hallar qey­də alınmırdı. Nəticəyə gəlirik ki, Azər­baycan hansı məsələni rəmzləşdirirsə, ona önəm verirsə, erməni avantürizmi həmin nöqtəni sarsıtmaq, bir növ, onun müqəddəslik statusuna xələl gətirməyi düşünür. 

İkinci məqam. Azərbaycan özünün, ümumən regionun ekoloji durumu üçün narahatdır. Qeyd edək ki, bir neçə gün öncə ölkəmizin qeyri-hökumət təşki­latları Ermənistanın Naxçıvan Muxtar Respublikası ilə həmsərhəd ərazisi olan Arazdəyən kəndində metallurgiya zavodu inşa etmələrinə qarşı bəyanat səsləndirdilər. Bəyanatın məğzində da­yanan başlıca məqam isə bu idi ki, Er­mənistan həmin zavodun tullantılarını Araz çayına axıdacaq. Bu qənaətə gəl­məyə əsas var. Ona görə ki, əvvəllər də Ermənistan hakimiyyəti oxşar yaramaz əməldən istifadə edərək çayı çirkləndi­rib, onun canlı aləminə zərər vurub.

Budur naharatlığa, belə demək mümkünsə, cavab var. Söhbət qeyd etdiyimiz kimi, həmin istiqamətdəki təxribatdan gedir. Ermənistan silahlı qüvvələrinin bölmələri Vedi rayonu­nun Arazdəyən yaşayış məntəqəsi is­tiqamətində yerləşən mövqelərindən Azərbaycan Ordusunun Naxçıvan Muxtar Respublikasının Sədərək rayo­nunun Heydərabad yaşayış məntəqəsi istiqamətində yerləşən mövqelərini ye­nidən müxtəlif çaplı silahlardan intensiv atəşə tutublar. Bu azmış kimi, ölkənin rəhbərliyi törətdiyi əməli Bakının üstünə atmaq kimi həyasız mövqeyə baş vur­maqdadır. 

Bəli, belə bir yekun nəticəyə gəlmək mümkündür ki, Ermənistan silahlı qüv­vələrinin aktivliyi sülh prosesini pozma­ğa yönəlib. Görünür, bunu avropalılar da hiss etməkdədirlər. Doğrudur, onlar həmişə olduğu kimi, konkret davranmır­lar, təxribatçını öz adı ilə çağırmaqdan yan keçirlər. Məsələn, Avropa İttifaqının Cənubi Qafqaz və Gürcüstan böhranı üzrə xüsusi nümayəndəsi Toivo Klaar özünün “Twitter” səhifəsində Ermənis­tan-Azərbaycan sərhədində artan gər­ginliyə toxunaraq yazıb: “Bütün ərazilər­də atışma dayandırılmalıdır. Görüşlərin müsbət dinamikasını saxlamaq və da­nışıqlar masası arxasında Ermənistan, Azərbaycana və bütün regiona fayda gətirəcək nəticələrə nail olmaq vacib­dir”.

Onu da bildirək ki, Azərbaycanın Müdafiə Nazirliyi Ermənistanın atəşkəs rejiminin pozulmasına görə ölkəmizi gü­nahlandırmasına münasibət açıqlayıb: “Azərbaycan Ordusunun bölmələrinin guya Arazdəyən istiqamətində metal­lurgiya zavoduna atəş açması və iki nəfərin yaralanması barədə Ermənistan tərəfinin yaydığı məlumatı qəti surətdə təkzib edirik”.

Əlbəttə, Azərbaycan sülhün vacibli­yini dərk edir. Yeri gəlmişkən, 44 günlük müharibədə qalib dövlət kimi Ermənis­tana sülh əlini uzadan da məhz ölkə­mizdir. Ancaq görünür, İrəvanda bu əli sıxmaq barədə yox, yenə də təxribatlar barədə düşünməkdədirlər. Heç şübhə­siz, belə destruktiv meyillər cavabsız qalmayacaqdır. 

Ə.RÜSTƏMOV, “Xalq qəzeti”